Guðaníundin
Guðaníundin eða enneatið (úr forngrísku: ἐννεάς, „níund“) voru níu fornegypskir guðir sem voru dýrkaðir í Helíópólis. Höfuðguðinn var Atúm, börn hans voru loftguðinn Sjú og regngyðjan Tefnút, börn þeirra voru himingyðjan Nút og jarðarguðinn Geb, og börn þeirra voru Ósíris, Ísis, Set og Nefþys. Þessi guðaníund er kölluð „stóra níundin“ til aðgreiningar frá öðrum guðaníundum sem stundum skiptu út einhverjum af guðunum fyrir aðra, eins og Anúbis, Hórus, Þot og Maat, og sem stundum komu faraó fyrir sem einum af guðunum níu.
