Witkeelswael
Die Witkeelswael (Hirundo albigularis) is 'n sangvoëlspesie wat inheems is aan Afrika suidwaarts van die ewenaar. Hulle oorwinter in die subtrope en trek vir die somermaande veral na Suid-Afrika waar hulle broei. Die spesie het baatgevind by die aanbou van damme en brûe, wat aan hulle bykomende broeigeleenthede verskaf. In Engels staan dit bekend as die White-throated swallow.
| Witkeelswael | |
|---|---|
| |
| Volwassene met insekprooi te Klein-Mooirivier in KwaZulu-Natal | |
Wetenskaplike klassifikasie 
| |
| Domein: | Eukaryota |
| Koninkryk: | Animalia |
| Filum: | Chordata |
| Klas: | Aves |
| Orde: | Passeriformes |
| Familie: | Hirundinidae |
| Genus: | Hirundo |
| Spesie: | H. albigularis
|
| Binomiale naam | |
| Hirundo albigularis Strickland, 1849
| |
| |
| verspreiding
oorwinteringsgebied somerverblyf | |
Beskrywing
wysig
Die Witkeelswael is 14–17 cm lank. Hulle is glansend-donkerblou geveerd oor die kop, bovlerke en rugkant, met 'n kol roesbruin vere oor die bles. 'n Opvallende blouswart band strek oor die bors, en skei die wit keel van die gryswit pens- en ondervlerkvere. Die wit keel en breë donker borsband onderskei dit van ander Hirundo-spesies. Die donker stertvere bevat 'n duidelike wit baan, en die buitestertvere is by die mannetjie effens langer as by die wyfie. Juveniele voëls is minder helderkleurig, met korter buitestertvere en 'n bruiner kroon. Hul roep bestaan uit aaneengerygde kweel- en kwetterklanke.
Verspreiding en habitat
wysigHierdie swaeltjiespesie broei hoofsaaklik in Suid-Afrika, en tot 'n mindere mate van Angola tot Zambië. Dit is oorwegend 'n trekvoël wat in Angola, Zambië en die suidelike DRK oorwinter. Dit verkies oop gebiede en grasveld, met 'n voorkeur vir hoëveld en hooglande, en die nabyheid van oop water. Dit word algemeen by mensgemaakte strukture aangetref.
Gedrag
wysigVoeding
wysigDit voed grotendeels op vlieënde insekte wat in 'n vinnig-swenkende vlug soos by dié van 'n Europese swael gevang word.
Broeigewoontes
wysig'n Koppievormige nes word aan 'n struktuur of oorhangende rots bo of naby water geheg. Dit word verskaf van 'n sagte voering bestaande uit gras of hare. Gepaste liggings is 'n lys onder 'n oorhangende rotswand of 'n mensgemaakte struktuur soos 'n gebou, damwal, duikweg of brug. Onbewoonde eerder as bewoonde geboue word verkies. Die nes kan in opvolgende jare vir 'n nuwe legsel aangewend word.
'n Tipiese legsel bevat drie eiers wat met bruin en blou vlekkies gespikkel is. Die legsel word vir 15 tot 16 dae deur slegs die wyfie uitgebroei, maar albei ouers voed die kuikens. Nesverlating verg 'n bykomende 20 tot 21 dae, maar die opgeskote voëls sal ná hul eerste vlug vir 'n paar opeenvolgende dae na die nes terugkeer om as 'n tydelike rusplaas te dien. Kuikens kan 'n kort afstand swem as hulle uit die nes sou val.
Galery
wysig-
Nes onder 'n natuurlike oorhang -
Nes onder 'n brug -
Nes teen dekgras -
Eier -
Ouer voer 'n nesverlater
