Springbok, Noord-Kaap
- Hierdie artikel handel oor die dorp in die Noord-Kaap. Vir die artikel oor die soogdier, sien eerder Springbok.
Springbok is die hoofdorp van Namakwaland, ongeveer 555 km noord van Kaapstad en 40 km suid van Steinkopf aan die N7 nasionale pad geleë tussen granietkoppies. Die nabygeleë Okiep en Nababeep was lank belangrike kopermynbousentra. Die naam is waarskynlik afgelei van die troppe springbokke wat by 'n plaaslike fontein gesuip het voor die ontdekking van koper. Dit is die setel van talle van die Noord-Kaap se regeringsdienste, asook die sentrum van die handel, nywerheid, vervoer en administrasie van Namakwaland.
Springbok | |
|---|---|
Dorp | |
 Uitsig oor Springbok vanaf "Klipkoppie" | |
  Springbok Springbok se ligging in Noord-Kaap | |
| Koördinate: 29°40′S 17°53′O / 29.667°S 17.883°O | |
| Land |  Suid-Afrika |
| Provinsie | Noord-Kaap |
| Distrik | Namakwa |
| Munisipaliteit | Nama Khoi |
| Stigting | 1862 |
| Oppervlak | |
| • Totaal | 37,56 km2 (14,50 vk. myl) |
| Hoogte | 950 m (3 120 ft) |
| Bevolking (2011)[1] | |
| • Totaal | 12 790 |
| • Digtheid | 341/km2 (880/vk. myl) |
| Rasverdeling (2011) | |
| • Wit mense | 14.7% |
| • Indiërs/Asiërs | 0.5% |
| • Bruin mense | 79.9% |
| • Swart mense | 4.1% |
| • Ander | 0.7% |
| Taal (2011) | |
| • Afrikaans | 95.1% |
| • Engels | 1.7% |
| • Ander | 3.2% |
| Poskode (strate) | 8240 |
| Skakelkode | 027 |
Geskiedenis
wysigDie gebied is in 1685 deur goewerneur Simon van der Stel op sy beroemde ekspedisie besoek toe hy 'n prospekteerskag hier naby gesink het. Die dorp was oorspronklik bekend as Springbokfontein en is in 1862 gestig, danksy die ontginning van koper in die omgewing. Dit is vir die eerste keer kommersieel deur ene King in 1850 ontgin. Die dorp het in 1933 munisipale status verkry. Dit is in die Tweede Vryheidsoorlog beleër en verower deur generaal S.G. Maritz. 'n Gedenkteken by die bekende klipkoppie in die middel van die dorp gedenk die Simboliese Ossewatrek van 1938 wat Springbok aangedoen het.
NG gemeente
wysigHoewel die eerste NG kerk in Namakwaland in 1864 by Bowesdorp naby die teenswoordige Kamieskroon gebou is, word die stigting van die NG gemeente Namakwaland, wat vandag op Springbok gesetel is, as 1850 aangegee. Ds. Hauman was die gemeente se eerste dominee en hy het Springbok, Bowesdorp en Kamieskroon bedien. Daar is ook 'n tweede NG gemeente op die dorp, die NG gemeente Boesmanland in die sogenaamde nuwe uitbreiding (Simonsig) aan die oostekant van die N7-hoofpad.
Besienswaardighede
wysigDie dorp is naby aan die Goegap Natuurreservaat geleë en is die basis van waar blommekykers jaarliks in die lente die blommeprag van Namakwaland verken. Daar is twee hotelle en talle gastehuise asook die bekende geel-en-wit gastekamers van 'n bekende inwoner, mnr. Jopie Kotze. Die dorp beskik ook oor woonwaparke, 'n vliegveld en 'n baan vir motorwedrenne. Die dorp het vroeër jare 'n vooruitstrewende Joodse gemeenskap gehad. Vandag word die sierlike ou sinagoge as museum gebruik, terwyl 'n klein klipkerkie van die Anglikaanse kerk as toeriste-inligtingsentrum dien. Dit is sowat 150 km van die see oor Steinkopf geleë. In die nabyheid is ook Spektakelpas, 22 km wes van die dorp en net oos van die Buffelsrivier, waar volgens oorlewering 'n ossewa omgeval het en die vrouepassasiers 'n spektakel veroorsaak het toe hulle uitgeval het.
Die Hester Malan-natuurreservaat naby Springbok beslaan 'n oppervlak van 6 500 hektaar en pronk met inheemse flora, vetplante (sukkulente) en aalwyne, wat ook hier gekweek word.
Opvoeding
wysigDie Primêre Skool Springbok en Hoërskool Namakwaland is die dorp se voormalige Model C-skole, terwyl daar ook 'n laerskool, Dr. Izak van Niekerk Primêr, in die woonbuurt Bergsig is. Daar is 'n hoërmeisieskool, St. Anna Privaatskool, wat deur die Rooms-Katolieke Kerk in Matjieskloof onderhou word en die Sekondêre Skool S.A. van Wyk in Bergsig.
Bevolking
wysigSpringbok se bevolking het toegeneem van 10 705[2] in 1996 tot 12 790 in 2011.[1]
Boorlinge
wysig- Esther Brand, 'n Suid-Afrikaanse atleet en Olimpiese gouemedaljewenner.
Sien ook
wysigVerwysings
wysig- ↑ 1,0 1,1 1,2 1,3 1,4 "Hoofplek Springbok". Sensus 2011.
- ↑ "World Gazetteer". Geargiveer vanaf die oorspronklike op 4 Desember 2012. Besoek op 4 Desember 2012.