Peter Holenstein

Der Peter Holenstein (* 19. Dezämber 1946 z Amriswil; † 17. Januar 2019 z Züri) isch e Schwiizer Journalist u Buechautor gsi. Syi Arbeit het i der Schwiiz u z Italie zur Entdeckig vom ene Justizirrtum bytreit.

Läbe

Der Peter Holenstein het under anderem als Journalist für d Wältwuche gschaffet. Dert isch är für Kriminalfäll zueständig gsi. Im März vom Jahr 2000 het är der Uftrag vo Das Magazin übercho, e Bricht über der Fall Werner Ferrari z schrybe. Sy Bytrag isch under em Titel "Der Schrei" im Magazin erschine. 5 Dag nach der erschyne vo däm Bricht, het är es Telefon vonere Frou übercho. Si het ne gfragt, wieso me bi däm Brycht keis Foto vo der Ruth Steinmann abdruckt het. Der Bricht isch nämlech mit Fotos vo de 5 Chind veröffendlecht worde, wo der Werner Ferrari ermordet hat. Statt der Ruth Steinmann het ds Magazin es Foto vom Daniel Schwan abdruckt. Dä isch 1971 vom Ferrari ermordet worde. Die Frou het du em Holenstein verzellt das si bi der Ermordig vo der Ruth Steinmann isch derby gsi u das si weiss das der Werner Ferrari nid der Mörder vo der Ruth isch.

Wyteri Recherche hei du massivi Fähler bi de Ermittlige im Fall Werner Ferrari a z Liecht bracht. So het der Holenstein e privati DNA-Analyse agstosse, will me es Schamhaar uf der Liche vo der Ruth Steinmann gfunde het. Das isch wäret de ganze Jahr nie undersuecht worde. D DNA Analyse het du ergä das ds Haar nid vom Ferrari isch. U e Untersuechig mit em ne Streifliecht-Scanner het zeigt, das der Ferrari ds Meidli nid Bisse het, u das es öpper andersch isch gsi. So isch es zum Widerufnahmeverfahre cho, wo der Werner Ferrari im Fall Steinmann isch freigsproche worde. I de andere 4 Fäll het z Urteil bis hüt Bestand.

Der Peter Holenstein het du es Buech gschribe über ds Läbe vom Werner Ferrari. Für das Buech het är der Ferarri im Gfängis bsuecht. Das Buech isch underem Titel: "Der Unfassbare: das mörderische Leben des Werner Ferrari" erschine.

Wägem Bitrag "Der Verdacht" im Tages-Azeiger-Magazin isch är mit em dütsche Regio-Prys uszeichnet worde.

Dar Fall Werner Ferrari isch nid der einzig Fall vom Holenstein blybe, woner e Justizirrtum ufklärt het. 1979 het är z Italie im ne Mordfall recherchiert. Dert isch es ihm glunge der richig Mörder z überfüehre. Dä het es Gständis abgleit u der 46-Jährig Schwizer Werner Rudolf Meier wo bis dert häre 24 Jahr unschuldig im Zuchthuus gsässen isch, isch vom Sandro Perini, em damalige Staatspresidänt vo Italie, begnadiget worde.

Im Alter vo 72 isch der Holenstein im Januar 2019 a de Folge vom ne Härzinfarkt z Züri gstorbe.

Wärch

• Lieber Luzifer: Totentexte – tote Texte. Edizioni Casa poetica, Termine 1974.
• Den Toten freuen keine Blumen. Bubenberg, Bern 1977, ISBN 3-85585-022-4.
• ... und jeder König nur ein Gast - Das Palace in Gstaad. Scherz Verlag, Bern/München 1982.
• Zum Beispiel Stefan: Aufzeichnung einer tödlichen Sucht. Oesch, Zürich 1984, ISBN 3-85833-569-X.
• Tilfaeldet. Verlag Sommer & Soerensen, Kopenhagen 1984, ISBN 87-7499-654-1.
• Kaffee: Das braune Gold. BEA-und-Poly-Verlags-AG, Brugg 1985.
• Ernst Bieri, Peter Holenstein, Karl Völk: Eine Familie und ihre Bank 1890–1990. Bank Julius Bär, Zürich 1990.
• Die Innenseite der Schuld: Lebensgeschichte eines Alkoholikers. Aare, Solothurn 1991, ISBN 3-7260-0370-3. (4., überarbeitete Auflage: Oesch, Zürich 2002, ISBN 3-0350-2009-4)
• Die sprechenden Maschinen. Studer-Revox. Das Lebenswerk des Audio-Pioniers Willi Studer. Schweizer Verlagshaus, Zürich 1996, ISBN 3-7263-6713-6.
• mit Gabriele Fricker: Aus freiem Willen. Oesch Verlag, Zürich 1999, ISBN 3-85833-531-2.
• Der Unfassbare: Das mörderische Leben des Werner Ferrari. Oesch, Zürich 2002, ISBN 3-0350-2001-9.
• Der Preis der Verzweiflung: Über die Kostenfolgen des Suizidgeschehens in der Schweiz. (PDF; 576 kB). Schweizerische Gesellschaft für die Europäische Menschenrechtskonvention SGEMKO, Zürich 2003.
• Der Mord von Zollikerberg. In: Peter Röthlisberger (Hrsg.): Skandale - Was die Schweiz in den letzten 20 Jahren bewegte. Orell-Füssli Verlag, Zürich 2005, ISBN 3-280-06052-4.
• La fede tra miracoli - Le incongruenze di Bernadette. Editore Reset, Rom 2008

Literatur

• Thomas Isler : Nur der Wahrheit verpflichtet. In: NZZ am Sunntig vom 27. Januar 2019, S. 23. (Online).