Aramäer (Christentum)

Dä Artikel behandlet d Aramäer. Nöd z verwächsle mit de Armenier, wo z Armenie wohned.

Flagge vo de Aramäer

Aramäer (aramäisch ܣܘܪ̈ܝܝܐ) sind einersits e ethnischi Volksgruppe, wo bis i d Bronzezit zrugg nochwisbar sind, und anderersits e christlichi Religionsgmeinschaft, us em Noche Oste, wo sich as Noofaare vo de historische Aramäer gsiend.

Geografii

S historisch Volk vo de Aramäer hät z Mesopotamie gläbt, eme Land zwüsched de Flüss Euphrat und Tigris im vordere Orient. Hützutags wohned d Aramäer im Gränzgebiet vo de Türkei, Syrie und em Irak. I de erst Hälfti vom 1. Joortuusig v. Chr. hend sich d Aramäer im Nööche Oste uusbraitet und meriri chliini Fürstetümer bildet. Wichtig Stämm us dere Zitt sind d Bīt-Baḫiani, d Bīt-Adini (um Masuwara), d Bīt-Agusi (um Arpad) und Bīt-Gabbar z Samʼal gsii.

Sproch

S Aramäisch, wo d Aramäer no reded, isch d Sproch, wo Jesus gredt hät. Aramäisch isch dozmol e Lingua franca im Vordere Orient gsi. Es git hüt no christlichi Kirchene (Orthodoxi- und Ostkirchene), wo d Sproch Alt-Aramäisch i ihrer Liturgii bruched.

Bedrohige

Sit em Völkermord a de Aramäer i de Johre 1915 bis 1917 im damolige Osmanische Riich gits immer wider Problem för da Volk, wo uf mehreri Länder im vordere Orient verstreut isch.

Aramäer z Europa

Es git z Europa chlinneri Gmeinschafte vo Aramäer, under anderem z Dütschland, z Östriich und i de Schwiz. Z Arth am Zugersee händ Aramäer 1996 s ehemolige Kapuzinerchloster überno und betreued vo döt us di syrisch-orthodox Chirche i de Schwiz.

Rezeption

D Forschigsstell fir Aramäischi Studie isch im Fachberych Gschicht un Soziologii vu dr Universitet Konschtanz igliideret.

Weblink

 Commons: Aramäer – Sammlig vo Multimediadateie

• Mehrsprochigi Internetsite mit Biiträg über Aramäer (http://oromoye.com/)