Globulin

Globulin si Spiicherprotein vo Pflanze und Protein vom Bluetplasma vo de Dier. S Albumin isch s äinzige Bluetprotein, wo nid zu de Globulin ghöört. D Globulin ghööre zur Grubbe vo de Globuläre Protein. Si wärde vor allem in dr Lääbere bildet. Im Bluetplasma mache si öbbe 40 % vo alle Protein us, iiri Masse isch zwüsche 36 kDa und 1,3 MDa. Bi 60 °C wärde d Globulin zu Chlümpe und si wärde au dur Felligsmiddel denaturiert. Si wärde vo Enzüüm und dur Hydrolyse abbaut.

Globulin si Äiwissstoff, wo im Wasser nid lööslig si, chönne aber mit verdünnte Nöitralsalzlöösige, wie z. B. Ammoniumsulfatlöösig, glööst wärde. Si häi e Hufe Funkzione, under anderem as Enzüüm, bim Reguliere vom pH-Wärt, as Energiiliferant, Dransporter und in dr Hämostase. Iiri Hauptufgoob isch aber in dr natürlige und dr erworbene Immunidäät gege Fremdkörper. Die immunologisch aktive Globulin wärde as Immunglobulin bezäichnet und in Plasmazälle sünthetisiert.

Litratuur

• Jeremy M. Berg, John L. Tymoczko, Lubert Stryer: Biochemie. 6 Auflage, Spektrum Akademischer Verlag, Heidelberg 2007. ISBN 978-3-8274-1800-5.
• Donald Voet, Judith G. Voet: Biochemistry. 3. Auflage, John Wiley & Sons, New York 2004. ISBN 0-471-19350-X.
• Bruce Alberts, Alexander Johnson, Peter Walter, Julian Lewis, Martin Raff, Keith Roberts: Molecular Biology of the Cell, 5. Auflage, Taylor & Francis 2007, ISBN 978-0815341062.
• Speckmann, Hescheler, Köhling: Physiologie 6. Auflage, Urban & Fischer, München 2013. ISBN 978-3-437-41319-3

Dä Artikel basiert uff ere fräie Übersetzig vu dere Version vum Artikel „Globuline“ vu de dütsche Wikipedia. E Liste vu de Autore un Versione isch do z finde.