Diccionario biográfico español

El Diccionario biográfico español ye un diccionariu biográficu publicáu pola Real Academia de la Historia.

Diccionario biográfico español
Datos
Tipu	obra escrita
Idioma	castellanu
Estáu	España
Data de publicación	2011
Editorial	Real Academia de la Historia
Páxina web	dbe.rah.es

Historia

Felipe V aprobó'l 23 de mayu de 1735 la creación de la Real Academia de la Historia. El so primer director, Agustín de Montiano y Luyando, propunxo la ellaboración d'un Diccionario histórico-crítico de España. Sicasí, la escasez de recursos provocó que la redaición del Diccionario biográfico español nun se llevara a cabu hasta finales del sieglu XX.

Edición impresa

Gonzalo Anes —direutor de l'Academia daquella—, Jaime Olmedo y Quintín Aldea Vaquero fueron los editores del diccionariu, redautáu por cinco mil historiadores a lo llargo de diez años. Consta de cincuenta volúmenes, 45.000 páxines y 40.000 biografíes de figures notables de la historia d'España, dende'l sieglu VII e.C. hasta'l presente. Los primeros venticinco volúmenes asoleyáronse en 2011 y la edición completóse col restu en 2013.

Edición electrónica

El rei Felipe VI y la reina Letizia encabezaron la presentación de la edición electrónica en 2018, anque parte del material yá taba disponible primero. Carmen Iglesias, direutora de l'Academia dende 2014, foi la responsable d'esta edición, que difier en dellos aspeutos cola edición impresa. Preténdese, amás, que los posibles errores que pudiera haber se vayan corrixendo.

Mientres que la edición impresa contién información alrodiu de persones vives, la electrónica namái recueye a les finaes.

Crítiques

El diccionariu recibió crítiques pola dificultá d'escribir sobre figures tovía vives y, sobremanera, porque na entrada de Francisco Franco nun se ficiera alusión a la so condición de dictador. Sicasí, de cara a la versión en llinia, esto revisóse.

Enllaces esternos

• Diccionario Biográfico Español, Real Academia de la Historia

• Datos: Q41705771