Chibchacum

Chibchacum ( okon gu Chibchacun ) tiyir lorikye va muva is edi koe alka is vundopa ke Muisca sane dene abdiespanafa Amerika. Chibchacum : Va muva sostujer ise va salt ke kuksa arjoyar ise va ruftacek sonekir radimida Bochica al lanzar nume va tamava moe epiteem gonoburer. Pimtara Koe vund, kotviele Chibchacum zideyer, pune va muvarapa mo azeka stakseyer nume va laumayera ke voeem num vilara va tawamidura is moneem ke Muisca sane nekiyir. Kotviele muva ten duyur azen awalt gin jebeyer isen Cuchavira awiyir, pune sane va moava vas lefa duga ok moavalutaf vangluyaks ( tumbaga ) ok biraf benev ik smilkxama grewatason firviyir. Lana vunda kareizur da Muisca saneik va lana raporka payuyud ise va Bochica sonteyed. Chibchacum zidepeyer aze va Bochica tcumiveyer. Mo tawava titlaniyir aze va Huitaca ayikya yegasa va lava katcalayar. Chibchacum nesayar, abdiplekuson da ba tenule ke felira ke Bochica ina di tiyir gazik. Huitaca va int zokeveyer. Kot saneik va sint di kevalieyed kiren fogetiyir kiewaf loon dam artan ise dun rotuxayar. Batcoba va wideytafa geja nekiyir. Huitaca gan Bochica zo rotapsayar nume gu batakaf murtoy zo artazukayar. Larde azed al zo edobeyer, pune Chibchacum va int jaxadayar, tiyason va rotusa diolaca nekisa va kentacekap. Ayik pu Bochica iegayad enide ina va sin giwayar numaze di zo payuyur. Acum Bochica va krant divtraspusis va lava nekiyir. Bochica va Chibchacum esteyer ise rotapsayar. Chibchacum zo poayar da moe epiteem va gadafa Tawava parmon goburer. Banvielu Muisca saneik folid da kot ruftacek sotir tegi ke Chibchacum kotviele in va intaf gamiaf vaj arburer. Ewavak Vuestexa (es) Ocampo López, Javier. 2013. Mitos y leyendas indígenas de Colombia. Plaza & Janes Editores Colombia S.A.

Chibchacum Lorikye ke Muisca Kira Lizukaf yolt Chibchacun Yorda Lorik va muva is edi Pilkovoy Muva is edi Atay Gola Muisca Lorafa yasa Yerumanik Huitaca betara teza