УАЗ-451

УАЗ-451

УАЗ-451 на Вікісховішчы

Агульныя даныя

Вытворца:

УАЗ

Выпуск:

1961—1982

Зборка:

СССР

Дызайн

Тып(ы) кузавы:

4‑дзв. фургон (2‑месн.)

Колавая формула:

4×2

На рынку

Папярэднік Папярэднік няма

Пераемнік Пераемнік няма

УАЗ-451 — грузапасажырскія аўтамабілі з колавай формулай 4×2, якія вырабляліся на Ульянаўскім аўтамабільным заводзе з 1961 па 1982 год.

Было выраблена 83 449 аўтамабіляў сямейства «УАЗ-451».

Мадыфікацыі

• УАЗ-451 — суцэльнаметалічны фургон.
• УАЗ-451Д — бартавы грузавік з двухмеснай кабінай.
• УАЗ-451А — санітарны. Серыйна не выпускаўся, існавалі толькі доследныя ўзоры.
• УАЗ-451В — 9-месны мікрааўтобус вагоннай кампаноўкі.

Апісанне канструкцыі

Пры знешнім падабенстве мадэляў УАЗ-450 і УАЗ-451 паміж машынамі меліся прынцыповыя адрозненні як у кампаноўцы, так і агрэгатнай базе. Для заднепрываднага УАЗ-451 было распрацавана прынцыпова новае шасі. Галоўным адрозненнем новай платформы стала плоская рама лесвічнага тыпу і ссунуты назад і ўніз адносна пярэдняй восі рухавік — у параўнанні з аўтамабілямі ГАЗ-69 і УАЗ-450 пярэдні тарэц блока рухавіка быў ссунуты на 220 мм назад. Гэта спрыяла паляпшэнню разважвання і дазваляла павялічыць прастор у кабіне. Новая архітэктура дазволіла пасля стварыць другое пакаленне ўсюдыходаў — УАЗ-452.

Кузаў аўтамабіля-фургона УАЗ-451 (-451М) — суцэльнаметалічны фургон, вагоннага тыпу, чатырохдзверны (трое бакавых дзвярэй, задняя двухстворкавая). Звонку адрозніць ад фургонаў УАЗ-450 можна было толькі па наяўнасці бакавых дзвярэй грузавога адсека. Кабіна грузавога УАЗ-451Д (-451ДМ) — двухмесная, размешчана над рухавіком; кузаў — драўляная платформа з трыма бартамі.

Першыя чатыры гады аўтамабілі камплектаваліся рухавікамі і трохступеньчатымі каробкамі перадач ад УАЗ-450. У 1965 годзе, з пачаткам выпуску УАЗ-452, абодва сямействы атрымалі чатырохступенчатыя каробкі перадач і рухавік ЗМЗ-451. Рухавік — карбюратарны, радны, чатырохцыліндравы з вадкасным астуджэннем і працоўным аб’ёмам 2445 см³. Ад рухавіка ГАЗ-21 ён адрозніваўся канструкцыяй накрыўкі каромыслаў, паддону картара, кранштэйнаў мацавання падушак пярэдняй апоры рухавіка і тэрмастата. З восені 1969 года вытворчасць гэтага рухавіка пачалася на Ульянаўскім маторным заводзе, і рухавік атрымаў пазначэнне УМЗ-451. У 1971 годзе пачалася вытворчасць мадэрнізаванага рухавіка УМЗ-451М магутнасцю 75 к.с. На аўтамабілі з’явілася чатырохступеньчатая каробка перадач са змененым прывадам і рычагом, усталяваным на паветраводзе.

Для павелічэння грузападымальнасці да 1000 кг ужытыя ўзмоцненыя пярэднія і заднія рысоры, узмоцнены вядзёны дыск счаплення, падвышаны ціск у шынах. Таксама ў рулявым механізме ўжыты ролік вала сошкі ад аўтамабіля ГАЗ-51. У ступіцах пярэдніх колаў усталёўваліся ролікавыя канічныя падшыпнікі наўзамен шарыкавых радыяльна-упорных. Было зменена размяшчэнне органаў кіравання: руля, педаляў і рычага стаяначнага тормаза. Змененыя пярэдняя панэль, капот і паветравод кузава і кабіны. Пярэднія дзверы кабіны абсталяваны апусканым шклом.

Мадэрнізаваныя ў 1965 годзе «451-я» атрымалі ў індэксе дадатковую літару «М».

Машыны на базе УАЗ-451

УАЗ-451С

УАЗ-451С — эксперыментальны паўгусенічны снегаход. Камплектаваўся зменным сезонным абсталяваннем для пераадолення снежнага бездарожжа і цаліны. Замест пярэдніх колаў усталёўваліся металічныя кіраваныя лыжы, а замест задніх — гума-металічныя гусенічныя рухачы. Было выпрабавана некалькі варыянтаў. На першым прадугледзелі зняцце колаў і ўстаноўку замест іх лыж. На другім (УАЗ-451С2) — колы здымаць не было неабходнасці — лыжы мацаваліся прама на іх.

У-131

У-131 — электрамабіль на шасі УАЗ-451ДМ з сістэмай электрасілкавання на пераменным току, распрацаваны кіраваннем «Главмосавтотранс» сумесна з УНДІЭМ Мінэлектратэхпрама.

Акумулятары месціліся ў кузаве фургона, таму ўнутраны аб’ём быў невялікі, а грузападымальнасць складала ўсяго 500 кг пры поўнай сваёй масе 2400 кг. У 1974 годзе выраблена партыя з пяці электрамабіляў. Эксплуатавалі машыны на 34-м аўтакамбінаце «Мосторгтранса» для перавозкі мясных і каўбасных вырабаў.

УАЗ-451МІ

УАЗ-451МІ (руск.: УАЗ-451МИ) — электрамабіль з сістэмай электраабсталявання на пераменным току, з зараднай прыладай, змантаванай на электрамабілі, што дазваляла падзараджаць акумулятары машыны ў любым месцы прама ад гарадской электрасеткі.

Кузаў гэтага электрамабіля амаль не адрозніваўся ад серыйнага суцэльнаметалічнага фургона. Пад рамай машыны знаходзіліся вялікія чорныя скрыні для акумулятараў, а дэкаратыўная рашотка радыятара была замененая адмысловай «глухой» панэллю, афарбаванай пад колер самога аўтамабіля. У кабіне толькі спідометр заставаўся на звыклым месцы, на месцы астатніх стандартных прыбораў — вольтметры і амперметры ў чорных пластыкавых карпусах. Замест рычага КП быў вялікі рычаг выключэння «масы». Дзве педалі — «ход» і «тормаз».

У 1978 годзе выраблена партыя.

УАЗ-3801

УАЗ-3801 — электрамабіль з сістэмай электраабсталявання на пераменным току.

Акумулятарны адсек з-пад рамы зноў перамясціўся ў кузаў фургона, і для доступу да яго былі зробленыя адмысловыя люкі з кожнага борта. Пры гэтым правыя бакавыя дзверы фургона прыйшлося значна скараціць знізу, а падлога кузава ўнутры грузавога адсека зроблена ступеньчатай, з пандусам над акумулятарным адсекам.

У 1981 годзе пабудавана каля 30 машын.

ЛуМЗ-946

ЛуМЗ-946 — рэфрыжэратар грузападымальнасцю 500 кг, які выпускаўся Луцкім машынабудаўнічым заводам на базе УАЗ-451М.

Гэтыя машыны абсталёўваліся машынна-акумуляцыйнай сістэмай: у кабіне замест пасажырскага сядзення ўсталёўваліся халадзільныя агрэгаты ФГК-07, якія працавалі ад вонкавай электрасеткі, а ў кузаве — два акумулятары холаду. Для поўнай зарадкі акумулятараў холаду патрабавалася 6 гадзін, пасля чаго неабходная тэмпература ў кузаве магла падтрымлівацца на працягу 12-24 гадзін (у залежнасці ад рэжыму работы аўтамабіля).

Літаратура

• "УАЗ-451М". Автолегенды СССР(руск.). Vol. 106. «DeAgostini». 2013. ISSN 2071-095X.
• Краткий автомобильный справочник НИИАТ. Издание пятое, переработанное и дополненное(руск.). М.: «Транспорт». 1967. p. 110-117, 315-317.
• Краткий автомобильный справочник НИИАТ. Издание десятое, переработанное и дополненное(руск.). М.: «Транспорт». 1985. p. 56-57.
• Новая техника: Микроавтобус УАЗ-451В(руск.) // За рулём : часопіс. — 1959. — № 04. — С. 25.
• Новости советской техники: Ульяновский завод приступает к серийному выпуску новых автомобилей(руск.) // За рулём : часопіс. — 1965. — № 09. — С. 10-11.
• Ульяновские снегоходы(руск.) // Грузовик Пресс : часопіс. — 2012. — № 08.
• Автомобиль УАЗ-450 глазами конструктора. Дальнейшее развитие конструкции первого семейства автомобилей вагонной компоновки(руск.) // Панорама УАЗ : газета. — 31 мая 2017. — № 16 (8317). — С. 5.

Спасылкі

• 75 лет УАЗ: Снегоход // uaz.ru (руск.)
• 75 лет УАЗ: Электромобили УАЗ // uaz.ru (руск.)
• «Буханке» — 60 лет. Легенда автопрома все еще в строю и уходить не собирается // abw.by (руск.)

Гл. таксама

• На Вікісховішчы ёсць медыяфайлы па тэме УАЗ-451