Loncat ke isi

Aèr klonyo

Deri Wikipédi

thumb|Aèr klonyo botolan Cordon Rouge COTY Aèr klonyo[1] (hurup Arab Gundul: اير کلوڽو; Prasman: Eau de Cologne 'aèr deri Kèlen') atawa aèr wangi[2] (hurup Arab Gundul: اير واڠى) ada satu peralatan bebersih, minyak wangi ala Kèlen, Negeri Dèt. Wayah gini, ni istilah dipaké bakal ramuan wewangian dengen kegantingan sekitaran 2-5% minyak asiri. Aèr klonyo bisa' dipaké lanang atawa wadon.

Bahan

[permak | permak sumber]

Di bahan dasar sulingan ètanolnya (70-90%), aèr klonyo ngandung campuran miyak sitrus, masup juga sitrun, jeruk tanjah[3], jeruk bèrgamot, jeruk limo, jeruk manis[4], èn néroli. Aèr klonyo juga' bisa ngandung lapèndel[5], rosemarèn[6], tèm[7], minyak daon jeruk[8], èn melati.

Sejarah

[permak | permak sumber]

thumb|Aèr klonyo buatan Farina Aèr klonyo entu minyak wangi spirtus-sitrus nyang diluncurin di Kèlen tahon 1709 ama Giovanni Maria Farina (1685-1766), atu ahli minyak wangi Itali dari Santa Maria Maggiore Valle Vigezzo, Itali. Tahon 1708, Farina nyuratin abangnya Jean Baptiste: "Nih, gua udah nemuin wewangian nyang ngèlingin gua ama pagi musim kembang di Itali, kembang narsis gunung, èn mekaran jeruk abisnya ujan".[9] Mangka, dia namain dah tu wewangian Eau de Cologne, lantaran dia punya tempat tinggalnya nyang baru itu waktu.

Aèr klonyo nyang asli nyang diramu ama Farina, awalnya, cuman dipaké jadi minyak wangi biasa èn dianter-anterin ke "ampir orang priyayi punya rumah di Èropa". [10] Dia punya kegapaan bakal ngasilin atu wewangian nyang ajeg nyang ngandung lusinan saritunggal[11] itu waktu jadi sènsasi. Pas perdagangan bébas udah diterepin di Kèlen ama Pemerèntahan Prasman selamanya tahon 1797, keberasilan aèr klonyo mancing bejibun-jibun pengusaha punya minat bakal ngejual dia punya minyak wangi bikinannya paké nama Eau de Cologne, hata juga' bawa-bawa nama Farina.

Giovanni Maria Farina punya racikan udah diproduksi di Kèlen sedari tahon 1709 ama maskepé Farina gegenüber (tèhenoper)[12] dem Jülichs-Platz èn ampé sekarang masing jadi resia. Dia punya toko di Obenmarspforten buka' tahon 1709 èn sekarang jadi pabrik wewangian paling bangkot seantèro dunia. Aèr klonyo laènnya, kaya' Klonyo 4711 nyang mashur, dinamain deri dia punya lokasi di Jalan Glockengasse no. 4711, èn ada punya nama sama, cuman béda bau doang. Tahon 1806, Jean Marie Joseph Farina, Giovanni Maria Farina (1685–1766) punya cicit misan, ngebuka' usaha dagang minyak wangi di Parés nyang entarnya ngembang jadi Roger & Gallet, nyang ada punya hak bakal Eau de Cologne extra vielle 'aèr klonyo lebi tua', sebagé bédaannya deri Eau de Cologne deri Kèlen.

Eau de Cologne atawa aèr klonyo sekarang jadi istilah umum.

Ruju'an

[permak | permak sumber]
  1. ↑ Saidi, Ridwan. (2007). Glosari Betawi: Kamus kata-kata, nama, dan peristiwa dari zaman prasejarah hingga zaman moderen. Betawi Ngeriung. h. 2.
  2. ↑ Batten, C. J. (1868). De Djoeroe Basa Betawi: Eenvoudige Bataviaasch-Maleisch woordenverzameling. H. M. van Dorp. h. 177.
  3. ↑ Jeruk tanjah (hurup Arab Gundul: جروق طنجه) – tangerine (Indo.); tangerine (Ing.).
  4. ↑ Jeruk manis (hurup Arab Gundul: جروق مانيس) – limau gedang (Indo.); grapefruit (Ing.); jeruk manis (Jw.).
  5. ↑ Lapèndel (hurup Arab Gundul: لافندل) – lavender (Indo.); lavender (Ing.); lavendel (Wld.).
  6. ↑ Rosemarèn (hurup Arab Gundul: روسمارين) – rosemari (Indo.); rosemary (Ing.); rozemarijn (Wld.).
  7. ↑ Tèm (hurup Arab Gundul: تيم) – timi (Indo.); thyme (Ing.); tijm (Wld.).
  8. ↑ Minyak daon jeruk (hurup Arab Gundul: ميڽق داؤن جروق) – petitgrain (Ing.).
  9. ↑ Eckstein, Markus; Sykes, John (2009). Eau de Cologne: Farina's 300th Anniversary. Cologne: J. P. Bachem. ISBN 978-3-7616-2313-8. h. 8.
  10. ↑ Selebaran inpormasi Musium Wewangian Farina di Kèlen
  11. ↑ Saritunggal (hurup Arab Gundul: سريتوڠݢل) – monoessence (Ing.).
  12. ↑ Tèhenoper (hurup Arab Gundul: تيهنوفر) – 'lawannya'; tegenover (Wld.).
Didapetin deri https://bew.wikipedia.org/w/index.php?title=Aèr_klonyo&oldid=19663