Merc'hed er c'hrennlavaroù

Setu un dornad krennlavaroù, enne ar ger merc'h.

Ar bugel

• Merc’h he mamm eo Katell.

• Hevelep mamm, hevelep merc’h.

• Gwelloc’h dimeziñ abred merc’h Evit kaout keuz war-lerc’h.

• Tamm ha tamm E ya ar verc'h da vamm.

Ar merc'hed ha kevredigezh

• Biskoazh chañs vat n’eus bet O karet ar merc’hed.

• A-viskoazh ez eus bet lavaret N’eus chañs vat ebet O karet ar merc’hed.

• Ar c’hafe du hag ar gwin gwenn A ra d’ar merc’hed koll o fenn.

• Karout ar merc’hed hag ar gwin A denn peurvuiañ da wall fin.

• Evañ gwin ha kañjoliñ merc’hed Setu kefridi ar c’hloareg. E Gwerziou Breiz-Izel ez eus ur werz, Olier Hamon, ma kont ar c'hloareg e vuhez bambocher: ... Ec'h aen-me d'an davarn da evañ Da evañ gwin, kañjoliñ merc'hed, Setu eno dever ar c'hloareg.

• An truilhoù hag ar merc’hed brav A gav fred atav.

• N’eo ket ur seblant vat Klevet merc’hed o c’hwistellat. Gwir eo e c'hall ar c'hrennlavar degas soñj eus c'hwitell Marc'harid Charlez, ur vuntrerez a voe kondaonet d'ar marv, met hervez ur c'hrennlavar all :

• Pa vez ar merc’hed o c’hwitellat Ar Werc’hez a bleg he fenn dalc’hmat. Un dra vezhus e oa d'ar merc'hed en em zerc'hel, c'hoari, ha c'hwitellat evel paotred.

• Gouzañv ar merc’hed hag an amzer A zo daou dra ret da ober. Anat eo e c'haller lakaat ar ger paotred e-lec'h merc'hed amañ.

• Ar merc’hed koant a lez pokat dezho Hag ar re vil a ra ivez.

• Pa verv ar yod e toull ar vazh E lar ar merc’hed e vez poazh.

• Pa vez an avel er gevred E sav c’hoant c’hoari d’ar merc’hed

• Blev gwenn ha lunedoù Ne blijont ket d’ar merc’hedoù. Emañ ar c'hrennlavar-se e geriadur Gregor Rostren.

• C’hwezh an tin hag al lavand Zo gant ar merc’hed yaouank C’hwezh ar banal mogedet Gant ar merc’hed dimezet.