El Tornu

El Tornu es un puebru serranu dela provincia de Caçris, assitiau ena comunidá autónoma d'Estremaúra (España).

40° 5′ 0″ N, 5° 51′ 0″ W

El Tornu
Entidad subnacional
Bandera Escudo
Ubicación de El Tornu
Coordenadas	40°08′08″N 5°56′43″O
Capital	El Torno
Entidad	Monicipiu d'España
• País	España
Superficii
• Total	22 km²
Altol
• Media	769 m s. n. m.
Puebración (2023)
• Total	838 hab.
• Densidá	38,09 hab/km²
Gentilíciu	Torniegus
Huso horario	UTC+01:00
Código postal	10617
Sitio web oficial

Situación

Está assitiau en mé duna las laeras que holman el Valli del Xerti.

Origin

Es d'origin medieval.

Economia

La su pobración s'eica prencipalmenti a la agricurtura i a la ganaeria, destacandu el curtivu zerezas, azetunas, frangüesas i patatas. Estas úrtimas dierun fama a los torniegus, conocius nel Herti cumu "pataterus" u "patatiegus".

Enos úrtimus añus está tomandu mayol emportáncia el turismu rural, ya qu'está assitiau nun lugal mu apropiau pa visoreal la belleza el Valli el Herti dendi los sus miraoris naturalis. El puebru ya tiini una güena estrutura d'alohamientus turísticus (angañu ain censás cuatru casas ruralis, un ambergui rural i un nuevu comprehu oteleru nel bárriu típicu "El Purtugal").

Ai una tupa gargantas i regachus enas sus celcanias, con áuguas límpias i cristalinas. La sierra es un lugal apropiau pal senderismu i el parapenti, i ain albondus sahurdonis de piera, de reminiscéncias certas.

Los abitantis d'El Tornu son amabris i convessaoris, i entovia conselvan rahus dialeutalis nel su palraeru, enquairaus ena modaliá d'artuestremeñu.

Costumbris

Las costumbris dun puebru son quiziás una las notas mas emportantis pa conocel la su própia entiá. La holma vivil las hentis assín cumu el su folclori mos dan un crara retrataura el sintil el puebru.

Las fiestas

Los torniegus án estau mu apegaus a la su traición i a la elésia, pol mé de lo qual que la mayol parti las sus fiestas seyan de tipu relihiosu. Las mas emportantis son:

Panorámica atual d'El Tornu

San Lucas (18 d'Otubri)

Es la fiesta mas representativa el sintil torniegu. Antañu, dos domingus enantis la fiesta, se celebraba ena praça la féria machorras (cabra vieha que ya nu sirvi pa crial). Ca família mercaba una pala fiesta, u, dependiendu la economia, dos familias mercaban una entri las dos.

Era traicional celebral corrias ena praça, afechá con tabronis i estaconis pa tal fin. Los animalis traius polos ganaerus el puebru eran toreaus i alogu degorvius, nu huendu nunca sacrificaus. Vinian abondus folasterus los puebrus de pallí.

Nesta fiesta se cantaba la "ronda del Pájaro" (ronda el Paharu):

Ya viene san Lucas
el pijotero,
que nos llena la casa
de forasteros.
El pájaro ya vendrá,
ya vendrá el pájaro.
Ya viene San Lucas,
la pitarra también.
Mataremos la machorra
y pondremos la sartén.

Ogañu esta fiesta á resulhiu, aluspués dun periodu en decaéncia. Prencípia el 17 d'Otubri pola tardi con el "petitóriu", al son la frauta. El 18 se celebra misa i procesión del Santu Evanhelista. Duranti estas fiestas se puein prebal las perrunillas, calni machorra i un escelenti vinu pitarra torniegu.

Froris de zerezus torniegus

Muestra Siñora la Pieá (15 d'Agostu)

Esta fiesta nu tinia tantu arraigu antañu, peru prencipió a renacel enos añus cincuenta. Pol esta epoca albondus abitantis d'El Tornu emigran en cata labutu a las grandis ciais i güervin pal Tornu en Agostu, resurtandu assina la fiesta mas concurria i animá.

Escomiença el 14 d'Agostu pola tardi con el "pregón" i el "petitóriu". A los lobricanus se holma una gran verbena populal ena praça. Ena mairugá el dia 15 se celebra la traicional "arborá" ena que s'envita a los fielis al Rosáriu la Aurora, nel que se canta:

¡Oh, celestial aurora!
¡Oh, dulce Madre mía!
Santísima María,
escucha en esta hora
las voces, gran Señora,
que damos con fervor.
Todos te mantenemos
un entradable amor.

A las dozi la meyudia se celebra misa i procesión la imahin pol recorriu abitual. De que lobriqueci esmiençan los huegus i conculsus que dan passu a las verbenas, grandis protagonistas destas fiestas, a las que van una tupa vizinus de tol valli, i que se celebran duranti los tres diinas siguientis.

Zerezas torniegas

San Sebastián Valerosu (20 d'Eneru)

Antañu esta fiesta era mu celebrá pol tolos vizinus, qu'ehaban enclusu la briega el campu pola tardi, al tocal la campana la ermita a víspiras. Se sacaba el Santu en procesión llevau a ombrus polos mayoldomus hata la elésia. Se cantaba:

El veinte de enero, cuando más hiela,
sale un capitán fuerte a poner bandera:
San Sebastián valeroso, fuerte soldado,
que a la cumbre del cielo fuiste alojado

El primel dia se cantaba misa i en procesión era llevau a la puerta la ermita, subastándusi los quatru braçus las andas para degorveli al su artal.

En 1920 la ermita hue vendia, la imahin llevá a la elésia i la celebración cambeó: los mayoldomus pasarun a sel los quintus, que piian la víspera pol tolas casas del lugal cola coplilla "Una limusnina pal Santu"; los vizinus ofrecian henerosamenti chorícius i azeiti.

Al dia siguienti se sacaba al Santu en procesión, portau polos quintus, arriscaus cumu melitaris; duranti el recorriu se gañitaban sarvas i a continuación se celebraba la misa cantá (en latín).

Angañu la fiesta se celebra de la mesma holma, chambandu solamenti las sarvas pol coetis.

Sahurdonis i casas ruralis

Antruehu

Antañu esta fiesta se vivia con gran regocihu saliendu duranti estus dias rondas i antruehus pol tol puebru cantandu:

Ya vienen los carnavales,
la feria de las mujeres,
y al que no le salga novia,
que aguarde al alto que viene.
¡Viva la alegría,
viva el carnaval,
viva la alegría,
que ya se nos va!
¡Que ya se nos va,
que ya se nos fue!
¡Viva la alegría,
que vuelva otra vez!

El Miércuris de Zeniza a meya tardi se torea la vaquilla ena praça, siendu la imitación duna capea ena qu'el toru es un zagal arriscau con una manta i unas astas de vaca sobri la cabeça. El zagal ebi sel un mihina picarán, pa dal mas animación a la corria, puestu que los diestrus son las zagalas.

Es traicional nestas fiestas manducal turrillos, patatas "escabechás" i güesillus.

Cuaresma

Epoca e recohimientu i sin diversión. Los zagalis pasan el tiempu ahilandu pola carretera; las zagalas huegandu a "los alfileris" i al "álamu" i la moceá e lutu ahilaba pol lugaris deferentis: Las Callehas i Las Tontas.

Antañu, a meya tardi el Huevis Santu, se celebraba el "hubileu", nel que las zagalas daban sieti güertas a la cancela reçandu en ca una trenta i tres Creus.

La nochi el Vienris Santu se celebra la procesión de los capazus (esteras cercularis gastás enos lagaris pa prensal las azetunas), que assitiaus a lo largu el recorriu alumbran el pasu el Naçarenu i la Dolorosa.

San Huan (24 e Húniu)

Desistia la supestición de "la grana de la helecha", sigún la cual el arrecohela e madrugá traia güena suerti, corriendu el riesgu d'alcuentralsi colas "bruhas" (gromista antruehau con una sábana), qu'esminciaba dançandu p'acagazal, i si lo conseguia, apaleaba al arrugau.

Féria ganaera (1 d'Agostu)

A prencípius de sigru se celebraba untal riu, nel parahi llamau El Molinu. Posteriolmenti se muó pal Lombu, lugal assitiau a 1 qm del puebru, ondi se feriaba con el ganau vacunu i equinu. Amás de la féria e ganau, abia puestus ambulantis i se celebraba un chiqueninu bailaus populal. La merca-venta e ganau porcinu, caprinu i ovinu se hazia nel puebru, nel lugal llamau El Regahu. Uguañoti esta féria nu tiini albonda emportáncia.

Los Santus (1 e Noviembri)

Esta fiesta acontina manteniendu la horma traicional de celebralsi: pola mañana los chirivehis van en cá los sus familiaris con una cestilla e mimbrei piyendu "los Santus", siendu correspondius con durcis. Pola tardi s'arrehuntan colos sus amigus i se lo manducan. Los zagalis argu mas mayoris quean en alabanis organizandu pequeñus banquetis.

Fiestas familiares

Las matáncias

Nel mes de Diciembri prencipian las matáncias sigún la costumbri torniega, tres dias enantis de matal al guarru se pica i cueci el calabaçu, pa qu'esté bien escurriu. El dia anteriol pola tardi se cuecin i pelan las patatas, se devanan las madehas de cuerda p'atal los embutius, i se pelan i pican los ahus.

El dia la matáncia, ya amaneciu, se sacrifica el guarru. Se chumasca con helechus i escobas i se descuartiça. Las muheris van a la garganta a laval el bandul, los ombris pican las patatas, calabaça i carni pa hazel los embutius. Cola hangri el guarru se hazi morcilla gorda, colas tripas asauras i con carni la cabeça los "choricius gutus".

Pola nochi se guisan los choricius i salchichonis i a la mañana siguienti las morcillas patateras. A continuación s'embuti i ata la cecina. Pola tardi se salan los hamonis i s'adoban los lomus.

Los pratus típicus d'estus dias son: migas con vinu u café, patatas de probi, sopa cachuela, guisu d'ígau i chicharronis, ensalá e patatas fritas i caldereta, tó ellu regau con güen vinu e pitarra. Una vezi acabihá la cena tola família sali e ronda con tapaeras, almirecis, calderus, cucharas cantandu:

Este noche, vida mía,
no te rondo con guitarra:
te rondo con almireces
porque estemos de matanza.
¡Ay que sí, que sí,
ay que no, que no!
Si tú tienes huerto,
jardín tengo yo,
jardín tengo yo,
jardín tengo yo.
¡Ay que sí, que sí,
ay que no, que no!

Las voas

La traicional horma e celebral las voas nu á chambau albondu. Los preparativus encetan la semana anteriol, ena que se hazin las "rosas", los "rosconis" (biscochu grandi con horma e corona cerculal, que nel centru lleva assitiau un ramu clavelis) i, ya la víspera, los "buñuelus", que se repartin entri vizinus familiaris.

La nochi anteriol se reuni tola família pa cenal. El menú sueli sel: chocolati con roscón i buñuelus, callus i patas de corderu con lomu curau el puebru i arrós con lechi.

El dia la voa, la madrina acompaña al nóviu en cata la noya i tós huntus se derihin a la elésia con música. Al acabihal la ceremónia se canta i valsa "la Ronda del roscón".

Vivan los recién casados
y el cura que los casó,
el padrino y la madrina
que a la iglesia los llevó.
Arribita, arribita
se crían flores,
y entre más arribita
más y mejores.
Más y mejores,
más y mejores, niña;
arribita, arribita
se crían flores.

Garganta "La Púria"

Enterés turísticu el Tornu

Pola su situación heugráficu esti puebru pudria llamalsi "Miraol del Valli", ya que se divisa la comarca en tola su ampritú, siguiendu la línia prateá i serpenteanti el riu, dendi Tornavacas a Praséncia.

El paisahi, pola su belleça, es tó un esplendol. Ena sierra la esuberanti vehetación da lugal a la hormación de frondosus i espesus bosquis de robris i guaperus abitaus pol gran cantiá d'especis animalis; polas laeras ahilan torrencialis gargantas d'áuguas frias i cristalinas; son parahis enos que los viaherus i vesitantis puein pasal dias enolvidabris. Nel hondu el valli, los remansus del riu son un lugal ideal pa bañistas, qu'al escurecel se dispersan polos merenderus assitiaus enas málhinis del riu.

Ena primaera los zerezus se llenan de froris i el valli paci cubiertu pol un ermosu mantu brancu. Pol estas fechas, la Mancomuniá e Monicípius del Valli celebra la Fiesta el Zerezu en Frol. Es un güen momentu pa vesital El Tornu. La caliá los proutus á dau pie a una rica gastronomia. Son pratus típicus las calderetas de cabritu, corderu i machorra, ensalás de patatas fritas i pimientus asaus, migas patateras, patatas escabechás, caldus de patatas, sopa e cachuela i patatas revolconas; gran varieá e durcis: perrunillas, rosas, buñuelus, turrillus, roscón, El quesu artesanal de cabra compreta la variá gastronumia. Tós ellus regaus con el esquisitu vinu e pitarra, aguardienti d'uva i zerezas, glória i licol de frambuesas.

El su folclori es mu ricu, resaltan las hotas i cancionis de ronda. Las fiestas mas popularis son: San Lucas, 18 d'Otubri, cola traicional matáncia e machorra, ronda el páharu al son de frauta i tamboril, i agasahu a los foriatus con perrunillas i vinu e pitarra; i la Vilhin la Pieá, 15 d'Agostu, destacandu l'Alborá i el Rosáriu l'Aurora, las verbenas popularis tiinin fama en tola comarca i atrain a murtitú e vesitantis.

Son lugaris pintorescus enos alreoris del puebru "El Mermehón", El Charcu Lobu, El Maten de los Coloraus; puyéndusi hazel escursionis i acampás a la Garganta la Púria, Las Vaqueriças, La Calamocha, La Huenti la Oveha i Los Camochus de la Gam, disfrutandu el agradabli clima, cristalinas áuguas serranas i ospitaliá torniega.

Huentis decumentalis

• Flores del Manzano, F., Historia de una comarca altoextremeña: el Valle del Jerte, Estitución Curtural El Brocense, Salamanca, 1985.
• Gutiérrez Macías, V., Retablo folclórico de la Alta Extremadura, Diputación Provincial de Badahó, Badahó, 1972.
• García Mogollón, F. J., "Viaje por los pueblos del Valle del Jerte; El Torno", Diáriu Extremadura, 5 d'Otubri e 1987.
• García Morgado, J., "Folleto sobre la leyenda del Tío Picote", en Izquierdo, A., El Padre La Calle, Madril, 1948.
• Madoz, P., Diccionario histórico-geográfico de Extremadura (tomo 4), Caçris, 1955.
• Sánchez Loro, D., Historias placentinas inéditas, Estitución Curtural El Brocense, Caçris, 1982.
• Sayans Castano, N., Artes y pueblos primitivos de la Alta Extremadura, Praséncia, 1957.
• Archivu Monicipal d'El Tornu.
• Archivu Parroquial d'El Tornu
• Archivu Estóricu Provincial de Caçris, Rial Audiéncia d'Estremaura, 1791
• Mapa topográficu nacional d'España, ohas nº 575 i 598.

Atihus

• Convivéncia nun sahurdón de cabrerus