Jeropeesk Parlemint

It Jeropeesk Parlemint is it iennichste orgaan fan de Jeropeeske Uny dat direkt keazen wurdt. De ferkiezings foar it parlemint wurde om de fiif jier hâlden.

De plenêrseal fan it Jeropeesk Parlemint yn Straasburch

De plenêrseal fan it Jeropeesk Parlemint yn Brussel

Skiednis

Fan 10 oant en mei 13 septimber 1952 hold de foarrinder fan de Jeropeeske Uny, de Jeropeeske Mienskip foar Koalen en Stiel, foar de earste kear in parlemintêre gearkomste. Dy gearkomste bestie út 78 nasjonale fertsjintwurdigers, dy't út de ûnderskate nasjonale parleminten keazen wienen.

Yn 1957 waard mei it Ferdrach fan Rome de Jeropeeske Ekonomyske Mienskip en de Euratom oprjochte. De parlemintêre gearkomste fan de Jeropeeske Mienskip foar Koalen en Stiel fertsjinwurdige tenei alle trije Jeropeeske Mienskippen en it tal sitten gong nei 142. De parlemintêre gearkomste krige gjin nije taken, mar neamde himsels al wol Jeropeesk Parlemint (yn 1986 waard dy namme pas erkend troch de lidsteaten).

Yn juny 1979 wurde foar it earst direkte ferkiezings foar it Jeropeesk Parlemint holden. Troch de ferdraggen fan ûnder oaren Maastricht (1992) en Amsterdam hat it Jeropeesk Parlemint mear foech krigen. It Jeropeesk Parlemint krige stadichoan hieltyd mear oerienkomsten mei parleminten fan nasjonale steaten.

Foech

Der binne trije haadsaken dêr't it Parlemint him mei dwaande hâldt; wetjouwing, finansiën en tafersjoch op de Jeropeeske Kommisje.

1. It Jeropeesk Parlemint is mei de Ried fan Ministers de wetjouwende macht fan de Jeropeeske Uny. It Parlemint kin Jeropeeske wetten (rjochtlinen, feroardenings, ensafh.) oannimme, feroarje of fersmite.
2. It Parlemint en Ministerrie beslisse tegearre oer de Jeropeeske begrutting.
3. It Parlemint jout goedkar en beneam leden fan de Jeropeeske Kommisje. It Jeropeesk Parlemint kin, as it moat, beslisse om alle leden fan de Jeropeeske Kommisje dien te jaan.

Gearstalling

It Europeesk Parlemint hat 705 sitten.

De sitferdieling fan it parlemint nei de Europeeske ferkiezings fan 2019:

Namme	Ingelske ôfkoarting	Tal sitten	Ideology
Europeeske folkspartij	EPP	177	Liberaal-konservatisme Kristendemokrasy Pro-Europa
Progressive Alliânsje fan Liberalen en Demokraten	S&D	145	Sosjaaldemokrasy
Alliânsje fan Liberalen en Demokraten foar Europa	Renew (ALDE)	102	Liberalisme Sosjaal-liberalisme Konservatyf liberalisme
De Grienen-Europeeske Frije Alliânsje	Greens-EFA	72	Griene polityk Regionalisme
Europa fan Frijheid en Demokrasy	ID (EFD)	65	Euroskeptysk Konservatisme
Erropeeske Konservativen en Reformisten	ECR	64	Konservatisme Anty-federalisme
Europeesk Unytêr Lofts/Noardsk Grien Lofts	GUE/NGL	39	Sosjalisme Kommunisme
Sûnder fraksje	NI	41
Vacant
Mei-inoar		705

Sitferdieling per lân

De sitferdieling sûnt 1 febrewaris 2020:

• Dútslân 96
• Frankryk 79
• Itaalje 76
• Spanje 59
• Poalen 52
• Roemeenje 33
• Nederlân 29

• Belgje 21
• Tsjechje 21
• Grikelân 21
• Hongarije 21
• Portegal 21
• Sweden 21
• Eastenryk 19

• Bulgarije 17
• Denemark 14
• Finlân 14
• Slowakije 14
• Ierlân 13
• Kroaasje 12
• Litouwen 11

• Letlân 8
• Sloveenje 8
• Estlân 7
• Syprus 6
• Lúksemboarch 6
• Malta 6

Lokaasje

It Jeropeesk Parlemint komt ien kear yn 'e moanne yn Straasburch byinoar foar in fjouwerdeiske plenêre gearkomste. Ekstra plenêre gearkomsten wurde yn Brussel hâlden. Dêr fine ek alle gearkomsten plak, fan de fêste parlemintêre kommisjes, dêr't plenêre stimmings tarieden wurde. It Siktariaat-generaal sit yn Lúksemboarch.

Net eltsenien is bliid mei dizze ferskillende haadstêden fan Jeropa. One Seat wol bygelyks alle funksjes yn Brussel ha.

Sjoch ek

• Nederlânske ferkiezings foar it Jeropeesk Parlemint

Keppeling om utens

• Offisjele webstee