José López Bouza
| Biografía | |
|---|---|
| Nacemento | febreiro de 1890  Ferrol, España |
| Morte | 30 de agosto de 1936 (46 anos) Canido, España |
| Causa da morte | paseo, ferida por arma de fogo |
 Presidente da Deputación da Coruña | |
| 23 de marzo de 1936 – xullo de 1936 (destitución) ← Estanislao Pérez Artime – Joaquín Otero Goyanes → | |
 Gobernador civil da provincia de Lugo | |
| 5 de agosto de 1931 – 21 de xullo de 1932 | |
 Gobernador civil da provincia de Ourense | |
| 17 de xuño de 1931 – 5 de agosto de 1931 | |
| Gobernador civil da provincia da Coruña | |
| | |
| Actividade | |
| Ocupación | político |
  | |
José López Bouza, nado en Ferrol en febreiro de 1890 e finado na mesma cidade o 30 de agosto de 1936, foi un político republicano galego que desenvolveu a súa carreira política no ámbito galego e morreu asasinado polos sublevados pouco despois de comezar a Guerra Civil.
Traxectoria
[editar | editar a fonte]Ao alcanzar a maioría de idade emigrou á Arxentina, lugar tradicional de destino da emigración galega. Alí vinculouse ao anarcosindicalismo, e foi expulsado do país en outubro de 1911. Tralo seu retorno a Galicia, conseguiu un posto de traballo como funcionario municipal na súa localidade natal, á vez que continuaba coa súa militancia anarquista. Así, foi un dos máximos impulsores do Ateneo Obrero Sindicalista e da Comisión Pro Enseñanza Racionalista ferrolá, e un dos impulsores do Congreso Internacional da Paz, convocado a comezos de 1915 para reunir a socialistas, sindicalistas, anarquistas e sociedades obreiras de todo o mundo para terminar a primeira guerra mundial[1]. Foi detido varias veces polas súas actividades sindicalistas. Con todo, uns anos despois, cara a 1918, evolucionaría ao republicanismo de centro. Fundou unha escola en Canido, un barrio obreiro de Ferrol, á que acudían tanto pícaros como persoas maiores de toda a comarca ferrolá. A escola seguiu en funcionamento ata ben entrada a década de 1920[2].
Membro da ORGA, coa proclamación da República (foi a persoa que izou a bandeira republicana no concello de Ferrol) foi nomeado gobernador civil de Ourense o 17 de xuño de 1931 e despois de Lugo o 5 de agosto, permanecendo no cargo ata o 21 de xullo de 1932[3].
Presidente da ORGA en Ferrol, e posteriormente de Izquierda Republicana, tralo triunfo da Fronte Popular en febreiro de 1936, foi nomeado presidente da Deputación Provincial da Coruña (23 de marzo de 1936) e concelleiro de Ferrol. Tamén participou na campaña para a aprobación do Estatuto de Autonomía de Galicia de 1936, para a que debuxou un cartel pedindo o voto, baixo o pseudónimo de Zeus. Trala súa aprobación foi elixido presidente do Comité central de Autonomía de Galicia, que viaxou a Madrid no verán de 1936 a presentar o Estatuto ás Cortes Españolas. Ao producirse o Golpe de Estado do 18 de xullo, López Bouza, rexeitando os consellos de Castelao, decidiu volver á cidade, participando na defensa do concello contra os sublevados (20 de xullo). Trala rendición do edificio foi detido e xulgado, sendo condenado a cadea perpetua e trasladado ao buque prisión Plus Ultra. Porén, foi sacado do buque e fusilado no barrio de Canido o 30 de agosto de 1936, xunto a outras 18 persoas.
Notas
[editar | editar a fonte]- ↑ "O Congreso Internacional da Paz de Ferrol". Arquivado dende o orixinal o 30 de setembro de 2007. Consultado o 14 de xaneiro de 2007.
- ↑ A Escola Racionalista de Ferrol (1933-1936) Arquivado 28 de setembro de 2007 en Wayback Machine., de Eliseo Fernández (Ateneu Libertário Francisco Iturralde, Ferrol)
- ↑ Recensión do libro Do anarquismo ao republicanismo. José López Bouza e o seu fillo o pintor José López Fernández Arquivado 03 de febreiro de 2007 en Wayback Machine., de Eliseo Fernández, na colección Documentos de Ediciós do Castro, ISBN 84-8485-069-2
Véxase tamén
[editar | editar a fonte]Bibliografía
[editar | editar a fonte]- Serrallonga i Urquidi, Joan (2007). "El aparato provincial durante la Segunda República. Los gobernadores civiles, 1931-1939" (PDF). Hispania Nova (7). Consultado o 20 de xaneiro de 2013.
Ligazóns externas
[editar | editar a fonte]- "A asociación López Bouza presentarase cunha mostra sobre a autonomía do 36", artigo de La Voz de Galicia, 30 de decembro de 2006.
- Guerra Civil e represión en Ferro e comarcaArquivado 30 de marzo de 2007 en Wayback Machine., de Xosé Manuel Suárez Martínez.
| Predecesor: Estanislao Pérez Artime |
Presidente da Deputación da Coruña 1936 |
Sucesor: Joaquín Otero Goyanes |
