På Romerike Biogassanlegg blir matavfall frå Oslo omdanna til biogass og gjødsel.
Bioenergi er energi som blir henta frå biomasse. Biomasse er materiale som kjem frå planter, dyr eller menneske. Ved, matavfall og bæsj frå dyr er døme på biomasse.
Ny biomasse blir laga heile tida. Derfor er bioenergi fornybar energi.
Menneska har brukt ved til å halde seg varme og lage mat sidan steinalderen. Bioenergi er derfor den første energikjelda i historia.
Biodrivstoff er drivstoff som er laga frå biomasse.
Det blir kalla første generasjons biodrivstoff, når det blir laga frå planter, som kjem rett frå åkeren. Døme er mais, kveite og raps.
Andre generasjons biodrivstoff er laga av restar frå dyr og menneske. Døme er biogass som blir laga av daude planter, bæsj frå husdyr eller resirkulert matavfall.
Biogassen kan ein bruke på same måte som naturgass.
Eit biokraftverk lagar elektrisk straum, ved å brenne biodrivstoff, til dømes biogass eller pellets.
Varmen får vatn til å koke, og vassdampen driv ein turbin. Ein turbin er ei maskin der vatn, damp eller gass, som er under trykk, får noko til å gå rundt.
Turbinen driv ein generator som lagar elektrisitet. Det finst i dag fleire biokraftverk i Noreg.
Bruk av bioenergi kan vere betre for miljøet der det erstattar olje eller kol. Biodrivstoff inneheld lite svovel og tungmetall.
Bioenergi kan òg føre til utslepp av farlege gassar eller svevestøv, til dømes i byar der ein fyrer mykje med ved om vinteren.
