1 1 Deemiꞌ pombeusuána toiheruna Iesu Kerisitu, muleákana Dáudiꞌ, muleákana Burahima. Kai Burahima tuke i Dáudiꞌ, hangaꞌnda toiheruna Iesu iamiꞌ: 2 Burahima mopaꞌara Isakiꞌ, Isakiꞌ mopaꞌara Iakoꞌ, Iakoꞌ mopaꞌara Iehuda hintuꞌ halálunaheꞌ, 3 Iehuda mopaꞌara Peresi hai Sera kai Tamara, Peresi mopaꞌara Hesro, Hesro mopaꞌara Raa, 4 Raa mopaꞌara Aminada, Aminada mopaꞌara Nahaso, Nahaso mopaꞌara Salomoni, 5 Salomoni mopaꞌara Boasi kai Rahabi, Boasi mopaꞌara Obeꞌ kai Ruti, Obeꞌ mopaꞌara Isái, 6 Isái mopaꞌara Datu Dáudiꞌ. Dáudiꞌ mopaꞌara Salomo kai tawinena Uria, 7 Salomo mopaꞌara Rehabea, Rehabea mopaꞌara Abia, Abia mopaꞌara Asa, 8 Asa mopaꞌara Iosapaꞌ, Iosapaꞌ mopaꞌara Iora, Iora mopaꞌara Usia, 9 Usia mopaꞌara Iota, Iota mopaꞌara Ahasi, Ahasi mopaꞌara Sikia, 10 Sikia mopaꞌara Manase, Manase mopaꞌara Amoni, Amoni mopaꞌara Iosia, 11 Iosia mopaꞌara Iekonia hintuꞌ halálunaheꞌ i tempó karatibenda toSáráeli i Bábeli. 12 Kai karatibenda toSáráeli i Bábeli, Iekonia mopaꞌara Seatie, Seatie mopaꞌara Serubabe, 13 Serubabe mopaꞌara Abihu, Abihu mopaꞌara Eliaki, Eliaki mopaꞌara Asori, 14 Asori mopaꞌara Sadoꞌ, Sadoꞌ mopaꞌara Akimi, Akimi mopaꞌara Eliu, 15 Eliu mopaꞌara Eleasa, Eleasa mopaꞌara Matani, Matani mopaꞌara Iakoꞌ, 16 Iakoꞌ mopaꞌara Iusu tomoanena Maria, to poánáka Iesu to rahangaꞌ Kerisitu. 17 Mewaliꞌ kai Burahima tuke i Dáudiꞌ, upu-upuna ara hampuloꞌ hai iba lápina. Kai Dáudiꞌ tuke i karatibenda toSáráeli i Bábeli hampuloꞌ hai iba lápina. Kai karatibenda toSáráeli i Bábeli tuke i karaꞌánákana Kerisitu, hampuloꞌ woꞌo hai iba lápina. 18 Laluta mokakihangaꞌi karaꞌánákana Iesu Kerisitu, hondee. Inaána iamiꞌ Maria, maróhómoꞌi karapasiáluꞌna kaina hambokona hai Iusu. Agáiáná hangko bomaniheꞌ hamboko, rombuaꞌmiꞌ wátána Maria. Karombuáꞌna wátána Maria iti mewaliꞌ kai kuasaꞌna Inao Magasaꞌ. 19 Iusu to ina mewaliꞌ tomoanena, iamiꞌ tauna to manóntó láluna. Mewaliꞌ kaina hambokonda iti, ina nakátumoꞌi mpebuni Iusu bona Maria tiꞌara malongkoꞌ i lindoꞌna tauna handaꞌ. 20 Tangaꞌna Iusu mampepekiri mokakihangaꞌi iti, mampáturuámiꞌ. I pampáturuána iti, Iusu manginta hadua malaꞌekána Pueꞌ to polaluta i ia, “Iusu muleákana Dáudiꞌ, bopoꞌi nupokalángáꞌ hamboko hai Maria; láwiꞌ ánáke to nakáláꞌeánga iti, mewaliꞌ kai Inao Magasaꞌ. 21 Maria ina moánáka hadua tomoane. Ánáke iti bateꞌna nupopohangaꞌ Iesu, láwiꞌ ina mosoreáka taunáNa kai dósánda.” 22 Hóndiꞌiti pewáliꞌna upu-upuna iti bona tepapósengimiꞌ to nahangaꞌ Pueꞌ melempó i galaraꞌNa, iamiꞌ, 23 “Hadua ánáke tawine ina rombuaꞌ wátána liaꞌ moánáka hadua tomoane. Ánáke iti ina rapopohangaꞌ Imanueli.” (Imanueli iamiꞌ basa Ibarani to mopáláiá “Pueꞌ Ala hingkakani hai kitaꞌ.”) 24 Peáróna Iusu, nalumaóhamiꞌ to nahangaꞌái malaꞌekána Pueꞌ. Iusu hamboko hai Maria. 25 Agáiáná hangko bomaniꞌ Maria moánáꞌ, Iusu tiꞌara moiluhi hai Maria. Liaꞌ i karaꞌánákana ánáke iti Iusu mampopohangaꞌ ánáke iti, Iesu.
© Bible.is, a ministry of Faith Comes By Hearing ®.