1 1 Ammula-mulanna, napancajini Puang Allata'ala langié sibawa linoé. 2 Naiya linoé, dépa natakkatoro' sibawa dépa gaga lise'na. Uwai maneng mupa natongko pettang kape'. Iyakia engkai Ruhna Allata'ala luttu-luttu ku iasé'na uwaié. 3 Makkedani Puang Allata'ala, “Uélorengngi engka tajang.” Na engka tongenni. 4 Naitani Puang Allata'ala makkeda makessing iyaro tajangngé. Purairo, Napassaranni tajangngé polé ku pettangngé. 5 Nalénni aseng iyaro tajangngé “esso”, naiyatosi pettangngé “wenni”. Labe'ni wennié na momponi éléé, iyanaro esso pammulangngé. 6 Makkedasi Puang Allata'ala, “Uélorengngi engka pallawangeng ku tengngana uwaié kuammengngi engka passarangngi uwaié ku iasé' sibawa uwaié ku iawa.” Na kajajiang tongenni makkuro. 7 Makkuniro mébbuni Puang Allata'ala pallawangeng iya passarangéngngi uwai iya engkaé ku iawana pallawangengngé sibawa uwai iya engkaé ku iasé'na. 8 Nalénni aseng iyaro pallawangengngé “langi”. Labe'ni wennié na momponi éléé, iyanaro esso makaduaé. 9 Makkedasi Puang Allata'ala, “Uélorengngi maddeppungeng ku séddié onrong uwai iya engkaé ku iawana langié, kuammengngi engka onrong marakko.” Na kajajiang tongenni makkuro. 10 Iyaro onrong marakkoé, Naléngngi aseng “pottanang”, naiyatosi uwai maddeppungengngé, Naléngngi aseng “tasi'”. Na naitani Puang Allata'ala makkeda makessing iyaro. 11 Makkedasi Puang Allata'ala, “Uélorengngi natuoi tanaé sakke' rupa wella, makkutopa sakke' rupa taneng-taneng sibawa aju-kajung iya makkébuaé.” Na kajajiang tongenni makkuro. 12 Makkuniro natuoini tanaé sakke' rupa wella, makkutopa sakke' rupa taneng-taneng sibawa aju-kajung iya makkébuaé. Na naitani Puang Allata'ala makkeda makessing iyaro. 13 Labe'ni wennié na momponi éléé, iyanaro esso makatellué. 14 Makkedasi Puang Allata'ala, “Uélorengngi engka pappécakka ku langié kuammengngi napasilaingengngi essoé sibawa wennié. Iyanaro matu' mancaji tanrang iya pattentuéngngi wettué, makkutopa essoé sibawa taungngé, 15 na nacakkaritoi linoé.” Na kajajiang tongenni makkuro. 16 Makkuniro mébbuni Puang Allata'ala dua pappécakka iya maloppoé, iyanaritu mataessoé iya kuasaéngngi essoé, sibawa kétengngé iya kuasaéngngi wennié. Naébbutoni wittuingngé. 17 Nataro manenni pappécakkaéro ku langié kuammengngi nacakkariwi linoé, 18 sibawa nakuasaiwi essoé, makkutoro wennié, napasilaingettoi cakkaé sibawa pettangngé. Na naitasi Puang Allata'ala makkeda makessing iyaro. 19 Labe'ni wennié na momponi éléé, iyanaro esso makaeppaé. 20 Makkedasi Puang Allata'ala, “Uélorengngi engka sakke' rupa balé sibawa anu tuo laingngé ku ilalenna uwaié, makkutoro manu'-manu'é iya luttué ku langié.” 21 Makkuniro naébbu manenni Puang Allata'ala rupa-rupanna baléé ku tasi'é, mappammula pommaloppoé narapi pobbiccu'é, makkutoro anu tuo iya laingngé ku ilalenna uwaié, sibawa iyamaneng rupa-rupanna manu'-manu'é. Na Naitani makkeda makessing iyaro. 22 Nainappa Nabarakkaki manenni makkeda, “Abbija-wijano kuammengngi tattamba maégako na mupennoiwi uwaié ku tasi'é. Na iko manu'-manu'é, Uélorettokko tattamba maéga ku linoé.” 23 Labe'ni wennié na momponi éléé, iyanaro esso makalimaé. 24 Makkedasi Puang Allata'ala, “Uélorengngi engka sakke' rupa olo-kolo' ku linoé, iyanaritu olo-kolo' iya makacuaé sibawa maliaé, iya eppaé ajéna sibawa makkalolo'é.” Na kajajiang tongenni makkuro. 25 Makkuniro naébbu manenni Puang Allata'ala rupa-rupanna olo-kolo'é, iya makacuaé sibawa maliaé, iya eppaé ajéna sibawa makkalolo'é. Na Naitani makkeda makessing iyaro. 26 Makkedasi Puang Allata'ala, “Makessingngi narékko mébbu-Ki' to lino iya pappada-padaé alé-Ta', kuammengngi aléna matu' kuasaiwi sininna baléé ku tasi'é, makkutoro sininna manu'-manu'é sibawa olo-kolo'é, na nakuasai manengngi linoé.” 27 Makkuniro na ipancajiwi to linoé ku Puang Allata'ala pappada-pada alé-Na.
Situru rupanna Puang Allata'ala ipancajiwi to linoé,
urané sibawa makkunrai. 28 Nainappa Nabarakkakini makkeda, “Abbija-wijano kuammengngi tattamba maégai ana' eppomu gangkanna mupennoi sibawa mukuasai linoé. Kuasaini baléé ku tasi'é, makkutoro sininna manu'-manu'é sibawa olo-kolo'é iya engkaé ku linoé.” 29 Makkedatoi Puang Allata'ala, “Itai, Ualéng manekko taneng-tanengngé sibawa buana aju-kajungngé mancaji anrému. 30 Naiyatosi sininna manu'-manu'é sibawa olo-kolo'é ku linoé, iyanaritu sininna anu makkényawaé, Ualéng manengngi rupa-rupanna wellaé sibawa daung-daungngé mancaji anréna.” Na kajajiang tongenni makkuro. 31 Nainappa naita manenni Puang Allata'ala sininna puraé Napancaji, na liwe' maneng kessinna Naita. Labe'ni wennié na momponi éléé, iyanaro esso makaennengngé.
© Bible.is, a ministry of Faith Comes By Hearing ®.