1 1 Innimi sila-silana Isa Masihi iamintu tuhusengna karaeng Daud nutuhusengna toꞌmi Ibrahim. 2 Ibrahimmi angnganakangi Ishak, na Ishak angnganakangi Yakub, na Yakub angnganakangi Yehuda siurang iangaseꞌ russanaꞌna. 3 Na Yehuda angnganakangi Peres na Zerah rua-ruana battu ri Tamar bahinenna. Na Peres angnganakangi Hezron, na Hezron angnganakangi Aram, 4 na Aram angnganakangi Aminadab, na Aminadab angnganakangi Nahason, na Nahason angnganakangi Salmon, 5 na Salmon angnganakangi Boas nubattu ri Rahab bahinenna. Na Boas angnganakangi Obed nubattu ri Rut bahinenna. Na Obed angnganakangi Isai, 6 na Isai angnganakangi Daud nuꞌkaraenga. Na Daud nuꞌkaraenga injo angnganakangi Sulaiman battu ri bate bahinenna Uria. 7 Na Sulaiman angnganakangi Rehabeam, na Rehabeam angnganakangi Abia, na Abia angnganakangi Asa, 8 na Asa angnganakangi Yosafat, na Yosafat angnganakangi Yoram, na Yoram angnganakangi Uzia. 9 Na Uzia angnganakangi Yotam, na Yotam angnganakangi Ahas, na Ahas angnganakangi Hizkia, 10 na Hizkia angnganakangi Manasye, na Manasye angnganakangi Amon, na Amon angnganakangi Yosia, 11 na Yosia angnganakangi Yekhonya siurang russanaꞌna ri hattunna tau Israil nipelaꞌ mange ri paꞌkaraengangna Babilonia. 12 Ri kunjona ri pammelakangna ri Babilonia na nianakangi Sealtiel ri Yekhonya. Na Sealtiel angnganakangi Zerubabel. 13 Na Zerubabel angnganakangi Abihud, na Abihud angnganakangi Elyakim, na Elyakim angnganakangi Azor, 14 na Azor angnganakangi Zadok, na Zadok angnganakangi Akhim, na Akhim angnganakangi Eliud, 15 na Eliud angnganakangi Eleazar, na Eleazar angnganakangi Matan, na Matan angnganakangi Yakub, 16 na Yakub angnganakangi Yusuf iamintu talliꞌna Maryam. Na Maryammi angnganakangi Isa, nunitallaꞌ-tallaꞌa Masihi. 17 Kamuami inni paꞌpakabodoangna sila-silaya: battu ri Ibrahim sanggenna Daud sampuloi angngappaꞌ lapisi. Na battu ri Daud sanggenna hattu nipelaꞌna mange ri Babilonia sampuloi angngappaꞌ lapisi todoꞌ. Na battu ri pammelakang mange ri Babilonia sanggenna Masihi sampulo toꞌi angngappaꞌ lapisi. 18 Naia ri sesena Isa Masihi pakunni kajariangna: nasabaꞌ hattunna Maryam anrongna sitalliꞌ Yusuf, ri anreꞌnapa nasiajang kaissengangmi angkua atianangi battu ri koasana Sumangaꞌ Ciꞌnonga. 19 Naia iYusuf talliꞌna napaꞌtappuꞌmi laꞌjaraeng sobbu-sobbu gara-gara ia tuannaba nampa pole andai napakasiriꞌ Maryam ri dallekangna tau tabbalaya. 20 Mingka ilalang aꞌnaha-nahaiji ri sesena injo natappaꞌ taꞌkaitteangmo seꞌre malekaꞌna Puanga ilalang soꞌna ampangkuaii: “E Yusuf tuhusengna Daud, jakomo mallaki angngallei Maryam anjari bahinennu, ka anaꞌ ilalang battangna nubattumi ri Sumangaꞌ Ciꞌnonga. 21 Na langnganakang sitau anaꞌ buruꞌne na nuarengmo Isa, nasabaꞌ iami lampakasalamaꞌi ummaꞌna battu ri dorakanna.” 22 Na iangaseꞌna injo anjari alleangna aꞌrupamo paꞌpasangna Puanga nunapalantea nabbia, 23 angkua: “Tojeꞌ, sitau tulolo nampa-nampa latianang na langnganakang sitau anaꞌ buruꞌne na laniareng Imanuel,” battuangna “Alla-taalami anrurungangki.” 24 Ri ambaungnamo Yusuf nagaukangmi situruꞌ nunisuroangai ri malekaꞌna Puanga, iamintu naallemi Maryam anjari bahinenna. 25 Mingka anreꞌ nasiampiꞌ ri anreꞌnapa naanakangi Maryam anaꞌ buruꞌne bungasaꞌna. Na naareng tojeꞌmi Yusuf lapung anaꞌ lolo injo Isa.
© Bible.is, a ministry of Faith Comes By Hearing ®.