1 1 Susulak ia tui la'e-neu Yesus Karistus, Hataholi fo Manetualain helu memak kana neme makahulun mai ndia fo sangga nadenun mai so. Ndia ndia, ba'i Abraham ma mane Dauk numbu-sadun. Mulai neme ba'i Abraham losa mane Dauk, hambu dope sanahulu haa. Susula bei-ba'ik kala sila naden, leo iak: Abraham anan Isak, Isak anan Yakob, Yakob anan Yahuda no ndia ka'a fadin nala, 3 Yahuda anan Peres no Sera (sila inan, nade Tamar), Peres anan Herson, Herson anan Ram, 4 Ram anan Aminadab, Aminadab anan Nahason, Nahason anan Salmun, 5 Salmun anan Bo'as (inan, nade Rahab), Bo'as anan Obet (inan, nade Rut), Obet anan Isai, 6 {6a} Isai anan Dauk. {6b-11} Neme Dauk mai losa faik ndia, hataholi nusa Israel nana fua henik leni Babel leu, hambu dope sanahulu haa bali, sila: Dauk anan Soleman (inan ndia, makahulun Uria saon). Soleman anan Rehabeam, Rehabeam anan Abia, Abia anan Asaf, Asaf anan Yosafat, Yosafat anan Yoram, Yoram anan Usia, Usia anan Yotam, Yotam anan Ahas, Ahas anan Heskia, Heskia anan Manase, Manase anan Amos, Amos anan Yosias, Yosias anan Yekonya ma ndia fadin nala, neu faik fo sila nana fua henik leni Babel leu. 12 Neu faik fo sila nana fua henik leni Babel leu losa Yesus, hambu dope sanahulu haa bali, sila: Yekonya anan Saltiel, Saltiel anan Serubabel, Serubabel anan Abihut, Abihut anan Elyakim, Elyakim anan Asor, Asor anan Sadok, Sadok anan Akim, Akim anan Eliut, Eliut anan Eliasar, Eliasar anan Matan, Matan anan Yakob, Yakob anan Yusuf. Yusuf ndia, sao nala Maria. Boe ma Maria bonggi nala Yesus Karistus. 17 De mulai neme Abraham mai losa Dauk, hambu dope sanahulu haa; neme Dauk mai losa sila nana fua henik leni Babel leu, hambu dope sanahulu haa; ma neme faik fo sila nana fua henik leni Babel leu, losa bonggi Karistus, hambu dope sanahulu haa. 18 Maria bonggi nala Yesus ndia, tutuin leo iak: Maria nafufudik no Yusuf so. Dua sala bei ta sunggu lakabubua leo masaok kala, naa te Maria nailu neme Manetualain Dula-dale Malalaon mai so. 19 Ledo-eik Yusuf bubuluk leo ndiak, boe ma ana sangga tao naketu sila dua sala natututin. Tehuu ta nau tao nakamamaek Maria nai hataholi no'uk matan nala, huu ndia dalen malalaok. Huu ndia de ana sangga tao naketun kada no nee-neek. 20 Ledo-eik ana bei dudu'a neu-mai, boe ma le'odaek esa ana nalame'i. Nai me'is ndia dalek, nita Manetualain ata nusa sodan mai nafadan nae, “Wei Yusuf! O ia, mane Dauk numbu-sadun. O boso makandaa sao mala Maria. Huu Kakanak manai ndia tein dale ndia, Manetualain Dulan tataon ndia. 21 Dei fo Maria bonggi kakana tou anak esa. Basa na, o musi foin nade Yesus, huu dei fo Ndia nasala'e nala Manetualain hataholin nala leme sila sala-singgon nala mai.” 22 Dei fo dede'ak ia dadi leo ndiak, huu Manetualain nafada memak kana neme makahulun mai so. Ana pake nitak Ndia mana kokolan Yesaya fo sulak nae, 23 “Ei mamanene baa! Dei fo ina anak esa bei ao-tema, naa te nailu. Basa de ana bonggi Kakana tou anak esa. Ala foin, nade Imanuel.” (Nai dede'a Ibrani, ‘Imanuel’ ndandaan nae: Manetualain no ita basa nggata.) 24 Yusuf nalame'i basa, boe ma ana fo'a. De ana tao tungga tutik Manetualain hehelun ndia. Ana ha'i nala Maria dadik neu ndia saon, 25 tehuu ta sunggu nakabubua noon leo masaok ia, losa Maria bonggi heni Kakanak ndia. Bonggi basa, boe ma Yusuf foi Kakanak ndia, nade Yesus.
© Bible.is, a ministry of Faith Comes By Hearing ®.