1 1 অহানবদা ঈশ্বরনা অতিয়া নোংদোন অমসুং মালেম শেম্বিরম্মী । 2 অদুবু মালেম অদু মওং নাইরমদে অমসুং ইহাঙ হাঙলম্মী । অদুদা অরুবা ঈশিংগী ঈমায়দা অমম্বা লৈরম্মী । অদুগা ঈশ্বরগী থৱায়না ঈশিং ঈমায়থক্তা খঞ্জিন্দুনা লৈরম্মী । 3 অদুদগী ঈশ্বরনা হায়খি, “মঙান লৈসনু”; মদুদা মঙান লৈখি । 4 ঈশ্বরনা মঙান অদু ফৈ হায়বা উরম্মী; অদুগা ঈশ্বরনা মঙান অদু অমম্বদগী খাইদোক্লম্মী । 5 ঈশ্বরনা মঙান অদু নুংথিল কৌখি, অদুগা অমম্বা অদু মহাক্না অহিং কৌখি, অদুদগী নুমিদাংৱাইরম অমসুং অয়ুক অদু অহানবা নুমিৎ ওইরম্মী । 6 অদুদগী ঈশ্বরনা হায়খি, “ঈশিংগী মরক্তা অহাঙবা অমা লৈরকসনু, মদুনা ঈশিংবু ঈশিংদগী খাইদোকসনু ।” 7 অসুম্না ঈশ্বরনা অহাঙবা অদু শেমদুনা মদুগী মখাদা লৈবা ঈশিং অদু অহাঙবা অদুগী মথক্তা লৈবা ঈশিংদগী খাইদোক্লে; মদু অদুম্না ওইখি । 8 ঈশ্বরনা অহাঙবা অদুবু অতিয়া কৌখি । অদুদগী নুমিদাংৱাইরম অমসুং অয়ুক অদু অনীশুবা নুমিৎ ওইরম্মী । 9 অদুদগী ঈশ্বরনা হায়খি, “অতিয়া নোংদোনগী মখাদা লৈবা ঈশিং পূম্নমক অদু মফম অমদা পূনশিনসনু অমসুং কংফাল উরকসনু”; মদু অদুম্না ওইখি । 10 ঈশ্বরনা কংফাল অদু মালেম কৌখি, অদুগা পূনশিল্লিবা ঈশিং অদু মহাক্না সমুদ্র কৌখি; অদুগা ঈশ্বরনা মদু ফৈ হায়বা উরম্মী । 11 অদুদগী ঈশ্বরনা হায়খি, “মালেম্না অশংবা পাম্বীশিং অমসুং মহৈ মরোং পানবা পাম্বী, মালেমদা মাগী মাগী জাৎকী মতুং ইন্না মহৈদা মরূ য়াওবা উপাল ৱাপালশিং থোকহনসনু”; মদু অদুম্না ওইখি । 12 অদুগা মালেম্না অশংবা পাম্বীশিং, মাগী মাগী জাৎকী মতুং ইন্না মহৈ মরোং পানবা পাম্বী অমসুং মাগী মাগী জাৎকী মতুং ইন্না মহৈদা মরূ য়াওবা উপাল ৱাপালশিং থোকহনখি; অদুগা ঈশ্বরনা মদু ফৈ হায়বা উরম্মী । 13 অদুদগী নুমিদাংৱাইরম অমসুং অয়ুক অদু হুম্নিশুবা নুমিৎ ওইরম্মী । 14 অদুদগী ঈশ্বরনা হায়খি, “অহিংদগী নুংথিল খাইদোক্নবা অতিয়া নোংদোনগী অহাঙবা অদুদা মঙানশিং লৈসনু । মখোয় অদু খূদমশিংগীদমক, কুম-থাশিংগীদমক, নুমিৎশিংগীদমক অমসুং চহীশিংগীদমক ওইসনু । 15 অদুগা মখোয় অদু মালেমদা মঙান পীননবা অতিয়া নোংদোনগী অহাঙবদা মঙান ওইনা লৈসনু ।” মদু অদুম্না ওইখি । 16 ঈশ্বরনা অচৌবা মঙান অনী শেম্বিরম্মী: নুংথিলগী মথক্তা পান্নবা হেন্না চাউবা মঙান অমা অমসুং অহিংগী মথক্তা পান্নবা হন্থবা মঙান অমা শেম্বিরম্মী; অদুগা মহাক্না থৱান্মিচাকিশংসু শেম্বিরম্মী । 17 মালেমদা মঙান পীনবা ঈশ্বরনা মখোয়বু অতিয়া নোংদোনগী অহাঙবদা থম্বিরম্মী, 18 মসি অহিং অমসুং নুংথিলগী মথক্তা পান্নবা, অদুগা মঙানবু অমম্বদগী খাইদোক্নবনি; অদুগা ঈশ্বরনা মদু ফৈ হায়বা উরম্মী । 19 অদুদগী নুমিদাংৱাইরম অমসুং অয়ুক অদু মরিনিশুবা নুমিৎ ওইরম্মী । 20 অদুদগী ঈশ্বরনা হায়খি, “ঈশিংনা অহিংবা জীব মরাং কায়না থোকহনসনু । অদুগা মালেমগী মথক্তা অতিয়া নোংদোনগী অহাঙবদা উচেক ৱায়া পাইসনু ।” 21 অসুম্না ঈশ্বরনা সমুদ্রগী অচৌবা জীবশিং অমসুং মাগী মাগী জাৎকী মতুং ইন্না ঈশিংনা মরাং কায়না থোকহনবা অহিংবা জীব খুদিংমক শেম্বিখি । অদুগা মহাক্না মাগী মাগী জাৎকী মতুং ইন্না মশা পানবা উচেক ৱায়া খুদিংমক শেম্বিখি; অদুগা ঈশ্বরনা মদু ফৈ হায়বা উরম্মী । 22 অদুগা ঈশ্বরনা মখোয়বু বোর পীদুনা হায়খি, “চাগোগ ফৌ, য়ামখৎচৌ অমসুং সমুদ্রগী ঈশিংদা থন্না লৈয়ু । অদুগা মালেমদা উচেক ৱায়া য়ামখৎসনু ।” 23 অদুদগী নুমিদাংৱাইরম অমসুং অয়ুক অদু মঙানিশুবা নুমিৎ ওইরম্মী । 24 অদুদগী ঈশ্বরনা হায়খি, “মালেম্না মাগী মাগী জাৎকী মতুং ইন্না অহিংবা জীব: শা শন, মপূক্না শিত্তুনা চৎপা জীব অমসুং লম্লক্কী শা, মাগী মাগী জাৎকী মতুং ইন্না থোকহনসনু”; মদু অদুম্না ওইখি । 25 ঈশ্বরনা মাগী মাগী জাৎকী মতুং ইন্না লম্লক্কী শা, মাগী মাগী জাৎকী মতুং ইন্না শা শন, মাগী মাগী জাৎকী মতুং ইন্না লৈপাক্তা মপূক্না শিত্তুনা চৎপা জীব খুদিংবু শেম্বিখি । অদুগা ঈশ্বরনা মদু ফৈ হায়বা উরম্মী । 26 অদুদগী ঈশ্বরনা হায়খি, “ঐখোয়না ঐখোয়গী মওংদা ঐখোয় মান্না মী শেমসি । অদুগা মখোয়না সমুদ্রদা লৈবা ঙাশিং, অতিয়াগী উচেক ৱায়াশিং, শা শন, মালেম পূম্নমক্কী মথক্তা অমসুং লৈপাক্তা মপূক্না শিত্তুনা চৎপা জীব খুদিংমক্কী মথক্তা পানসনু ।” 27 মরম অদুনা ঈশ্বরনা মীবু মহাকমক্কী মওংদা শেম্বিখি, ঈশ্বরগী মওংদা মহাক্না মী শেম্বিরম্মী । মহাক্না মখোয়বু নিপা অমসুং নুপী ওইনা শেম্বিরম্মী । 28 অদুদগী ঈশ্বরনা মখোয়বু বোর পীবিখি অমসুং ঈশ্বরনা মখোয়দা হায়খি, “নচা নশূ পোকচৌ অমসুং য়ামখৎচৌ । অদুগা মালেম থনহল্লু অমসুং মদুবু খুদুম চঞ্জৌ । অদুগা সমুদ্রদা লৈবা ঙাশিংগী, অতিয়াগী উচেক ৱায়া অমসুং মালেমদা চৎলিবা অহিংবা জীব খুদিংগী মথক্তা পাঞ্জৌ ।” 29 অদুদগী ঈশ্বরনা হায়খি, “য়েংউ, মালেম অপূম্বগী লৈমায়দা লৈবা মহৈ মরোং পানবা পাম্বী খুদিং অমসুং মহৈদা মরূ য়াওবা উপাল ৱাপাল খুদিং ঐনা নখোয়দা পীরবনি । মদু নখোয়গী চিঞ্জাক ওইগনি । 30 অদুগা অহিংবা জীব খুদিংদা, মালেমদা লৈবা লম্লক্কী শা খুদিংদা, অতিয়াগী উচেক ৱায়া খুদিংদা অমসুং লৈপাক্তা মপূক্না শিত্তুনা চৎপা জীব খুদিংদা অশংবা মনা মশীং খুদিং ঐনা মচীঞ্জাক ওইনা পীরবনি ।” মদু অদুম্না ওইখি । 31 অদুগা ঈশ্বরনা শেম্বিখ্রবা খুদিংমকপু মহাক্না য়েংলম্মী, অদুগা য়েংউ, মদু য়াম্না ফরম্মী । অদুগা নুমিদাংৱাইরম অমসুং অয়ুক অদু তরুক্নিশুবা নুমিৎ ওইরম্মী ।
© Bible.is, a ministry of Faith Comes By Hearing ®.