1 1 Ini tagnà awal jaman, pinoawn o Tuhan ini langit mokò iti logtà. 2 Tagnà iti logtà, indàdoga dagbos. Moingrong doga gotanan mokò limun doga dagat. Na ini gasi Oruwa o Tuhan, opogjaga siya sò soonu ini ponjodiyan, mogina hantang ini oglolayug opoulì-ulì kay libbuwat ngoni danum. 3 Onjadi kuwan o Tuhan, “Tolang no!” Na, timinglang koy. 4 Poglotog o Tuhan ngoni tolang, sarda piya ngoni, nomontukan siya. Onjadi binahagì yo ini moingrong mokò motolang, binaal yo oddow mokò gobi. 5 Sò motolang, binatong yo ini oddow, sò moingrong, binatong yo ini gobi. Onjadi bù no gumobi, pogtobos minoddow. Na, ini no kopoawn o Tuhan ngoni tagnà-tagnà nà oddow. 6 Pogtobos ngoni, ini kokoduwa ngoddow, kuwan o Tuhan, “Ini danum mobahagì. Ini sobahagì kay libbuwat, ini sobahagì kay sirib.” Na, ini koy ini pinonjodiyan, togò no olotan ini danum kay sirib mokò ini danum kay libbuwat. 8 Binotongan o Tuhan ngoni olotan doros. Onjadi bù no gasi gumobi, pogtobos minoddow. Na, ini no kopoawn o Tuhan ngoni kokoduwa ngoddow. 9 Pogtobos ngoni, ini kokotolu ngoddow, kuwan o Tuhan, “Holiyon ku ini danum kay sirib gaam togò logtà.” Na, ini koy ini pinonjodiyan. 10 Onjadi binotongan o Tuhan ngoni logtà binonuwa, ini gasi danum binotongan yo dagat. Poglotog o Tuhan nà nohalì no ini logtà mokò dagat, sarda piya ngoni, nomontukan siya. 11 Onjadi kuwan doga o Tuhan, “Poawn aku moboram jinisan nà tinanom, mogina hantang tirigu, padoy, mais mokò moboram koy jinisan nà kobuwà-buwaan.” Na, ini koy ini pinonjodiyan, 12 togò no timinubù moboram jinisan nà tinanom, tirigu, padoy, mais mokò moboram koy jinisan nà kobuwà-buwaan. Poglotog o Tuhan ngoni pinoawn yo, sarda piya ngoni, nomontukan siya. 13 Onjadi bù no gasi gumobi, pogtobos minoddow. Na, ini no kopoawn o Tuhan ngoni kokotolu ngoddow. 14 Pogtobos ngoni, ini kokopat ongoddow, kuwan o Tuhan, “Mopiya sò togò pongindanan ini oddow mokò gobi, kansa poawn aku kay langit oddow, bulan mokò mgò bituwon. Pagkamogini togò lantà sukù oddow mokò togò lantà sukù gobi. Onjadi ini lantà ini pongindanan kay solod sontoun ngoni mgò musim mokò sò kidan ini mgò dùa tuksù bulan.” Na, ini koy ini pinonjodiyan. 16 Pinoawn o Tuhan ini oddow, bulan mokò mgò bituwon. Ini oddow, molantà landù ini lantà yo, sukù waktù nà oddow. Ini gasi bulan, sodong-sodong ini lantà yo, sukù gobi. 17 Onjadi kansa dinàtun yo ini gotanan kay langit gaam togò lantà kati dunyà. 18 Pagkamogini togò no lantà sò oddow, mokò togò koy lantà sò gobi, mokò togò no pongindanan sò oddow otawa gobi. Na, poglotog o Tuhan ngoni mgò pinoawn yo ini, nomontukan siya sarda piya ngoni. 19 Onjadi bù no gasi gumobi, pogtobos minoddow. Na, ini no kopoawn o Tuhan ngoni kokopat ongoddow. 20 Pogtobos ngoni, ini kokolima ongoddow, kuwan o Tuhan, “Poawn aku moboram jinisan nà mgò onuso-onu nà boronyawa kay dagat mokò kay danum, sampay kay libbuwat.” 21 Onjadi pinoawn no o Tuhan ini sosuku boronyawa kay dagat mokò kay danum, sampay ini tondayag sodà mokò ini sosuku jinisan mgò bogit. Onjadi sida no ini pinogpuunan ngoni gotanan boronyawa kay solahap dagat mokò kay danum, sampay kay libbuwat. Na, poglotog o Tuhan ngoni pinoawn yo ini nomontukan siya, sarda piya ngoni. 22 Onjadi binorokatan o Tuhan ini mgò hayup ini gaam mogkoboram. Kuwan yo, “Pogkoboram kow, okow nà sosuku kana dagat mokò kana danum, lahapà muyu ini dagat mokò danum. Sampay okow nà mgò bogit, mogkoboram kow koy, lahapà muyu iti dunyà.” 23 Onjadi bù no gasi gumobi, pogtobos minoddow. Na, ini no kopoawn o Tuhan ngoni kokolima ongoddow. 24 Pogtobos ngoni, ini kokonom ongoddow, kuwan o Tuhan, “Poawn aku kay dunyà moboram jinisan nà boronyawa, ini mgò moipat mokò indìkoy, ini mgò ogpanow mokò ini opogunanap. Onjadi kay no konda mogpuun ini gotanan mgò hayup solahap kay logtà.” Na, mogini koy ini pinonjodiyan, 25 pinoawn koy o Tuhan ini gotanan jinisan hayup kati logtà, ini mgò moipat mokò indìkoy, ini mgò ogpanow mokò ini ogunanap. Onjadi kay no konda nogpuun ini gotanan nà mgò hayup solahap kati logtà. Na, poglotog o Tuhan ngoni mgò hayup, nomontukan siya, sarda piya ngoni. 26 Na, inapo kuwan o Tuhan, “Kitoy no, poawn kitoy monusiyà ini manggid dagbos toy. Ini monusiyà ini, bogoyan toy siya kowasa. Siya ini kungrong sosuku boronyawa, ini kay dagat, kay danum, kay libbuwat mokò kay logtà, moguwop mokò mokolag.” 27 Onjadi pinoawn koy o Tuhan ini monusiyà, sombilug lolaki mokò sombilug libun minanggid dagbos yo. 28 Pogtobos binorokatan yo sida, kuwan yo, “Pogkoboram kow, okow mokò mgò ponubù muyu, molahap muyu iti dunyà. Okow nà mgò monusiyà, subay okow ini mobayà ngoni sosuku boronyawa, ini kay dagat, kay danum, kay libbuwat mokò kay logtà.” 29 Kuwan doga o Tuhan joni monusiyà, “Dongogà muyu! Ini tuksù okonon muyu, ini onuso-onu nà ogtutubù, mogina hantang tirigu, padoy, mais mokò ini mgò jinisan nà kobuwà-buwaan, dikow ini. 30 Ini gasi tuksù okonon sukù ngoni mgò jinisan kohoyup-hoyupan kati logtà mokò kay libbuwat, konda ini gotanan ilomunon mokò mgò doun.” Na, mogini koy ini pinonjodiyan. 31 Pogtobos ngoni, poglotog o Tuhan ngoni gotanan nà pinoawn yo, nomontukan siya landù sarda piya ngoni. Onjadi bù no gasi gumobi, pogtobos minoddow. Na, ini no kopoawn o Tuhan ngoni kokonom ongoddow.
© Bible.is, a ministry of Faith Comes By Hearing ®.