Catalògna
Catalògna (in Catalàn: Catalunya; Spagnoeu: Cataluña; Occitan: Catalonha), l'è ona comunità autonoma del Regn de Spagna. L'area de la comunità autonoma de la Catalògna l'é 32,114 km² e la populazion ufiziala l'é 7,210,508, al 12.3% hinn imigraa. La confina con la Francia e Andorra a nord, Aragona a ovest, con la comunità de Valensia a sud, e cont el mar Mediterani a est.
I lengov ofiziai hinn Catalan, Spagnoeu, Aranes e Ocitan. La capital l'è Barcelona.
El president de la Catalògna l'è Carles Puigdemont, quell del Parlament l'è la Carme Forcadell e l'inn l'è Els Segadors.
Stòria
La Catalogna, dal 718, l'è stada sota 'l controll di arab, ma poeu in del 801 i Carolingg liberen el territori.
Despoeu, la Corona de Aragona e quella Catalana se unissen, anca se resten cont i different govern. Quel paes lì el diventa vun di pussee important in Europa.
Fin ai Borbon, la Catalogna l'è rimanuda ligada a la Castiglia, ma semper assee libera e cont i sò legg.
El Re Filipp VI, vist el sostegn catalan ai Asburgh, aboliss i istituzion catalan e l'è sminuida la lengua catalana.
In de la Segonda Republega Spagnoeula, la Catalogna l'ha ciapaa de noeuv la sò autonomia, e 'l catalan l'è tornà lengua offiziala.
El regim franchista, inveci, ha abolii tucc i libertà del paes, tant da mett illegal el catalan.
In del 1975 i catalan han deciduu de toeu part a la formazion de la democrazia spagnoeula, e la Catalogna l'è stada on motor progressista del Stat spagnoeu.
Independentism
|
Per savenn pussee, varda l'articol Indipendentism catalan. |
In Catalogna in del 2010, dopo del recors del governo del Mariano Rajoy contra del Statut d'Autonomia de la Catalogna del 2006, assee autonomista e che 'l definiva la Catalogna "nazion del Stat spagnoeu", a l'è nassuu on fort moviment independentista, che l'ha faa on referendum consultiv in sul futur politich de la Catalogna in del 2014 e l'ha vinciuu i elezion catalan del 2015 cont la lista Junts pel Sì che l'ha formaa on governo guidaa del Carles Puigdemont insemma al partii de estrema manzina CUP.
'Sto governo l'ha faa on referendum vincolant in su l'independenza, minga recognossuu de la Spagna.
Politica
La Catalogna la fa part del Regn de Spagna.
El statut de la nazion definiss el paes 'me "nazion", donca da di possibilità indipendentist o, almanch, autonomist.
Parlament e govern
- El Parlament de Catalunya l'è el parlament catalan. El pò avegh da 100 a 150 parlamentar.
- La Presidència de la Generalitat l'è el president del paes, el gh'ha el poder esecutiv, e l'è el pussee volt rappresentant de la Spagna in Catalogna.
- El Consell Executiu el gh'ha on tocc del poder esecutiv.
Partit
I partit catalan hinn:
- Partit Demòcrata Europeu Català
- Esquerra Republicana de Catalunya
- Partit dels Socialistes de Catalunya
- Partit Popular Català
- Iniciativa per Catalunya Verds - Esquerra Unida i Alternativa
- Ciutadans - Partit de la Ciutadania
- Candidatura d'Unitat Popular
Ai elezion del 2012, el parlament l'era componuu inscì:
Giustizia
Polizia
In Catalogna, el servizzi de Polizia l'è principalment faa de la Comunità: In tutta la Catalògna a gh'è el corp di Mossos d'Esquadra, gestii localment, anca se di voeult la polizia spagnoeula la fa di intervent. A Barcelona a gh'è anca la Guardia Urbana.
I Parch e i zon naturai de la Generalitat a hinn protegiuu del Cos d'Agents Rurals.
Tribunai
La giustizia a l'è per la pupart gestida del Stat, l'orghen pussee volt in la Comunità a l'è el Tribunal Superior de Justícia de Catalunya. La reforma del Statut del 2006 l'avaria faa del TSJC la massima istanza di process catalan, reforma poeu scassada del Tribunal Costituzional spagnoeu.