Claudia Kohde-Kilsch

Claudia Kohde-Kilsch (* 11. Dezember 1963 in Saarbrücken) is en ehmolige düütsche Tennisspelerin. Kohde is ehr Nanaam vun Geboort an, Kilsch is de Naam vun ehrn Adoptiv-Vadder.

Claudia Kohde-Kilsch, 2012

Claudia Kohde-Kilsch hett mit fief Johr mit’t Tennisspelen anfungen un as Deern al Spood in disse Sportoort hatt. Se harr al en Saarland-Meesterschop, en Düütsche Meesterschop un en Jöögd-Europameesterschop wunnen un weer as saarlännsche Sportlersche vun’t Johr wählt, bevör se na de Profis wesselt is. Ehr hööchste Platzeeren in de Enkelt-Weltranglist weer de Nummer veer, de se in’n September 1985 innahmen hett. Fief Johr lang hett se sik ünner de Top Ten hollen un tellt dormit to een vun de spoodrieksten Tennisspelerinnen vun Düütschland.

Kohde-Kilsch hett tosamen mit Bettina Bunge ok’n Tiet lang in’t Dubbel speelt. Later is se tosamen mit ehr mehrjohrige Partnersche Helena Suková bit op de tweeten Weltranglistensteed kamen un tell mit to de afsluten Weltspitz. Bi de Olypmsche Spelen 1988 in Seoul hett se mit Steffi Graf in’t Dubbel speelt un mit ehr tosamen de Bronzemedaille wunnen. Butendem hett se 1987 – wedder tosamen mit Steffi Graf – an’n eersten Winn vun’n Federation Cup för Düütschland deelhatt.

Claudia Kohde-Kilsch hett twüschen 1983 un 1987 mit Helena Suková negenteihn Dubbelturneren wunnen, dorünner ok Wimbledon un de US Open. Enkelt hett se dorna bi Grand-Prix-Turneren in Birmingham (1988) un Kitzbühel (1990) wunnen. Na en Reeg vun Sehren hett se sik Mitt vun de 1990er Johren jümmer wieter ut’n Profi-Sport torüchtogen un sik mehr op de Tennis-Bundsliga vun de Fornslüüd konzentreert. Mit ehrn Vereen Blau-Weiß Saarlouis is se ok noch mol Düütsche Mannschopsmeestersche worrn.

Leven

In hüütige Tiet leevt se tosamen mit ehrn Ehmann, den Singer un Musikproduzenten Chris Bennett, un ehrn Söhn in’t Saarland. Se leidt weltwiet Tennis-Camps vun de Firmengrupp ever-court un bedrifft tosamen mit ehrn Mann den Musikverlag un de Produkschoonsfirma CeKay-music, de ok en egen Toonstudio ümfaat. 2006 hett se sik för de Football-Weltmeesterschop vun de Minschen mit Behinnern in Düütschland stark maakt un den Text to de offizielle WM-Hymne „We have a dream“ bistüert, de vun Amy Elaine sungen worrn is.

Kohde-Kilsch muss 2011 Privatinsolvenz anmellen. Se bezichtigt hör Steefvader un dormaligen Manager, groot Deelen vun hör Vermögen veruntroet to hemm. De Prozess, de se af 1999 över mehrere Instanzen gegen hör Steefvader führen dee, wurr 2004 bi de sien Dood instellt.

Bi de Wahl vun den Bundspräsidenten 2012 wurr se vun de Partei Die Linke as Vertrederin in de Bundsversammlung schickt. Vör de Landdagswahl vun dat Saarland an’n 25. März 2012 is Kohde-Kilsch aktiv as Wahlkämperin för Oskar Lafontaine un Die Linke uptreden; dorbi keem de Partei up 16,1 Perzent (Gröönen 5,0 %). To'n 1. Mai 2012 wurr se Sprekerin vun de Landdagsfraktschoon.

Websteden

• WTA-Profil vun Claudia Kohde-Kilsch
• Websteed vun Claudia Kohde-Kilsch