Massendood vun Kanungu

Bi den Massendood vun Kanungu hebbt sik üm un bi 500 Lüüd, de Anhängers vun de Bewegung för dat Wedderherstellen vun Gott sien teihn Botten (Movement for the Restoration of the ten commandments of God) weren, an’n 17. März 2000 in ehr Kark in Kanungu in Uganda inslaten, de denn in de Luft gahn is.

Vörgeschicht

Joseph Kibwetere, en in’t Johr 2000 68 Johren olen fröheren Lehrer, de as manisch-depressiv gell, harr na egene Utsaag en Gespreek twischen Jesus un Maria mitanhöört, in dat de beiden klagen, dat de Welt vun de teihn Botten affallen weer un dat dat Jüngste Gericht to de Johrdusendwenn över de Eer kamen schall. He sammel denn vele Anhängers üm sik, de den Glöven an de Apokalypse mit em delen.

Ok Credonia Mwerinde, 48 Johren oolt, harr Visionen vun de Jungfro Maria hatt, as se de Nyabugoto-Höhlen besöken dei. 1989 harr se Kibwetere un den sien Fro Teresa dat eerste Maal drapen. Kibwetere hett ehr inladen bi em in sien Huus in Ntungamo intotehn. 1990 hebbt se denn ehr Bewegung grünnt un harrn 1991 al 200 Anhängers. 1993 weren Mwerinde un Kibwetere en Poor un sünd mit nu al 5.000 Anhängers op en Grundstück vun fief Hektar bi Kanungu tagen. Kibwetere sien Fro is to disse Tiet mit de Kinner aftagen, ehr weer dat allens toveel.

In Kanungu is denn ok Dominic Kataribabo, en Preester, den se ut de Kark rutsmeten harrn, dortokamen. He weer vun disse Tiet an de Nummer dree in de Sekt.

De eenfachen Maten müssen in de Sekt swore Arbeit doon. Se dröffen nich mitenanner snacken oder Schoh dragen, kregen wenig to eten un müssen op den Bodden slapen. De Kinner weren trennt vun de Öllern, ok Ehlüüd dröffen kenen Sex hebben un eerst recht weer Kuntakt to frömme Lüüd, de nich to de Sekt hören, verbaden. Ok müssen de Maten all ehren Besitt verköpen un dat Geld de Sekt tokamen laten.

Doch an’n 31. Dezember 1999, den Dag vun de vörhersaagte Apokalypse, weer nix los. Welke Lüüd hebbt de Sekt verlaten. Annere sünd bleven un hebbt Antwoorten vun de Grünners wullt. Vun disse Lüüd sünd vele – dat is later, na den Vörfall in de Kark, rutkamen – in Massengräver lannt. Woll so 500 Mann.

Kibwetere un Mwerinde hebbt de Lüüd denn seggt, dat se Naricht vun Maria hebbt, dat de Apokalypse nich utfallen is, de is blots verschaven. Se schull nu an’n 17. März kamen. De 500 Anhängers, de noch över weren, hebbt sik an dissen Dag in de Kark versammelt. De Dören hebbt se dicht maakt, denn blots ’keen in disse veer Wänn weer, schull dat Jüngste Gericht överleven.

Denn hebbt welke Lüüd – ’keen dat weer, is nich kloor – 40 Liter Swevelsüür in Water kippt. De Reakschoon löös en groten Füürball ut, de de kumplette Kark uteneenreten hett. Alle Lüüd in de Kark weren dood. 330 verkohlte Lieken kunnen identifizeert warrn, doch de Opteknungen vun de Sekt düüd dorop hen, dat dat mehr as 500 Minschen weren.

Mit över dusend Dode weer dat Schehn bi disse Bewegung de gröttste kultische Massenmoord je.

Gegen Kataribabo, Kibwetere, Mwerinde un en poor annere Anföhrers vun de Sekt sünd internatschonale Haftbefehlen utstellt worrn. Kataribabo sien Liek hebbt se bi de Doden funnen, doch vun Kibwetere un Mwerinde hebbt de Schandarmen nix funnen. Nüms weet, ob se dood sünd oder ob se sik doch na de Demokraatsche Republiek Kongo afsett hebbt, wat vun Kanungu nich wiet is. Mwerinde ehr Auto weer weg, tominnst een Person is also utbüxt.