Richard Michael Mullane

Richard Michael „Mike“ Mullane (* 10. September 1945 in Wichita Falls, Texas) is en ehmalger US-amerikaansch Astronaut.

Utbillen un Berop

Mullane kreeg 1967 en Bachelor in Militärtechnik vun de Westpoint-Militärakademie un 1975 en Master in Luftfohrttechnik vun dat Air Force Institute of Technology.

Van Januar bit November 1969 hett Mullane 150 Kampinsatzen as Phantom-4C-Waffensystemoffizier in Vietnam flagen. Nah en veerjohrig Statschoneeren in Grootbritannien wurr he nah en entspreken Utbillen as Floogtüüchtest-Wappensystemoffizier up de Eglin Air Force Base in Florida einsett.

Astronautentätigkeit

In' Januar 1978 wurr Mullane vun de NASA as Astronautenanwärter utwählt.

STS-41-D

Bi sien eerst Ruumfloog weer Mullane Missionsspezialist up den Jumfernfloog vun de Ruumfähr Discovery an' 30. August 1984. Mit Utnahm vun den Kommandanten Hank Hartsfield weern he un de anner veer Besattenliddmaaten (Micheal Lloyd Coats]] (Pilot) un de Missionsspezialisten Judithe Arlene Resnik, Steven Alan Hawley un de Bruuklastspezialist Charles David Walker) allesamt bi hör eerste Mission. Wiels de söss Daag lang düern Mission wurrn de dree Satelliten SBS-D, SYNCOM IV-2 (ok bekannt as LEASAT 2) un Telstar 3-C utsett. Buterdem wurr dat OAST-1-Solarzellenexperiment un dat Experiment CFES-III to dat Utforschen vun dat Kristallwasdom dörführt. Dorneben wurrn ok Upnahmen mit en mitführt IMAX-Kamera maakt. Mit den Roboterarm vun den Shuttle mussen wiels de Mission gefährlich Iesplatten vun den Orbiter afmaakt wurrn.

STS-62-A

STS-62-A sull in' Juli 1986 as eerste Shuttle-Mission vun den Space Launch Complex 6 up de Vandenberg Air Force Base starten. Bob Crippen harr de Discovery up de eerste Shuttle-Mission up en polaren Orbit ör dat US-Ministerium för’t Verdeffenderen kommandeeren sullt. De Crew sull neben Crippen ut Guy Spence Gardner, Dale Allan Gardner, Richard Mullane, Jerry Lynn Ross as ok den Militärastronauten John Brett Watterson (MSE) un den Politiker Edward Cleveland Aldridge bestahn. De Floog wurr afseggt, nahdem sück dat US-Ministerium för’t Verdeffenderen nah dat Challenger-Unglück ut dat Shuttle-Programm torüchtruck. Ok later is kien Shuttle mehr vun de Vandenberg Air Force Base losflagen.

STS-27

An' 2. Dezember 1988 is Mullane mit de Ruumfähr Atlantis to de Mission STS-27 start. Hööftteel vun disse Mission ünner Kommandant Robert Lee Gibson weer dat Utsetten vun den militärischen Upklärenssatelliten Lacrosse 1. Guy Spence Gardner un Jerry Lynn Ross weern ut de afseggt Mission STS-62-A dorbi. Dorto keem William McMichael Shepherd.

STS-36

Mullane is an' 28. Februar 1990 mit de Ruumfähr Atlantis to'n darten un letzten Mal in't All start. Kommandant vun disse Mission weer John Oliver Creighton un de Pilot John Howard Casper. David Carl Hilmers un Pierre Joseph Thuot weern de anner Missionsspezialisten neben Mullane. Wiels de Mission wurr en geheim Satellit vun de US-Luftwappen in en leegen Orbit utsett, vun wo ut de digitale Upklärenssatellite den gröttsten Deel vun de Eerdböverflach överwaaken sull.

Nah de NASA

Nah sien Utscheeden ut de NASA un de Air Force in' September 1990 hett sück Mullane as professioneller Redner un Schriever sülvstständig. Sien eerst Roman „Red Sky: A Novel of Love, Space, & War“ keem in' Juni 1993 herut.

Bibliografie

• Riding Rockets: The Outrageous Tales of a Space Shuttle Astronaut, Verlag: Charles Scribner's Sons ISBN 0-7432-7682-5
• Red Sky: A Novel of Love, Space, & War, Verlag: Northwest Publishing ISBN 1-56901-111-7
• Do Your Ears Pop in Space and 500 Other Surprising Questions about Space Travel, Verlag: John Wiley & Sons ISBN 0-471-15404-0
• Liftoff!: An Astronaut's Dream, Verlag: Silver Burdett Press ISBN 0-382-24664-0

Privates

Richard Mullane is verheiraadt un hett dree Kinner.

Weblenken

Richard Mullane. Mehr Biller, Videos oder Audiodateien to’t Thema gifft dat bi Wikimedia Commons.

• www.mikemullane.com (engelsch)
• NASA: Biografie (engelsch)
• spacefacts.de: Körtbiografie