Katharina Molitor

Katharina Molitor (fødd 8. november 1983) er ein tysk tidlegare friidrettsutøvar frå Bedburg i Nordrhein-Westfalen som deltek i spydkasting. Ho vart verdsmeister i øvinga under VM i friidrett 2015. Molitor vart tysk meister i 2010 og 2015.

Katharina Molitor
Statsborgarskap	Tyskland
Fødd	8. november 1983 (40 år) Bedburg
Idrett	friidrett, volleyball
Tok del i	Sommar-OL 2008, Sommar-OL 2012

Aktiv

Molitor sette i mai 2008 personleg rekord med 61,74 m under eit stemne i Halle. Ho vart utteken til sommarleikane i Beijing, der ho vart nummer åtte. Den 25. juni 2010 forbetra ho den personlege rekorden til 64,53 m på heimebana i Leverkusen, og fire veker seinare vart ho tysk meister i Braunschweig med eit bestekast på 64,27 m. Under europameisterskapen i Barcelona enda ho med 63,81 m på fjerdeplassen. Sommaren 2011 flytta ho sitt personbeste i øvinga med 14 cm til 64,67 m i Kassel. Tre veker seinare vart ho nummer fem i VM i Daegu, same plasseringa fekk ho i EM året etter, medan ho i London-OL kom på sjetteplassen.

Sommaren 2015 var Molitor i sitt livs beste form. I juli månad forbetra ho den personlege rekorden til 66,40 m då ho vann DL-tevlinga i Luzern. Veka etter vart ho i Nürnberg tysk meister for andre gong med eit kast på 65,40 m. Den 30. august 2015 smelte ho til med heile 67,69 m i siste omgangen under friidretts-VM i Beijing, og vann gullmedaljen framom den kinesiske heimfavoritten Lü Huihui. Under friidretts-EM 2016 enda Molitor som nummer fire.

Medaljar og plasseringar i internasjonale meisterskap

• OL 2008 i Beijing: Nr 8 – 59,64 m
• EM 2010 i Barcelona: Nr 4 – 63,81 m
• VM 2011 i Daegu: Nr 5 – 64,32 m
• EM 2012 i Helsinki: Nr 5 – 60,99 m
• OL 2012 i London: Nr 6 – 62,89 m
• VM 2013 i Moskva: Utslått i kvalifiseringa (60,32 m=nr 13)
• EM 2014 i Zürich: Nr 9 – 58,00 m
• VM 2015 i Beijing: Gullmedalje – 67,69 m, framom Lü Huihui (66,13 m)
• EM 2016 i Amsterdam: Nr 4 – 63,20 m
• VM 2017 i London: Nr 7 – 63,75 m
• EM 2018 i Berlin: Utslått i kvalifiseringa (58,00 m=nr 15)

Kjelder

• Denne artikkelen bygger på «Katharina Molitor» frå Wikipedia på tysk, den 11. juli 2016.
• Denne artikkelen bygger på «Katharina Molitor» frå Wikipedia på engelsk, den 11. juli 2016.