Robert Emmijan
| Robert Emmijan | |
|
| |
| Verkeleg namn | armensk Ռոբերտ Էմմիյան |
| Statsborgarskap | Sovjetunionen, Armenia |
| Fødd | 16. februar 1965 (59 år) Gjumri |
| Idrett | friidrett |
| Tok del i | Sommar-OL 1996, Sommar-OL 1988 |
| Utmerkingar | Idrettens mester i Sovjetunionen |
Robert Emmijan (fødd 16. februar 1965) er ein armensk tidlegare lengdehoppar, fødd i Leninakan i Armenske SSR i Sovjetunionen, som representerte Sovjetunionen og, frå 1992, Armenia. Han vart europameister i lengdehopp under EM 1986 i Stuttgart, og tok VM-sølv i 1987. Emmijan er eigar (2014) av europarekorden på 8,86 m.
Aktiv
[endre | endre wikiteksten]Vinteren 1986 vann Emmijan lengdehopp-tevlinga i innandørs-EM i Madrid med 8,32 m. Gjennom sommarsesongen 1986 viste han ved fleire høve at han var den beste lengdehopparen i Europa. Den 6. juli sette han europarekord med 8,61 meter i eit stemne i Moskva. Han vann så gullmedaljen under friidretts-EM i Stuttgart på ny meisterskapsrekord; 8,41 m.
I 1987 tok Emmijan sølvmedaljen i verdsmeisterskapen i Roma etter eit hopp som målte 8,53 m, Carl Lewis frå USA vann gull med 8,67 m, medan hans landsmann Larry Myricks fekk bronse med 8,33 m. Tidlegare i sesongen, 22. mai 1987, hadde Emmijan hoppa heile 8,86 m på høgfjellsbana Tsachkadzor i Armenia, berre fire cm kortare enn den då 19 år gamle verdsrekorden til Bob Beamon. Resultatet er framleis europarekord i 2014.
Under sommar-OL 1988 i Seoul skada Emmijan seg i kvalifiseringa. Nokre månader seinare vart heimen hans i Gjumri lagd i ruinar under jordskjelvet i Spitak 1988. Far hans omkom i jordskjelvet. Hendinga kom til å prege Emmijan i åra etter, og han nådde aldri sidan ein finale i dei store meisterskapane.
Etter at Sovjetunionen vart oppløyst konkurrerte Emmijan frå 1992 for Armenia, mellom anna i VM i Göteborg. Han slutta konkurrere i 1997.
Emmijan bur i Frankrike.
Medaljar og plasseringar i internasjonale meisterskap
[endre | endre wikiteksten]- EM 1986 i Stuttgart: Gullmedalje – 8,32 m
- VM 1987 i Roma: Sølvmedalje – 8,53 m, bakom Carl Lewis (8,67 m)
- OL 1988 i Seoul: Skadd i kvalifiseringa
- VM 1995 i Göteborg: Nr 11 – 7,77 m
- OL 1996 i Atlanta: Utslått i kvalifiseringa (7,76 m - nr 28)
Kjelder
[endre | endre wikiteksten]- Denne artikkelen bygger på «Robert Emmijan» frå Wikipedia på tysk, den 7. september 2014.
- Denne artikkelen bygger på «Robert Emmiyan» frå Wikipedia på engelsk, den 7. september 2014.
- «Robert Emmiyan» (på engelsk). Olympedia. Henta 8. mars 2023.