Genesis

Genesis
Genesis Pittsburghist ive 2007
Tiäđuh
Aktiivlâžžân	1967–1999, 2006–2007, 2020–2022
Stijlâšlaajâ	progressiivlâš rock poprock (1980-lovvoost)
Päikkisaje	Ovtâstum kunâgâskodde
Lávlumkielâ	eŋgâlâskielâ
Ovdiih jesâneh	Peter Gabriel, laavlâ, huilo (1967–1975) Phil Collins, ruumbuh, laavlâ (1970–2022) Tony Banks, kuoskâttâsčuojânâsah (1967–2022) Mike Rutherford, basso, kiitaar (1967–2022) Steve Hackett, kiitaar (1971–1977) tievâslâš listo

Genesis lii ive 1967 vuáđudum eŋlandlâš rockjuávkku.

Historjá

Peter Gabriel Torontost ive 1974.

Käldee: allmusic.com

Genesis vuáđudáin lávloo Peter Gabriel já kuoskâttâsčuojâtteijee Tony Banks. Algâalgâlâš čuojâtteijeejuávhust lijjii meid Mike Rutherford (basso), Anthony Phillips (kiitaar) já Chris Stewart (ruumbuh), kiän sajan poođij jo ive 1968 John Mayhew. Juávkku almostitij vuosmuu album From Genesis to Revelation ive 1969, mut folk-stiljâsâš album ij finnim ennuvgin huámmášume. Čuávuváá ive juávkku raahtij sopâmuš viehâ uđđâ Charisma Recordsáin, já roovvâdmáánust almostui sii nubbe album Trespass. Veik album lâi vala-uv viehâ folk-stiljâsâš, lijjii ton muusikist jo muálkkááh jiešvuođah já pitáh-uv lijjii jo kuhebeh. Gabriel teatterlâš lávlumstijlâ lâi meid uáli jo tehálâš.

Trespass maŋa kyehti jeessân vuolgijn juávhust. Mayhew sajan poođij Phil Collins, kii meid lávluškuođij motomijn juávhu pittáin. Ovdil ko juávkku rähtiškuođij uđđâ album Nursery Cryme, lávdástempalo tiet ovdeláá juávhust vuálgám Anthony Phillips sajan poođij kitarist Steve Hackett. Nursery Cryme almostui skammâmáánust 1971 já veik totkin ij miänástum kávpálávt pyereest, lâi juávhust Eŋlandist jo uccâ aktiivlâš kuldâleijeejuávkku. Čuávuvâš album Foxtrot (1972) miänástui jo viehâ pyereest, ko tot pajanij Britannia listo sajan 12 já ovdâmerkkân Italiast joba listo njunošân. Juávhu miänástus raijâšui kuittâg-uv tuše Euroopân já Foxtrot ij ovdebij albumij naalijn finnim ennuvgin huámmášume Ovtâstum staatâin. Album siskeeld kuhes pittáid, mii lii aaibâs táválâš progressiivlâš rockist. Tain tobdosumos lii "Supper's Ready", mii pištá paijeel 20 minuttid. Juávkku kulostui meid láávdástmijn, main jiešvuođâlâš lijjii Gabriel smiŋkkâ sehe omâs pihtâseh, maid sun lonottij maŋgii oovtâ konsert ääigi. Gabriel meid mainâstij konsert pitái kooskâst mainâsijd, moh čonnii pittáid oohtân. Juávkku almostitij vuosmuu live-albumis Genesis Live ive 1973 syeinimáánust.

Siämmáá ive roovvâdmáánust almostum Selling England by the Pound aneh tááláá ääigi ohtân progressiivlâš rock merhâšitteemuin albumijn. Ton pitáh kieđâvušeh eŋlandlâš aalmugkulttuur jäämmim sehe ameriklâš kulttuur vääldi šoddâm. Album siskeeld ovdâmerkkân Tony Banks iänááš nuotâstem "Firth of Fifth" sehe singlen-uv viehâ pyereest miänástum "I Know What I Like (In Your Wardrobe)". Album pajanij pyeremustáá Britannia listo kuálmád sajan, já tot lâi meid juávhu vuosmuš album Ovtâstum staatâi listoost. Čuávuvâš The Lamb Lies Down on Broadway (1974) lii tublealbum sehe konseptalbum, mii maainâst ovtâskâsčuággásâš mainâš, mon uáivihuáđđon lii New Yorkist ässee puertoricolâš Rael. Album pajanij Britanniast sajan 10, Suomâst sajan 17 já Ovtâstum staatâin sajan 41.

The Lamb Lies Down on Broadway lâi Genesis progressivlâš rock -paje čokke, mut siämmást jorgáldâhsaje juávhu historjást. Ive 1975 Peter Gabriel vuolgij juávhust já ko juávkku ij finnim kosten uđđâ lávloo suu sajan, te Phil Collins sirdâšui uáivilávlon. Čuávuvâš album A Trick of the Tail (1976) ij iäránâm radikaallávt Gabriel-paje muusikist, mut tast muusik lâi jo váhá oovtkiärdánub, tegu eres-uv progressiivlâš rock juávhuin 1970-lovo loopâst. A Trick of the Tail lâi juávhu tuáistáážân pyeremustáá kávpálávt miänástum album, já tot pajanij Britanniast sajan 3 já Ovtâstum staatâin jo sajan 31. Siämmáá ive almostui meid nubbe album Wind & Wuthering, mii pajanij Britannia listo sajan 7 já Ovtâstum staatâin sajan 26. Kuohtuuh albumeh pajanii Suomâst top 20 -liiston. Ive 1977 juávkku almostitij EP Spot the Pigeon sehe live-album Seconds Out.

Wind & Wuthering almostittem maŋa kitarist Steve Hackett vuolgij juávhust. Suu sajan ij puáttám uđđâ čuojâtteijee já basist Mike Rutherford čuojâtškuođij studiopaddiimijn meid kiitaar. Collins, Banks já Rutherford rahtii uđđâ album ...And Then There Were Three..., mii almostui ive 1978. Album lâi jo viehâ čielgâsávt pop-stijlâsâš. Juávkku finnij stuorrâ kávpálâš miänástuš albumijguin Duke (1980), Abacab (1981) já Genesis (1983), moh pajanii Britannia listo njunošân sehe maailmvijđosávt viehâ alda listokeeji. Albumijn lijjii meid miänástum singleh, ovdâmerkkân "Turn It On Again" (UK#8), "Mama" (UK#4) já "That's All" (US#6).

Genesis kávpálávt enâmustáá miänástum album Invisible Touch almostui ive 1986. Tot pajanij Britannia listo njunošân já ovdâmerkkân Suomâst sajan 2 já Ovtâstum staatâin sajan 3. Single "Invisible Touch" pajanij sehe Britannia ete Ovtâstum staatâi listo njunošân. Ovtâstum staatâi Top 5 -liston pajanii meid eres album A-pele pitáh "Tonight, Tonight, Tonight", "Land of Confusion" já "In Too Deep". Veikkâ Genesis 1980-lovo albumijn progressiivlâš rock vaikuttâs lâi ain já ain ucceeb, lijjii albumijn meid motomeh kuhebeh pitáh, ovdâmerkkân "Duke's Travels" Dukest já "Domino" Invisible Touchist.

Genesis čuávuvâš album We Can't Dance almostui eskin ive 1991. Ovdil tom Collins lâi juátkám miänástum soolokarrieeris, já eres-uv juávhu jesâneh lijjii almostittâm soolomateriaal. Tot pajanij Britanniast listo njunošân já Ovtâstum staatâin sajan 4. Ive 1996 Collins almottij, ete sun vuálgá juávhust. Banks já Rutherford meridáin pääcciđ, já uđđâ lávlon väljejui Ray Wilson. Genesis almostitij majemuu albumis Calling All Stations ive 1997. Album ij finnim ennuvgin mielâstumvuođâ, já tot lâi Selling England by The Pound almostittem maŋa hyenemusávt kávpálávt miänástum Genesis-album Ovtâstum staatâin. Britanniast tot kuittâg-uv pajanij listo nube sajan. Juávkku lávdástâlâi Euroopist ive 1998 mut Tave-Ameriik turnee ij olášum. Ive 2000 Rutherford and Banks almottij ete juávkku pieđgâniččij.

Mike Rutherford, Phil Collins já Tony Banks ive 2022.

Ive 2006 Collins, Banks já Rutherford almottij uđđâ turneest. Meid Peter Gabriel lâi tárguttâs leđe fáárust, mut ij puáhtám eres projektij tiet uásálistiđ. Turnee Euroop uási aalgij Helsig olympiastadionist 11.6.2007 já nuuvâi rijjâkonsertân Rooma Circus Maximusist. Turneest almostui live-album Live over Europe 2007.

Ive 2009 Collins almottij, ete ij innig puávtáččij suáttiđ ruumbuid čielgioođâváádu tiet.

Genesis peesâi Rock and Roll Hall of Famen ive 2010. Juávkku almottij ive 2020 uđđâ turneest skammâ-juovlâmáánust, mut ton alga sirdâšui čohčâmáánun 2021 koronaviruspandemia tiet. Turnee majemus konsert lâi Lontoo O2-areenast njuhčâmáánu 26. peeivi 2022. Collins almottij, ete konsert lâi siämmáást majemuš Genesis konsert. Collins saajeest ruumbuid čuojâttij suu 18-ahasâš Nicholas-kandâ, já tiervâsvuođâtiles tiet Collins ij puáhtám čuážžuđ já kaartâi lávluđ stoovlist.

Diskografia

• From Genesis to Revelation (1969)
• Trespass (1970)
• Nursery Cryme (1971)
• Foxtrot (1972)
• Selling England by the Pound (1973)
• The Lamb Lies Down on Broadway (1974)
• A Trick of the Tail (1976)
• Wind & Wuthering (1976)
• ...And Then There Were Three... (1978)
• Duke (1980)
• Abacab (1981)
• Genesis (1983)
• Invisible Touch (1986)
• We Can't Dance (1991)
• Calling All Stations (1997)

Jesâneh

• Peter Gabriel – laavlâ, huilo (1967–1975)
• Phil Collins – ruumbuh (1970–1996, 2006–2007), laavlâ (1975–1996, 2006–2022)
• Tony Banks – kuoskâttâsčuojânâsah (1967–2022)
• Mike Rutherford – basso (1967–2022), kiitaar (1977–2000)
• Steve Hackett – kiitaar (1971–1977)
• Anthony Phillips – kiitaar (1967–1970)
• Mick Barnard – kiitaar (1970–1971)
• Chris Stewart - ruumbuh (1967–1968)
• John Silver – ruumbuh (1968–1969)
• John Mayhew – ruumbuh (1969–1970)
• Ray Wilson – laavlâ (1996–2000)

Fáádást eres soojijn

• Wikimedia Commonsist láá koveh teikkâ eres tiätuvuárháh fáádást Genesis.