singularis (grammatikk)

Singularis er i grammatikken det same som eintal. Bøyingsformene gut, guten og jente, jenta er singularis, i motsetnad til gutar, gutane og jenter, jentene, som er pluralis (fleirtal)

Singularis er eit trekk i den grammatiske kategorien numerus (tal). På norsk bøyer vi både substantiv, adjektiv, perfektum partisipp, pronomen og determinativ i numerus. Mange språk bøyer også verbet i numerus — til dømes engelsk:

• The girl goes to school. 'Jenta går på skulen.'
• The girls go to school. 'Jentene går på skulen.'

I dei fleste språk som har den grammatiske kategorien numerus, står singularis berre i motsetnad til pluralis, men mange språk har dualis (total) i tillegg.