Buguruslan

Buguruslan (ven.: Бугурусла́н, tot.: Богырыслан) om Venäman lidn da lidnümbrik Orenburgan agjan lodehes. Se om Buguruslanan rajonan administrativižeks keskuseks, ei mülü rajonha.

Buguruslan
Бугуруслан

Lidnanznam
Valdkund	Venäma
Eläjiden lugu (2020)	48,546 ristitud
Pind	76,46 km²
Pämez'	Dmitrii Djačenko (viluku 2020—)
Telefonkod	+7−35 352-xx-xxx
Avtokod	56
Aigvö	UTC+5 (MSK+2)

Istorii

Eländpunktan aluz om pandud vl 1748. Se sai makundan lidnan statusad vl 1781. Ühtennimine Buguruslan-raudtestancii radab «Samar — Uf»-jonol vspäi 1888.

Buguruslan šingotase kivivoin da gazan samižen i ümbriradmižen edheotandoil vspäi 1936, kivivoimašiništon pästandan tegimel, meblin kahtel privatižel fabrikal, mugažo sömtegimišton edheotandad ratas (lihakombinat, jauhkombinat, maidtegim, limonadan i mineraližen veden edheotand).

Geografijan andmused

Lidn sijadase Sur' Kinel'-jogen (ven.: Большой Кинель, tot.: Олы Кенәле, Volgan hurapol'ne bassein) da sen huran Konduzl-ližajogen (ven.: Кондузла) kaikil randoil, Bugul'man da Belebein ülüden suvipautkil, 80 m ü.m.t. keskmäižel korktusel.

Matkad Orenburghasai om 270 km suvipäivnouzmha orhal vai 355 km avtotedme. Lähembaine lidn om Pohvistnevo (Samaran agj) 22 km päivlaskmha kaikil teil, järedad lidnad — Samar 165 km päivlaskmha avtotedme i Oktäbr'skii 135 km pohjoižpäivnouzmha avtol.

Tobmuz

Kaik nell' pen't žilod da kaks' raudtesarakod mülüdas lidnümbrikho Buguruslanan ližaks. Lidnümbrikon pind — 76,46 km².

Edeline lidnümbrikon pämez' (Administracijan pämez') om Vladimir Ber (Владимир Бэр, keväz'ku 2013 — viluku 2020). Lidnümbrikon Deputatoiden Nevondkundan ezimez' om Väčeslav Kvašnev vn 2013 kül'mkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 49 741 ristitud, lidnümbrikon — 50 226 ristitud. Kaik 49 585 eläjad oli lidnas i 50 004 eläjad kaikes lidnümbrikos vl 2017. Lidnan ristitišt vajehtihe 49..55 tuhad röunoiš vll 1970−2018, kaikiš suremb oli 55 400 rist. vl 2000.

Rahvahad (enamba 1 % vl 2010, ozutadud rahvahudenke): venälaižed — 67,1 %, totarlaižed — 10,3 %, mordvinalaižed — 10,0 %, ukrainalaižed — 1,6 %, saksalaižed — 1,3 %, toižed rahvahad — 9,7 %.

Professionaližen opendusen aluzkundad: Buguruslanan kivivoin kolledž, pedagogine kolledž, civiližen aviacijan lendimškol (kolledž, Piterin civiližen aviacijan universitetan filial), maižanduztehnikum, Orenburgan agjan medkolledžan filial, mugažo Samaran tehnižen universitetan filial.

Galerei

• 
  Lidnan alusenpanendan znam vl 2018
• 
  Kivine časoun' (ortodoksine hristanuskond), vn 2018 nägu
• 
  Lidnan islaman pühäpert', nägu vn 2006 sügüz'kus
• 
  Nevondkundaline lidnanznam (vspäi 1982)
• 
  Buguruslanan dramteatr N. Gogolän nimed (2015)
• 
  Buguruslan-päraudtestancijan sauvuz vl 2009

Irdkosketused

• Municipaližen «Buguruslan-lidn»-ühtnikan tobmuden aluzkundoiden oficialine sait (bugadmin.orb.ru). (ven.)