Istwere del bire

Pådje so l' istwere del bire

Li cervoejhe

Loukîz a : cervoejhe

Elle a stî edvintêye po n’ nén taper evoye les grins (di frumint u d’ oidje) k’ estént djermés. On lzès broyive, et î radjouter totes sôres di yerbêyes et di spéces (li gru) et minme del låme. Li maxhot esteut « forayî » (cût tot doûçmint e for).

E l' Mîtrinne ådje

C’ est les abeyess ki rprindnut l’ bressaedje. Et todi avou des plantes pol gosse, mins sins houbion.

Mins, po bressî, i lzî fåt l’ åjhmince do rwè. C’ est pa ç’ papî la k’ on sait k’ on fjheut del bire a a l’ abeye d’ Ône (Gouzêye), et dins les moustîs d' Lobe, di Florefe, a di Malône ey d' Salzene.

Mins, e 12inme sieke, la k’ les moennes ni volnut pus bressî. Come i shûvnut tertos les « rîles sint Benoet » i doeynut boere do vén, l’ abwesson ucaristike. Adon, c’ est les veyes ki metnut a drame des bressenes. Dinant et Hu les prumires. Nameur shût avou nouv bressenes e 1265. Come les moléns et les fors, les « tchambes bresreces » sont banåves. Dj’ ô bén k’ ele apårtegnnut ås signeurs.

Radjoutaedje do houbion

Li radjoutaedje do houbion a cmincî e l’ Almagne e 12inme sieke (a Bingen, sol Rén å raeze del Grande Dutcheye). I s’ va spåde totavå, ca les bires å houbion si wådnut pus lontins (sacwants samwinnes). C' est a ç' moumint la k' ele si lome « bire » e francès.

Li môde do houbion wangne li Holande e 14inme sieke. Li bire å houbion li pus cnoxhowe dins les Bas Payis, c’ esteut li « Goutse cuyte ». Ele vineut d’ Gouda, come si alomåcion el dit bén. Pu passer a Anverse. Did la a Nameur, la k’ on trouve si no e 1388, ey a Bovegne e 1399.Histoire de la bière

A Nameur, ele va wårder li vî no di « cuyte », riwalnijhî a « keute ».

Tins modienes

Li nombe di bressenes crexhe rade. A Nameur, end a 15 e 1530, 20 e 1600, 33 e 1642. Mins l’ industreye a dandjî d’ claire aiwe. Dabôrd ki, so les minmes trevéns, gn a todi dpus d’ taenreyes, ki sont foirt mannixhantes po les ptits ris come li Hoyou. Adon, li produjhaedje va-st ebaguer tot rmontant Sambe. Did la, li « rowe des bresseus » (dedja la e 15inme sieke).

Pitchote a midjote, tot cwerant del prôpe aiwe, les bressenes si vont aler djîstrer dins les campagnes. C’ est li cminçmint des « frankès tavienes » (a Soye, a Tamene, a Tîne-dilé-Dinant, a Parfondveye).

Pu les bresseus tchoezixhnut purade li Principåté d' Lidje, la k’ i gn a nole taeye. C’ est l’ kiminçmint del bressene d’ Ougår.

Gn a minme des « bressenes volantes » ki bodjnut d’ on viyaedje a l’ ôte po vinde leu prodût pus åjheymint, come a Tamene e 1637.

C’ est a ç’ moumint la (17inme sieke) ki l’ bire rivént dins les abeyes. Mins å sieke d’ après, li bire piede ene miete di s’ succès a cåze di l’ arivêye do peket et do brandvén.

Redjime francès

Do redjime francès, on conte 338 bressenes e dipårtumint d' Sambe-et-Mouze e 1804. End a, metans, a Måtche ey å Bork.

19inme sieke

Li 19inme sieke voet ariver li machene al wapeur, ki va permete l’ industriyalijhaedje des bressenes. Gn a todi dpus d’ djins a-z abuvrer. C’ est l’ nexhance di rlomêyès bressenes k’ egzistêynut co pol djoû d’ ouy, come li cene di Purnôde (1860) u l’ cene d’ Ôrvå (1920).

Les bresseus fwaiynut les tournêyes avou des camions (bassès tcheretes saetcheyes pa des tchvås). Il î tcherdjént puvite des toneas.

20inme sieke

Tins del guere di 14, les Almands vont ramasser les keuves. Adon,

Après l' guere di 14, les ptitès bressenes ont disparexhou. C' est l' nexhance des grossès societés come li «Vî-tins » ([[Mont-Sint-Wubert), li Stella-Artois (Lovén) u l' Djoupeyire Djoupeye (1966). Les deus si vont rmete eshonne, pu al fén do sieke, esse ratchtêye pa les Braezilîs d' Inbev.

21inme sieke

Li môde des microbressenes s' a spårdou foirt rade. Totes les rebanêyes comenes ont sayî d' bressî ene bire avou ene etikete da leur. Li lomaedje e walon n' est nén råle, come:

• li tiestowe (tiestuwe) (Belfontinne-e-l'-Årdene)
• Mareye Clape-shabots (Poitchrece-e-l'-Årdene)
• Li Pirire di Lîssin (Lîssin)
• L' ôrnwesse (Mont-Sint-Wubert)