Sistinme Feller-Léonard

Li sistinme Feller-Léonard, c' est on radaptaedje do sistinme Feller ås uzances des scrijheus do payis d' Nameur.

Istwere

I fourit bén håyné dins l' motî Léonard. Po rexhe ci live la, Lucien Léonard aveut stî lontins aspalé pa Jean Guillaume.

Kékès piceures do sistinme

Contråvmint ås atuzes ortografikes atåvlêye pa Feller, li sistinme Feller-Léonard wåde sacwants digrafes:

• li scrijha aî, ki rprezinte li son ê (/ɛː/). Bråmint d' ces mots la si scrijhnut e rfondou walon avou l' betchfessî ai.
• li scrijha au, ki mostere on long O å lådje, k' on trouve dins des mots ki vont esse rifondous avou l' betchfessî å (aube, aumaye, i faut). Adon, les mots avou l' rastrindou long O sont todi scrîts avou li scrijha ô (ôte, on pô, on côp, on trô). Li rîle a stî shuvowe e rfondou walon, çou ki dna li betchfessî ô.

I wåde li scrijha en pol son an (/ɑ̃/), dins les mots calkés do francès (c'è-st-on lîve en walon, deûs centimètes di spècheû).

I rprind èn atåvla da Louis Remacle di scrire li shuvion naziåle + N avou on pont sol roye (samwin.ne, plin.ne, djon.nelè, one on.ne, man.nèt, An.nevôye).