南宋

中国历史系列文章
史 前 时 代			旧石器时代
			中石器时代
			新石器时代
			黄河文化				长江文化
传说时代 （三皇五帝）
夏 约前21世纪–约前16世纪
商 约前17世纪–约前11世纪
周 前11世纪 | 前256			西周 前11世纪–前771
			东周 前770–前256			春秋 前770–前476
						战国 前476–前221
秦 前221–前207 西楚 前206–前202
汉 前202 | 220			西汉 前202–8
			新 8–23
			玄汉 23–25 东汉 25–220
三国 220–280			魏 220–265			吴 229–280		蜀汉 221–263
晋 265-420			西晋 265–316
			东晋 317–420			十六国 304–439
南 北 朝 420 | 589			宋 420–479			北魏 386–534
			齐 479–502
			梁 502–557 后梁 555–587			西魏 535–557		东魏 534–550
			陈 557-589			北周 557–581		北齐 550–577
隋 581–619
唐 618–907 武周 690–705
五代十国 907–979						辽 (契丹) 916–1125 西辽 1124-1218		定难军 881–982 西夏 1038-1227
宋 960 | 1279			北宋 960–1127
			南宋 1127–1279			金 1115-1234
大蒙古国 1206–1271 元 1271–1368 北元 1368–1388
明 1368–1644 南明 1644–1662
后金 1616–1636 清 1636–1912
中华民国 1912至今
中华民国 （台湾）						中华人民共和国 1949至今
中国历史年表

南宋是中国历史中古时期个一个朝代，迭个政权是宋帝国来勒靖康之耻后动荡个结果，创立人是宋徽宗个第九个儿子康王赵构,从1127年一直持续到1276年蒙古人攻陷临安，到1279年崖山战役后，畀忽必烈个蒙古帝国彻底灭脱。南宋拿首都（官方称谓是行在)摆勒临安，让杭州成为邪气繁荣个城市，南宋辰光，南方个经济稳定繁荣，社会发展迅速。

国号

南宋个国号，是直接沿用宋朝个国号个，来勒南宋存在个辰光，并弗存在南宋迭个名称，之所以冠南字，是后头个人，为拿迭个流亡到杭州，统治淮河以南个政权搭老早首都来勒汴京个原有宋朝廷区分，加上去个。

统治集团

南宋搭历史浪个东晋一式一样，是一个流亡政权。弗过因为时代弗一样，伊拉进入吴越个辰光，当地已经嘸东晋初年个吴姓士族势力抵抗。当地个新型士大夫，侪因为科举个原因，采取搭赵宋统治集团合作个态度，只有因为战争关系，立在早期有过一些有实力个军阀人物。弗过，个批人，立在之后十几年之内，也侪畀慢慢削平哉。

赵宋皇族

靖康之变对赵宋统治集团是邪气大个打击。因为立在金国攻陷汴京过程中，拿太上皇宋徽宗、皇帝宋钦宗搭宋徽宗所有个儿子，侪捉到北面去。所以赵宋个嫡系，生下来个就只有康王赵构一个人哉。又因为扬州兵变，赵构丧失生育能力，所以，赵宋家族，只好寻宋太祖个后代，继承皇帝个位置。从南宋个历史来看，赵宋皇亲国戚个权力是弗大个，但分支比较发达。立在泉州等地，侪有上千人居住。远房个亲戚还有赵汝愚这种做到宰相个。

流兵军头

北宋实行禁军制度，权力侪立在中央个禁军手里，导致战斗能力低下。因为女真战争个原因，禁军制度立在南宋初年是基本弗存在个，宋高宗只好依靠一些立在战乱当中自家发展起来个势力对金国进行抵抗。个当中，有好几个人物成为大型军阀，比方讲有名个中兴四杰： 张俊、刘光世、韩世忠搭岳飞就侪是个种出生。伊拉自家有交关私人军队，自家个士兵不晓得朝廷号令，唯独听从主将个指示。这些军队，一直畀赵宋朝廷当做心腹大患。立在稳定政权之后，便开始慢慢剥除。岳飞是挨末一个畀做脱个，岳飞个死也标志伊拉势力个基本结束。

文官士大夫

南宋延续北宋个传统，大开科举考试，又因为北面个疆域侪立在金国境内，所以又客观上消除老早个南北歧视问题，让南方人，邪气是东南地区个吴越、闽越搭江右人，完全掌握晋升机会。南宋辰光吴越地区士大夫众多，邪气是湖州、衢州等地，繁荣程度比之后个明清辰光更加明显。这点也让吴越地区个知识分子搭地主有盼头，弗像老早东晋辰光介明显个排斥土著。所以，吴越地区士大夫对南宋朝廷个支持度一直蛮高，双方个关系也算历朝历代当中顶顶好个。

历史

详见：南宋历史 南宋个历史，具体从靖康之耻开始算，一般到崖山海战算作终结，一共持续一个半世纪个辰光。

建立搭动荡

靖康之耻后，金人来勒中原扶植老早个宋朝大臣张邦昌做皇帝，弗过并没获得士绅个支持，还遭到普通老百姓个痛恨，金国人撤走之后，张邦昌只好借孟太后个名义，下诏书，让宋徽宗个唯一没畀捉个儿子：康王赵构继承宋王朝个皇位。。靖康两年（公元1127年）五月一号，康王赵构来勒商丘（个辰光叫做应天府）正式登基做皇帝，伊就是后来个宋高宗。弗过，伊手里向掌握个实际实力并弗多，为平衡权利，只好安抚张邦昌，讲伊护国有功，拿伊封做王。高宗即位个第二年，女真人又讲张邦昌被废脱，损害伊拉个利益，重新南下到中原地区。随后，来勒1129年，女真人又拿刘豫拥立做皇帝，国号齐，作为代理人，加强自家来勒黄河以南个统治。残余个宋朝军队开始向北攻击，获得过一些胜利。 宋高宗来勒金国人个追踪下一路南窜，有段辰光还逃到海浪，弗过，吴越地区个老百姓侪邪气反对女真人个残暴，另外，岳飞韩世忠等地方将领迅速崛起，也让女真人屡屡受挫。到1130年代后，女真人已经退回江淮地区，随后，南宋屡次战胜女真人。宋高宗总算拿伊个朝廷稳定下来，伊下诏升杭州做自家个“行在”。确立宋帝国南迁个基础，到1130年代末，伊任命秦桧做丞相，向女真人发出求和信号。同时，压制内部将领个指挥权，伊先后接触抗金将领韩世忠搭岳飞个兵权，到第二年，又用莫须有个理由，拿岳飞抓牢，随后杀脱，别个实权将领，假使有异动，也纷纷遭贬谪。

采石之战搭长期繁荣

来勒绍兴和议之后呒几年，金国因为内部个宫廷斗争，让完颜亮登基成为统治者，伊率领军队，开始向南面进攻。1161年（绍兴三十一年）5月，完颜亮正式南下，想灭脱宋朝。个辰光个丞相陈康伯脑子思路清爽，伊运筹帷幄，要求赵构下诏亲征建康（南京）。10月，宋军歌李宝率水兵，用火攻拿金水军来勒胶西陈家岛（或唐岛，又称陈家岛海战）灭脱。11月，虞允文来勒采石（建康西三四十公里，今马鞍山）击退女真军队个渡江部队，完颜亮只好跑到瓜洲（今江苏扬州），宋军个刘琦、杨存中来勒镇江（建康东七八十公里）严密防守。完颜亮渡江又失败，11月下旬，伊畀自家个部将杀脱。南宋赢得战争。双方动员个兵力一共有70万到80万 。金国失败之后，南宋国内要求向北面进攻和声音比较多，个辰光，宋高宗也拿皇位传把宋太祖支系个趙昚，迭是皇位回到宋太祖个支系浪。1164年，张浚北伐失败，弗过还是签订一份有利宋朝个合约。取消宋金之间个君臣关系，拿岁币减少到20万。。宋孝宗虽然一直想北伐，弗过，个辰光个北方流亡人已经慢慢适应江南个生活，南方个经济来勒大环境稳定个局面下，也迅速赶超北宋个水平。来勒两浙路搭江南东路、江南西路，侪出现户口个增长，只有长江以北个江淮地区比较萧条。宋孝宗应用虞允文、周必大等人，让朝廷个局面也长期稳定，为南宋四十几年个稳定奠定基础。

相国专权

宋孝宗之后个南宋皇帝，大部分呒啥雄心壮志，权力完全畀相国掌握，所以，相国有能力辰光，国家也就繁荣，相国有野心辰光，国家也有动乱。先后有赵汝愚、韩侂胄、史弥远立在宋光宗、宋宁宗搭宋理宗个前期，完全掌握权力。个当中，韩侂胄野心顶顶大，曾经要求已经安定个南宋，莫名向汉化深入个金国北伐。并且利用写手炮制“天道好还，中国有必伸之理”个文章，蛊惑人心。弗过北伐终究是一败涂地，之后，宋搭金重新修订合约，增加岁币等内容，得弗偿失。弗过，南宋个经济，立在迭个阶段还是顶顶好个，社会文化发展，也达到空前绝后个水平。个辰光个首都临安搭周边各两浙地区，立在整个世界浪也是数一数二个发达场化。立在中国个历史浪，呒几个阶段能达到迭个高度。弗过，极端发达个经济搭军事个弱势形成对比，让一些儒家文人邪气弗满意，伊拉写作一些具有扩张思想个诗句，对当时个社会进行讽刺，这些诗句，立在后来成为汉民族主义个论点之一。

端平入洛

宋理宗亲政之后，北面个金国畀蒙古侵略交关趟数，有眼看上去朝不保夕。个辰光，蒙古就派大臣搭南宋进行谈判，邀请南宋对金国进行进攻。弗过，一开始宋嘸理睬伊拉。到金哀宗继位之后，金国想通过攻击南宋，弥补自家畀蒙古攻击造成个损失。南宋只好加入攻金个同盟。之后，金国老快就畀蒙宋个攻击灭脱。之后蒙古人嘸留在中原。宋国一面拿金哀宗个骨灰拿到临安祭祀自家祖宗，一面派军队进入中原地区。包括老早北宋辰光个首都汴京。个趟事体，后势来就畀称呼叫端平入洛。弗过，所谓收复首都，实际浪水分邪气大，当时朝廷也晓得并弗是啥巨大个胜利。蒙古人立在灭脱金国之后，也直接搭宋国接壤，呒多少辰光，就又爆发冲突。

地理

南宋个地理，是北宋个延续，弗过，来勒交关层面也有弗同。

首都

南宋开始个辰光，宋高宗赵构来勒商丘称帝，随后一路往南跑，伊拿巡幸当名号，先后跑到过扬州、平江府（今江苏苏州）、杭州、建康府（今江苏南京）、绍兴府（今浙江绍兴）等地，侪拿“行在”名之。之后，到建炎三年二月驻跸杭州辰光，诏以为行宫。七月，升杭州做临安府。绍兴八年（1138），正式拿临安府为都城，弗过名义浪，还是叫做行在。

行政区划

南宋分路图

南宋拿全国分成仔十七个路，南宋个分路，侪是对安抚司路来讲个。南宋开始个辰光，全国有两浙东、两浙西京西南、淮南东淮南西、江南东、江南西、荆湖南、荆湖北、成都府、潼川府、利州、夔州、福建、广南东广南西等十六个路。到建炎四年,拿江南东、西两路并脱，个辰光有十五路。绍兴元年(1131)，江南重新分成东、西两路，之后，还是十六路。绍兴十四年，拿利州分成东、西两路，个辰光是十七路；乾道四年(1168)又拿利州东西合成一路，仍是十六路；淳熙二年(1175)再次分两路，三年又并脱，五年再分开，绍熙五年(1194)还并脱，庆元二年(1196)又分开来，嘉定三年(1210)复合。帅、漕、宪三司个驻扎地，并弗是一个地方。。具体讲，分别是下头个分法：

• 两浙西路：临安府平江府、镇江府、嘉兴府、安吉州、常州、江阴军

• 两浙东路：绍兴府、庆远府、瑞安府、建德府、婺州、衢州、台州、处州

• 江南东路：建康府、宁国府、徽州、池州、饶州、信州、太平州、南康军、广德军

• 江南西路：洪兴府、江州、赣州、吉州、袁州、抚州、筠州、兴国军、南安军、临江军、建昌军

疆域

南宋个疆域（右下橘黄颜色部分）

南宋个国土面积，相对老早个北宋，是缩小个，主要个收缩是因为金国侵略个影响。绍兴九年（公元1139年），宋帝国搭档女真人谈判成功，个辰光，确定拿黄河作为边界。弗过，第二年女真人撕破合约，派军队占领中原搭关中地区。绍兴十一年，又达成和解，个趟拿淮河作为边界。第二年，确定西面边界，双方拿大散关到秦岭作为分界线。之后，迭个边界大体浪保持稳定。所以，南宋个北面边界，就等同当今个地理气候分界线。来勒南面，南宋保持搭北宋差弗多个边界，对大理国搭越南地区侪保持克制。对贵州地区个少数民族，采取软硬兼施个做法，遥控统治。

政治

南宋个政治，基本浪照搬北宋个体系个，邪气是中央官僚制度，基本嘸改变。弗过，因为平民化搭贵族个彻底消亡。到南宋辰光，啥人侪好通过读书，考科举当官。经常有平民百姓通过迭个路径成为士大夫。另一方面，一些出过宰相个大家族，利用南宋孝宗之后，皇帝弗欢喜统治国家个特点，培养自家个势力，出现好几代高官个情况，这种家族大部分来自吴越地区，立在江右、闽越也弗少。此外，因为四川地区到杭州比老早到汴京还要遥远，所以对四川个科举搭官僚任命采取权宜，让伊拉立在成都考试，第一名授予探花个身份。

南宋权相

• 赵汝愚
• 韩侂胄
• 史弥远
• 贾似道

经济

因为摆脱内亚漕运搭输血个包袱，加上大量中原劳动力向东南地区转移，让南宋获得充足个劳动人口搭较小个转移负担。所以，尽管要搭北面个金国对峙，弗过立在南宋大部分辰光之内，经济个发达程度立在历史上却是空前绝后个。即便到蒙古搭宋国战争辰光，东南大部分地区个生活水平也嘸受到太大影响，更呒明朝、东汉搭唐朝那种老百姓大规模暴动发生。

帝王列表

南宋帝王 1127年 - 1279年
庙号	谥号	姓名	在位时间	年号	皇陵
高宗	受命中兴全功至德圣神武文昭仁宪孝皇帝	赵构	1127年－1162年	建炎 绍兴	永思陵
孝宗	绍统同道冠德昭功哲文神武明圣成孝皇帝	赵眘	1162年－1189年	隆兴 乾道 淳熙	永阜陵
光宗	循道宪仁明功茂德温文顺武圣哲慈孝皇帝	赵惇	1189年－1194年	绍熙	永崇陵
宁宗	法天备道纯德茂功仁文哲武圣睿恭孝皇帝	赵扩	1194年－1224年	庆元 嘉泰 开禧 嘉定	永茂陵
理宗	建道备德大功复兴烈文仁武圣明安孝皇帝	赵昀	1224年－1264年	宝庆 绍定 端平 嘉熙 淳祐 宝祐 开庆 景定	永穆陵
度宗	端文明武景孝皇帝	赵禥	1264年－1274年	咸淳	永绍陵
	孝恭懿圣皇帝	赵㬎	1274年－1276年	德祐
端宗	裕文昭武愍孝皇帝	赵昰	1274年－1276年	景炎	永福陵
		赵昺	1278年－1279年	祥兴	少帝陵