Ođđa studeantta Juulia Alatorvinen čákŋala olggos Avvila logahagas maŋimus geardde stuorra mojiin.
– Dál lea duođai lihkolaš dovdu, illuda Alatorvinen.
Lávvardaga iđđes lei vel hui gelddolaš dovddu. Dán jagi Avvila logahaga studeanttaid ávvudeapmái eai beassan oassálastit earát go skuvlla bargit ja ođđa studeanttat.
Bearrašat ja eará oahppit besse geahččat ávvudeami ja vilges gahpiriid juohkima stream-sáddaga bokte.
Studentii dát lei maiddái juoidá áibbas erenomáš.
– Vuos ledjen vehá behtton, go gullen ahte leat unna joavkkuiguin váldimen gahpiriid vuostá eatge sáhte leat ovttas stuorra joavkkuin. Muhto de go smihtten eanet dán ášši, de lei somá oažžut gahpira jođánit ja sáhttá vuolgit ávvudit dán, muitala Alatorvinen.
Biilasáhtuin vuojihedje birra gili logahaga nohkama gudnin
Alatorvinen studeantafeastta ávvudit ovttas lagamuš olbmuiguin maŋŋeleabbos geassemánus.
Vánhemat mátkkoštedje gitta Soađegillái geahččat stream-sáddaga ovttas áhkuin ja ádjain. Oappát, fuolkkit ja ustibat miehtá Suoma sáddestedje Juulia Alatorvinenii olu teakstadieđuid ja govaid olles sáddaga áigge.
Koronavirusa dagahan spiehkastatdili dihtii Avvila logahaga giđđaávvudeamis eai olu oidnon guossit, muhto skuvlavistti olggobealde ledje biillat vuordimin ođđa studeanttaid.
Anára gielda ja Test World Oy ordnejedje ođđa studeanttaide biilamieđušteami hávdeeatnamii, gos studeanttat gallededje sáŋgárhávddiin. Dán maŋŋel studeanttaid vuojihedje birra gili ávvumeađušteamis.
Vahkoloahpa maŋŋá álgetge juo ođđa hástalusat.
– Mus leat boahtte vahkus sisabeassaniskosat ámmátallaskuvlii ja daidda mun galggan dál ráhkkanit. Oaidnit dal leš mo iskosat mannet ja fárrengo čakčat, muitala Alatorvinen.