Máttasuopmelaš Kimmo Kräkin ii leat goassige ovdal fitnan luossabivddus Deanu alde. Son lea gearggus máksit vai beassá geahččalit.
Bursa geahppu gal reaissus, go bivdolobiide ja ássamii buollá badjel 1 500 euro. Kräkin oaidná, ahte gánneha máksit vai beassá bivdit.
– Mus ii leat dárkilis bušeahtta, muhto borramuššii ja daidda gollá ruhta. Figgan álot geavahit báikkálaš fitnodagaid bálvalusaid, dadjá Kräkin.
Nubbi bivdoalmmái, Tuomo Jääskeläinen duđai vuos guovlladit vuokkaid ovdalgo áiggui vuolgit sugastit. Jääskeläinen lea johtán Deanus bivdimen juo 20 jagi. Son maid lea gearggus máksit dán ilus.
– In leat vuolgán benniid rehkenastit go beassá dáppe luonddus johttit. Lean juo mánnávuođas liikon lottiin ja bivdán meara alde, ja dál dáppe Deanus. Gal dás gánneha máksit, oaidná Jääskeläinen.
Guvlui vurdet juoba 3 300 bivdoturistta
Bivdit leat dehálaččat Ohcejoga gildii. Go sii geavahit guovllu bálvalusaid, das skiliha vearrodienas maid gieldda bursii.
Dán geasi vurdojuvvojit sullii 3 300 bivdoturistta ja buohkat sii leat dehálaččat.
– Go smiehttá luossaturismma, de guovllu fitnodagaid ruhtajohtolagas dan oassi lea sullii 10 proseantta. Hállat máŋggain miljovnnain euroin. Ii leat guhkes áigi, go turisttat bohte deike dušše bivddu dihte, muitala Ohcejoga gieldda ealáhushoavda Eeva-Maarit Aikio.
Koronaáigi buvttii gildii juo fuola dás, mo bivdit bohtet geasset johtit guovllus. Guolásteapmi goit beasai johtui ja Ohcejoga gilli virkkosmuvai.
– Deatnu lea Ohcejoga gieldda eallima ja kultuvra rávdnji. Guolásteapmi buktá midjiide eallinvuogi, dadjá Aikio.
Dohppii guolli dahje ii, Kimmo Kräkin goit áigu boahtit maid nuppe háve.
– In mun báze moraštit, go dat lea nu earenoamáš vásáhus ja áiggun boahtit nuppe hávege. Juos dál ii dohppe, gal dat goas nu dohppe, dadjá Kräkin.