– Puásuiulmuin mun jiem aainâskin äälgi leđe, meridij aanaarlâš Riikka Morottaja jo nuorrân.
Miärádâs poođij suu pärnivuođâ feeriimijn – Riikka puásuipargeeeeči lâi suu pargo tiet ennuv meddâl pääihist. Riikka halijdij, ete jis sun motomin uážuččij párnáid, sun ij ferttiiččij leđe párnáiguin nuuvt ennuv ohtuu.
Tääl Riikka lii näimilittoost puásuiulmuin.
Love ihheed tassaaš Riikka teivâdij raavâdviäsu terassist tuárnuslâš Eero, kii lâi puáttám pargoid Avelân.
– Parâkoskâvuotâ ij lah kištottâllâm tast, kuábáš parga eenâb Eero Morottaja suogârd.
Algâ lâi intensiivlâš viestâdem já ovdâsmaŋas vyeijim päikkikuudij kooskâst. Vuosmuš ohtâsâš päikki kavnui Tuárnusist. Eero poorgâi talle pääihist eennâmtuálust já Riikka poorgâi čurgimpargoin. Ive keejist suoi varrijn Anarân, kost Eero išedij Riikka eeji puásuipargoin.
Ko vuoppâ koijâdij Eerost ličij-uv sun perustum uástiđ suu poccuid, Eero mieđâi toos. Miärádâs lâi Riikkan aalgâst lussâd, mutâ tääl sun lii čiävláá tast, ete Eero mield puásuipargoh suuvâst juátkojeh.
– Mun poottim nube päikkikoodán, ostim nube poccuid já poottim suuhân, iätá Eero.
Eero já Riikka naajáin, uážžoin kyehti párnáá já Eero vaaldij Riikka suhânoomâ. Taho lâi kunneečäittim ubâ perrui.
– Maŋgii jis syemmilâš náájá sämmilijn, te talle váldoo sämmilâš suhânommâ, iätá Riikka Morottaja.
Riikka palo tast, ete sun lii ennuv ohtuu párnáiguin lii motomin argâpeeivi. Iärrun Riikka pärnivuotân lii kuittâg tot, ete Riikka já párnááh láá täävjib Eero mieldi puásuipargoin peerân.
Kuábáškin ij kaađâ tom, ete rähisvuotâ toovâi Eerost puásuiulmuu.
– Eero lii mieldi ain talle, ko sun lii pääihi alne, Riikka kijttâl kyeimis.
Eennâmtuálust päikkiellei tiipšon hárjánâm Eero tuubdâi puásuipargoid jotelávt jieijâs hommán, mutâ vuástáväldim puásuiulmui juávkun lâi várugâs.
Táválávt puásuipargoh maneh perruu siste suhâpuolvâst nuubán já maŋgâseh ettih, ete toos kalga šoddâđ.
– Puásuituálukulttuurân lâi uáli jo lussâd puáttiđ olgopiälálâžžân mieldi, já aalgâst testii muu, máátám-uv mun maiden, Eero muštâl.
Tile čovgij Eero mielâ já tot vaiguttij meiddei parâkoskâvuotân. Tääl sun kuittâg tobdá, ete sun lii viijmâg tuhhiittum.
– Ličij fiijnes, jis puásuituálu juátkim ličij párnáid aainâs-uv muulsâiähtu. Oroččij, ete mun lam porgâm maidnii riehtâ, iätá Eero.
– Motomáid lii tehálâš, ete jieijâs kyeimi lii sämmilâš, kuás jieijâs já sordum aalmug ij taarbâš selvâttiđ, Riikka suogârd.
Vâi ibbeerd maggaar kulttuurist já pirrâsist nubbe puátá, toos kalga halijdiđ uápásmuđ. Eero lii oppâm sämikulttuur pyereest.
Eero máttááttâlâi jiešráđálávt aanaarsämikielâ, maid suoi vanhimin sárnuv párnáidis. Koskânis Riikka já Eero sárnuv suomâkielâ.
Eero já Riikka lává šoddâm oovtâst taan rääjist, ko teivâdáin nubijdis 19-ihásâžžân. Párnái uážžum rievdâdij parâkoskâvuođâ ennuv já koskâttuvâi láá lamaš kriisah-uv.
– Kalga ettâđ já čäittiđ kijttevâšvuođâ, iätá Eero.
Nube huámmášumán väldim lii tehálâš. Eero eereeb iärrás ornij huápumus pygálysääigi aašij nuuvt, ete Riikka peesâi kuhháá vuordum kozzâteknikkárškovliittâsân.
– Muoi sárnoon puoh aašijn. Jis miinii nubbeest iärdud, te tast kalga ettâđ tállán. Uáđđiđ ij uážu moonnâđ vaijan.
Huumor lii tehálâš kommunikaatiovyehi.
– Riikka motomin niivset, mutâ ehidist joosijd, kompâlâš Eero.
Riikka já Eero Morottaja lává mieldi Yle Areena Poronuoret-rááiđust. Kamerai lyeštim privaatelimân lâi kiäldulâš, mutâ tot meiddei toovâi máhđulâžžân huápulâš parâkode orostem tehálâš savâstâlmij várás.