Eai dárbbašuvvo go moadde jođánis lihkastaga ja hárjehallanskibir lea jo gávvut láhttis. 15-jahkásaš roavenjárgalaš Sara Mäntykenttä ii leat easkaálgi judo-fággádallamis. Son lea juo logi jagi hárjehallan viššalit japánalaš valáštallanšlája ja vuoitán máŋggaid gilvvuid.
Dán vahkuloahpas sámenieida bealušta Nuortameara riikkaid judo-meašttirvuođa gilvvuin, mat lágiduvvojit Orimattilas Mátta-Suomas. Diibmá Mäntykenttä vuittii dáin gilvvuin guokte golli. Dan ánssus son beasai dán jagi álggus Suoma judonuoraid riikajovkui.
– Dat gal attii lasi motivašuvnna ja álgen hárjehallat garrasabbot. Dasto bessen stuorát gilvvuide fárrui, muitala Mäntykenttä.
Judo lea japánalaš valáštallanšládja, mas ferte máhttit earret eará bálkestit ja čatnat vuostefággádalli láhttái gieđaiguin ja julggiiguin. Judo lei vuosttas geardde mielde olympialaččain Tokios jagis 1964 ja dan rájes dat lea šaddan bivnnuheamos fággádallanšládjan olles máilmmis.
– Dát orui somás valáštallanšládja ja das beassá dahkat máŋggabealat áššiid. Dat ovddida háhppilvuođa, fámu ja iešdovddu, čilge Mäntykenttä.
Niegada máilmmemeašttirvuođas
Ovdal hárjehusaid roavenjárgalaš Koyama-joavkku nuorat gopmárdallet oahpaheaddjiide ja dasto álget hárjehallat.
Judos nissonat ja dievddut gilvalit sierra ja iešguđet deaddoluohkáid mielde. Judoka čehppodagas muitala buoremusat boahkána ivdni. Judo-oahppit geavahit álggos vilges boahkána ja ovdánit das de iešguđet ivnniide.
Sara Mäntykenttä boagán lea dálá dilis alit, mii muitala das, ahte son lea jo ovdánan gilvvuide. Čuovvovaš lávkin livččii oažžut ruškes boahkána, mii lea oahppidási alimus árvu.
– Álggu rájes jo dihten, ahte dát lea mu hommá ja háliidan leat dás buorre.
Go beasai Suoma riikajovkui, de gilvvut ja hárjehallamat lea dovdomassii lassánan.
– Stuorámus oassi friddjaáiggis manná judoi. Jávkkan olu skuvllas gilvvuid ja hárjehusleairraid dihte.
Dán vahkus su ulbmilin livččii vuoitit ođđasit Nuortameara riikkaid judo-meašttirvuođa. Mäntykenttä jurdagat girdet goit juo stuorát gilvvuide.
– Gal mun háilidivččen oažžut medálja Eurohpá- ja máilmmimeašttirvuođagilvvuin. Dat lea mu niehku, dadjá Sara Mäntykenttä.