Vandârdemvideoin tobdos pirkanmaalâš tubetteijee Sakari Raappana lâi 13 ihheed purâhánnáá piärgu. Kieskâd sun šoodâi eeččin já halijdij tievâsmittiđ suu párnáá purrâmâš piärgupurrâmâšâin, maid sun lii jieš pivdám.
Nuuvt šaddoporrest šoodâi miäcásteijee.
Luándust cevzim kiäsuttij
Sun perustui miäcástiđ kieskâd, ko sun aalgij jotteeđ meecist tuođâlubbooht.
Maaŋgah lijjii hokâttâllâm suu lasettiđ jieš pivdum piärgu purrâmâšvááljun. Ton lasseen varrim meddâl uáivikaavpugkuávlust adelij sunjin máhđulâšvuođâ miäcástiđ.
Lam vandârdâm Pänituoddâr čoođâ kártáttáá já kompasttáá. Tijmá keessiv láim skipárijn Pöyrisjäävri meccikuávlust oho purrâmušttáá já ruoináin 6–7 kiilud.
Sakari Raappana
Pärnivuođâ rääjist Nuorttâ-Suomâ meecijd jottáám Raappana seervâi ive 2013 Suomâ Survival Kiltan. Kilta uárnee ovdâmerkkân škovliittâsâid, moin máttááttuvvoo piergim luándust vááijuvis piergâsijguin.
Siämmáá ääigi Raappana lijkkuustui Sáámán.
Vegesakkest oles aalmug Sakken
Raappana muštâl, et sun poorgâi nuorâbin ennuv rijjâtátulávt ellei vuoigâdvuođâi peeleest, mut halijdij vaiguttiđ nube naalijn piärgu purrâm keeppidmân. Sun rähtiškuođij Vegesakke-nommáin sávrudâttâmvideoid Youtuben, main sun sáárnui šaddopurrâmâš peeleest.
Raappana Youtube-kanava ij suu mield lamaš uáli piivnoh, ovdilgo sun raahtij video jieijâs vandârdemmääđhist Sáámán. Video keččui jotelávt tuháttijd keerdijd.
Sun movtáskij jurdust rähtiđ eenâb sistuálu meecist jotemist. Toin sun puovtij ovtâstittiđ puoh sunjin tehálumos puđâldâsâidis tegu luándust jotteem, kuvvim já mainâsij muštâlem.
Jyehi videost puurâm mottoom šaddopurrâmâš tast sárnuhánnáá. Meccireeisust puáhtá tuulâst passeeđ šaddopihvijn hampurlâš teikkâ veegaanmäärfi. Tot lii tego táválâš uási táválii almaa meccimohe.
Sakari Raappana
Sun keevtij kanavastis kuhháá Vegesakke-noomâ, veikkâ maaŋgah keččeeh hardâšuvvii veegaanovdâlabdosist. Raappana mield maaŋgah suu kanava tiilájeijeeh láá koskâahasiih piärguporree almaah já sun lii huámášâm munekááduid videoi kommentijn.
– Kiinii kommentistij motomin, et lii velttâdâm muu kanava tego roto, mut talle keejâi oovtâ video. Lâi pággu tiiláđ kanava.
Youtube-kanava kuittâg stuárui jotelávt já Raappana ooinij Vege-ovdâlabdos lemin nuáđđin šoddâmân. Tane sun muutij kanava noomâ Sakke Raappanan. Uđđâ noomâ mield sun ij innig tarbâšâm čielgiđ šaddopurrâmâšvááljus ubâ paje.