孫科

孫科（1891年10月20號—1973年9月13號），字哲生，係大清同中華民國人。孫文獨仔。孫科曾任考試院、行政院、立法院等院長之職，係中華民國史上，唯一一個曾任三院院長職務者。

孫科
姓名原文	孫科
出生日	1891年10月21號
出生地	中山市
死亡日	1973年9月13號  （81歲）
死亡地	臺北市
死因	糖尿
國籍	中華民國、中華民國
識嘅語言	中文、英文
信奉	基督新教
母校	柏克萊加州大學、哥倫比亞大學
職業	政治人
政黨	中國國民黨、同盟會
配偶	陳淑英
仔女	孫治平、孫治強、孫穗英、孫穗華、孫穗芳、孫穗芬
阿爸	孫文
阿媽	盧慕貞
兄弟姊妹	Sun Wan、宮川富美子
[改維基數據]

屋企同學歷

後生嘅孫科

孫科係孫文個仔。佢老母係元配夫人盧慕貞。孫科喺廣東香山翠亨村出世。

一八九五年，佢同外婆移居夏威夷檀香山，喺檀香山中學畢業。之後喺美國柏克萊加州大學得文學士，哥倫比亞大學得理碩士；及哥倫比亞大學頒榮譽法學博士畀佢。

孫科先後有二妻一情人，一係妻陳淑英，生有兩仔兩女；二係同居情人嚴藹娟，生一女；三係二夫人藍妮，生一女。

仔女

孫科一九三八年出使法國，一家合照。孫科喺正中，由相左移右睇，最左係孫穗英，跟住係孫穗華，跟住到孫科，跟住係老婆陳淑英，重有細仔孫治強。大仔喺美國，唔喺相度。

孫科有兩仔四女。仔有孫治平同孫治強，女有孫穗英、孫穗華、孫穗芳同孫穗芬，人稱「四朵金花」。

• 孫治平，孫科大仔。中華人民共和國成立後，孫治平同細自己一歲嘅細佬孫治強，長居美國。一九六五年，孫治平陪老頭孫科返臺，擔任總統府國策顧問、中國國民黨中央委員、中國國民黨中央評議會委員等職、台灣電視公司副董事長等職，一九八零年起定居香港。二零零五年喺香港柴灣東區尤德夫人那打素醫院病逝。孫治平有一仔，叫孫國雄，一九四三年生。

• 孫治強，孫科細仔。返臺後懷才不遇，首次婚姻失敗告終。孫治強再婚後，生兩仔，孫國元同孫國升。孫治強晚景淒涼，生活拮据，身體欠佳。為咗醫病，佢只能夠喺台北市榮民總醫院附近租屋住。二零零一年喺美國因肺炎而撒手塵寰，享年八十七歲。孫治強有女孫嘉霖同孫嘉瑜，都旅居美國。

• 孫穗英，孫科大女，一九二二年出世，生一仔一女，仔林德傑，女林淑真。

• 孫穗華，孫科二女，一九二五年出世，有一仔兩女，仔張孔穎，女張樂文同張樂真。

• 孫穗芳，孫科三女，一九三六年上海出世，老母嚴藹娟，同孫科未婚同居有咗佢。之不過孫科另有所愛，孫穗芳無父愛中降世。孫穗芳曾著書《我的祖父孫中山》。

• 孫穗芬，孫科細女，一九三八年喺上海出世，老母藍妮係孫科二夫人。一九五五年，孫穗芬高中畢業，成為中華民國同台灣有史以來最年輕嘅空中小姐。佢生咗三個仔，孫忠仁、孫忠傑同孫忠偉。

• 另香港市面有傳，親共藝人石慧，即連續劇演員傅明憲阿媽，係孫科嘅私生女，因極之痛恨老豆，而投靠共產黨。

事業

一九一七年，孫科返中國廣州，喺老頭孫文大元帥府擔任秘書。一九一八年到一九二零年，佢擔任非常國會參議院秘書兼廣州時報編輯。一九二一年，佢做廣州市長兼治河督辦。一九二二年，陳炯明逐孫文出廣州，孫科無做廣州市長。佢到香港籌款討伐陳炯明。唐繼堯幫孫文逐陳炯明。一九二三年二月，孫科再任廣州市長；十月，有份改組中國國民黨，獲指為國民黨臨時中央執行委員會委員，負責起草黨綱章程。一九二四年主持國民黨廣州特別黨部，六月同黃季陸合作提出《彈劾共產黨案》。

一九二五年七月，國民政府喺廣州開府，孫科任政府委員。一九二六年一月，孫科任國民黨中央執行委員；三月卅一號由上海坐龍山輪返廣州；五月第三度出任廣州市長。一九二七年三月，任國民黨常務委員，同埋國民政府常務委員；七月跟汪兆銘清共。一九二八年一月，佢同胡漢民、伍朝樞赴英德等地考察，起草《中國國民黨訓政大綱》，協助制定《中華民國國民政府組織法》；十月任鐵道部長同考試院副院長。一九三一年二月，蔣介石同胡漢民鬥，佢支持胡漢民；五月，參加非常會議，任廣東國民政府常務委員。九一八事變後，國民黨內尋求合作，任南京政府行政院長，但旋因政府財政拮据而被迫落台。一九三二年年底，孫科任立法院長，同憲法起草委員會委員長，主張結束黨治，還政於民。一九三六年主持起草同公布《五五憲草》，同埋組織中蘇文化協會。

抗日戰爭期間續任立法院長，同蘇俄談判，簽訂《中蘇互不侵犯條約》、《中蘇商務條約》。一九四六年一月，代表國民黨同中國共產黨協商，隨後跟蔣介石進攻共產黨佔領區。一九四七年四月任國民政府副主席。一九四八年初，競選第一屆行憲副總統，敗於李宗仁後，五月再任為立法院長；十一月，獲蔣委任做行政院長。蔣介石喺一九四九年一月下台，由李宗仁代任總統。孫科覺得南京不穩，將行政院遷往廣州，一度令李宗仁政府無法運作，亦無法同共產黨和談。中國共產黨一九四八年列出四十三名國民黨戰犯，孫科係其中之一。

一九四九年三月，孫科辭職，移居香港。一九五零年，遊經香港、巴黎、西班牙等地，一九五二年，定居美國洛杉磯，以種菜、讀書渡日。

一九六五年，孫科由美國去到台灣，任中華民國總統府高級咨議、考試院院長，一九六七年出任東吳大學董事長。

一九七三年九月十三號，孫科喺台北逝世，葬於台北市陽明山第一公墓。

逸聞

孫科後生嗰陣幾任性，喺一九二三年任廣州市長期間，曾因討伐陳烱明，爲滇桂軍籌軍餉，同素有芥蒂、時任大元帥府秘書長胡漢民衝突，引致孫文盛怒下，幾乎要親手槍殺佢。

睇埋

• 中華民國行政院院長
• 中華民國立法院院長
• 中華民國考試院院長

出面網頁

• 〈孫科(1891～1973)〉 (中文)。
• 〈孫科：國父與黃克強先生革命之追憶〉 (簡體中文)。