法國

法蘭西共和國 République française
通稱：法國
旗 徽
格言：« Liberté, Égalité, Fraternité » （法文） 「自由、平等、博愛」
國歌：« La Marseillaise » （法文） 《馬賽曲》
法國位置
屬地（實轄）
幅員 國土：643,801（全國）／551,695（本土）平方公里（世界第43名）
首都	巴黎
最大城市	巴黎
至高地	白朗峰（海拔4,805.59米）
海岸線長	4,853公里（全國）／3,427公里（本土）
時區	歐洲中部時間：UTC+1 夏令時：UTC+2
國民
人數	以下係2024年1月嘅估計數字 人數：6,837萬（含海外領地）／6,614萬（本土）（世界第20名） 人口密度：122/km2
官方語言	法文
官方文字	法文
民族	Celtic and Latin
主要宗教	天主教
主要節日	國慶日：7月14號
行車方向	右面
家用電源 電壓：220伏 插座：Europlug 頻率：50赫茲
政制
國家結構形式	單一制
政制	半總統制 代議民主制
主要領袖 國家元首（總統）：馬克龍 政府首腦（總理）：Michel Barnier
經濟
GDP（購買力平價） 以下係2024年嘅估計數字 總計：▲ $39,880億（第10名） 人均：▲ $60,339（第26名）
GDP（國際匯率） 以下係2024年嘅估計數字 總計：▲ $31,300億（第7名） 人均：▲ $47,359（第23名）
HDI 以下係2022年嘅估計數字 ▲ 0.910（第28名）－極高
中央銀行	法蘭西銀行
貨幣	歐羅（EUR，€）
堅尼系數	▲ 0.315 中，2021年
資訊
國家象徵	高盧公雞、百合花飾、瑪麗安娜；國色：藍、白、紅
國家代碼	FRA
國際域名縮寫	.fr
國際電話區號	+33
現役軍人數	37萬（陸、海、空三軍全員27萬（含文職人員）、憲兵10萬）－2021年

法國（Faat³gwok³），又叫法蘭西（Faat³laan^4-1sai¹）（法文：France），正名叫法蘭西共和國Faat³laan^4-1sai¹ Gung⁶wo⁴gwok³（法文：République française），係歐洲一國。除咗歐洲部份之外，佢重有好多海外屬土。法國本土喺地中海同英倫海峽及北海之間，由萊茵河伸展到大西洋。法國人叫佢本土做L'Hexagone，皆因佢本土似六角形咁解。法國同比利時、盧森堡、德國、瑞士、摩納哥、安道爾同埋西班牙接壤嘅。因為法國有海外屬地，所以佢又同巴西同蘇里南（法屬圭亞那）、荷屬聖馬丁（法屬聖馬丁）接壤。而北面嘅英國同法國雖然無接壤，但係喺英倫海峽之中，有一條英法海底隧道連接住英國同埋法國。

由於法國係第一次世界大戰同埋第二次世界大戰嘅戰勝國，因此佢係聯合國安全理事會五個常任理事國嘅成員。另外，法國又係歐洲聯盟同埋北大西洋公約組織嘅創始國兼會員國。亦都係神根公約嘅成員。

國名

艾菲爾鐵塔係巴黎同法國嘅象徵，喺1889年為咗巴黎搞嘅第4屆萬國博覽會而起嘅。

正式名稱用法文寫，République française（法國共和國）。平時叫France（法國）。簡稱係FR。

粵文入面寫做法國共和國，跟香港政府慣例平時叫開法國。因為佢嘅政體係第五共和政體，所以有時會叫做法國第五共和國，喺寫歷史嗰陣特別有用。又可以寫做佛蘭西、法蘭西（由普通話嚟嘅），通常會簡寫做法。

France呢個名可以追溯到11世紀嘅《羅蘭之歌》，但嗰陣France係指法蘭克王國。由987年開始嘅法國王國用咗France呢個名，但係後世改嘅，嗰時其實未必有呢個名。喺中世紀，法國國王會簽REX FRANCUS。France呢個名源於中世紀歐洲嘅法蘭克王國。因為歷代法國國王嘅代數都係由法蘭克王國嘅王開始數（例如「路易一世」、「路易十六世」）。作家佐藤賢一解釋過，喺凡爾登條約之後，法蘭克王國分咗三：西法蘭克王國、中法蘭克王國、東法蘭克王國，中法蘭克王國消失咗，而東法蘭克就變做神聖羅馬帝國，所以自此之後，話自己係法蘭克王嘅，就只係西法蘭克嘅王，法蘭克就變咗專指西法蘭克。而喺德文入面，直譯法蘭克王國就係「法蘭克賴赫」，依家都係咁叫法國嘅。好多語言都係用呢個源自法蘭克王國嘅名，但係喺希臘文，依然會用古羅馬時代嘅地名叫法國做「Γαλλία」（高盧）」。

史

早喺一百八十萬年前舊石器時代，法國地域已經有人住。

法國人嘅祖先就係居住喺今日嘅意大利、比利時、法國、荷蘭、德國、萊茵河北部嘅高盧人。佢哋喺古羅馬時代，俾羅馬政府視為野蠻人。佢哋亦都有過反抗羅馬軍團入侵嘅光榮歷史，但最後都打唔過羅馬軍團。法國同埋其他歐洲北部嘅地方最後都成為羅馬帝國嘅領土。

而法國呢個國家出現嘅時期就係喺十世紀。當時嘅查理曼帝國開始分裂，東部領土形成德意志，中部領土形成勃艮第，而西部嘅領土就形成法蘭西。

喺十四世紀至十五世紀期間，法國同英格蘭因為法國國王嘅繼承權嘅紛爭而爆發咗一場持續成百幾年嘅戰爭，呢場戰爭就係所謂嘅英法百年戰爭。喺呢場戰爭嘅初期同埋中期，法國軍隊不斷失利。而英格蘭軍隊就愈戰愈勇，佔領咗大半個法國。就喺毫無希望之下，一位日後舉世皆知嘅英雄人物終於出現，佢就係聖女貞德。貞德係一個嚟自農村嘅女仔，佢聲稱自己喺十六歲嘅時候，喺村莊入面嘅一樖大樹下面見到三個天使：聖彌額彌、聖瑪嘉烈、聖凱瑟琳。三位天使帶咗一個神諭畀佢，入面話畀貞德知，佢將要率領法國軍民趕走英格蘭軍隊。就係呢個神諭呼召之下，佢決定到當時查理王儲居住嘅地方—希農城去見查理王儲。因為只有咁樣，佢先可以得到兵權，去帶領軍隊反抗英格蘭人。最後佢成功見到查理王儲，而呢次會面嘅結果係，查理王儲畀咗一支軍隊佢，要佢帶領軍隊趕到當時畀英格蘭軍隊圍困嘅城市—奧爾良，打一場幫奧爾良城軍民解圍嘅仗。但由於佢當時只係一個農村女子，冇錢冇武器。所以，佢嘅馬匹、長劍、軍旗、盔甲、頭盔、侍從都係人哋出錢幫佢買。

貞德喺呢場戰爭入面亦不負所託。英格蘭軍隊本身擁有極大優勢，奧爾良呢個城市畀佢哋佔領只不過係時間問題。但係當貞德同埋佢嘅部隊只係用咗九日時間，就將英格蘭人趕走。成功解除英格蘭人對奧爾良城嘅封鎖。跟住，愈來愈多本身反對貞德嘅法國將領，都轉而支持貞德，貞德支軍隊嘅人數愈來愈多。佢嘅部隊成功創出一次又一次嘅輝煌戰績。但喺一四三零年五月二十三號嘅一場小戰鬥入面。貞德畀勃艮第人俘虜。勃艮第人將貞德交畀英格蘭人。英格蘭人對貞德進行一次又次一次唔公平嘅審判之後，最後對貞德作出十二條指控。一四三一年五月三十號，英格蘭人判處貞德火刑，呢場火刑喺盧昂進行。貞德就咁離世，離世嘅時候只有十九歲。但亦因為佢嘅死，激起法國人嘅鬥志。喺佢離世之後二十二年，法國人成功將英格蘭人趕出法國。百年戰爭因為法國贏咗而結束。

十五世紀末，法國逐漸變成一個以中央集權制、君主專權制為主嘅國家。而十五世紀至十八世紀入面，最著名嘅法國國王就係路易十四。呢種情況一直發展到法國大革命期間嘅一七九二年，法蘭西第一共和國建立先至完。

法蘭西第一共和國只係運作咗幾年，拿破崙喺一七九九年靠霧月政變得到法國控制權，後來做埋皇帝（法蘭西第一帝國）。之後法國一路擴張，差唔多吞晒成個歐洲大陸，而歐洲多國亦結盟同法國打過，直到一八一四年歐洲多國打贏法國，拿破崙被放逐，喺法國大革命冇咗江山嘅波旁王朝復辟為止。一八一五年拿破崙捲土重來，但好快又打輸咗（滑鐵盧戰役），並再一次被放逐，波旁王朝再一次復辟。

一八三零年，波旁王朝再次被推翻（法國七月革命），之後嘅七月王朝亦只係維持咗十八年，就俾法蘭西第二共和國取代。一八五二年，拿破崙個姪拿破崙三世建立法蘭西第二帝國，一八七零年法國喺普法戰爭打輸畀普魯士，法國第三次成為共和國。

踏入二十世紀，法國參與過兩次世界大戰，其中喺第二次世界大戰期間法國打輸畀軸心國，並分裂成德國佔領區同埋同軸心國合作嘅維希法國，直至軸心國打輸場仗。一九四九年，法國第四共和國成立，一九五八年再變成今日嘅法蘭西第五共和國。

政區

舊法國政區

法國政區 (2016年)

法國有25個大區（法文：région），本土有20個，海外有5個。行政區可以細分做101個部（法文：département），部又可以再細分做341個細區（法文：arrondissement）。

本土大區：

• 奧文尼-隆河-阿爾卑斯 （法文：Auvergne-Rhône-Alpes）
• 勃艮第 （法文：Bourgogne）
• 布列塔尼 （法文：Bretagne）
• 中央 （法文：Centre-Val de Loire）
• 科西嘉 （法文：Corse）
• 法朗什孔泰 （法文：Franche-Comté）
• 大東部 （法文：Grand Est）
• 大巴黎 （法文：Île-de-France）
• 新亞奎丹 （法文：Nouvelle-Aquitaine）
• 北加萊海峽 （法文：Nord-Pas-de-Calais）
• 諾曼第 （法文：Normandie）
• 奧斯坦尼 （法文：Occitanie）
• 羅亞河畔 （法文：Pays de la Loire）
• 皮卡第 （法文：Picardie）
• 普羅旺斯阿爾卑斯蔚藍海岸 （法文：Provence-Alpes-Côte d'Azur）

海外大區：

• 法屬圭亞那 （法文：Guyane française）
• 瓜德羅普 （法文：Guadeloupe）
• 馬提尼克 （法文：Martinique）
• 馬約特 （法文：Mayotte）
• 留尼旺 （法文：Réunion）

地理

内文：法國嘅地理

法國嘅地形圖

吉倫特河，喺保亞克市。呢度喺阿基坦地區嘅中心城市波爾多市以北，係加龍河同多爾多涅河匯合成嘅河流。

法國本土（即係大陸法國），北面隔住個海同英國相望，東北面同比利時同盧森堡接壤，東面係德國同瑞士，東南面係意大利，西南面就同西班牙交界。喺法國影響底下仲有兩個細國家：安道爾喺西班牙條界隔離，摩納哥喺法意條界隔離。

法國嘅國土除咗包括西歐嘅本土之外，仲包括咗喺地中海上嘅科西嘉島、南美洲東北部嘅法屬圭亞那、加勒比海嘅馬提尼克同瓜德羅普，同埋印度洋嘅留尼汪，另外仲有喺大洋洲嘅新喀里多尼亞同法屬波利尼西亞等等。法國本土嘅面積係全西歐最大，淨係本土面積就係日本嘅1.5倍，而可住人嘅地方大概係日本嘅3.5倍咁大。

地形

法國本土大概係六角形，呢個形狀影響到法國嘅官方語言法文，六角形"l'Hexagone"就代表「法國本土」。本土六條邊界裡面，一條係平原同河流（萊茵河），兩條係山脈（比利牛斯山脈同阿爾卑斯山脈），三條係海（地中海、大西洋、北海）。

法國嘅地形有幾個特點，東邊到南邊有山脈同高地做天然邊界，除咗有啲高原同山丘之外，大部分國土都係平原，住人嘅地方多（全國60%嘅地方海拔低過250米，而超過2000米嘅山區就只係東部同西南部嘅邊境附近）。

喺法國西北部有一個大平原，係法國面積最大嘅地區，屬於中歐平原嘅西端。呢度地勢平坦，最高都係海拔200米左右，加埋氣候溫和，令到法國成為西歐最大嘅農業國。喺東部同德國嘅邊境有孚日山脈，同瑞士嘅邊境有汝拉山脈。孚日山脈沿住萊茵河嘅西岸，萊茵河就成為法國同德國嘅國界。南東部有中央高地，沿住羅納河向南伸延，最後連接到阿爾卑斯山脈。阿爾卑斯山脈係法國同意大利嘅國界，裏面好多山峰高過4000米，最高峰係勃朗峰。阿爾卑斯山脈有好多古羅馬時期以嚟嘅山道，當中最出名嘅係小聖伯納山口。南西部同西班牙交界嘅係比利牛斯山脈。呢條山脈幾乎冇山口，令到法國同西班牙嘅貿易非常困難。中央高地最高峰係多爾山，海拔1,866米。比利牛斯山脈嘅最高峰阿奈托峰海拔3,404米，喺西班牙境內。法國全境最高峰係喺意大利邊境嘅勃朗峰，海拔4,810米。

法國啲大河——由北向南逆時針數，分別係塞納河 776公里、盧瓦爾河 1012公里、加龍河 647公里、羅納河 812公里。

氣候

法國嘅氣候可以分做大陸性氣候、西岸海洋性氣候、同埋地中海性氣候三大區域。西岸海洋性氣候主要喺大西洋沿岸地區出現，氣溫全年變化唔大，日夜溫差細，氣候溫和唔會太凍。越向東走，氣候就越偏向大陸性，氣溫全年同日夜嘅溫差都會加大，降水量亦會上升。真正嘅大陸性氣候一般喺東歐地區，例如波蘭同羅馬尼亞，而法國東部因為受到高地特別係阿爾卑斯山脈嘅影響，出現咗類似大陸性氣候嘅情況。地中海性氣候主要喺國土嘅南岸出現，喺三大氣候區裏面氣溫變化最大，全年降水量較少。歐洲入面，得法國一個國家同時擁有呢三種氣候。

出面網頁

• 法國嘅官方網站
• 〈France.fr - 精彩紛呈、驚喜不斷的法國〉 (繁體中文)。
• France | Union Européenne，歐洲聯盟 （法文）
• 〈国家概况 — 中华人民共和国外交部〉 (簡體中文)。中華人民共和國外交部。
• 〈法蘭西共和國 French Republic - 歐洲地區 - 中華民國外交部 - 全球資訊網 Ministry of Foreign Affairs, Republic of China (Taiwan)〉 (繁體中文)。中華民國外交部。
• フランス基礎データ ｜ 外務省 （日文）
• "France - United States Department of State" (英文). 美國國務院.
• 法國喺中央情報局《世界概況》嘅資料 （英文）
• 〈フランス共和国 ｜ 外務省〉 (日文)。日本外務省。
• "France - Department of Foreign Affairs and Trade" (英文). 澳洲外交貿易部.