Big Brother (George Orwell)

Big Brother
Big Brother op 'n plakkaat
Skepping
Eerste verskyning	1984 (1949)
Geskep deur	George Orwell
Inligting
Spesie	Mens
Geslag	Manlik
Beroep	Staatshoof van Oceania

Big Brother is ’n karakter en simbool in George Orwell se distopiese roman 1984. In die verhaal is Big Brother die staatsleier, al het niemand hom nog ontmoet nie. Daar is oral foto’s van hom met die boodskap "Big Brother is watching you". Mense gebruik dikwels die uitdrukking “Big Brother” om te verwys na 'n regering of organisasie wat absolute mag het, geen vryheid toelaat nie, en fyn dophou wat mense doen ('n loerbroer). Die TV-reeks Big Brother is na die karakter genoem.

Oorsprong van die term

Betogers in Hongkong wat Edward Snowden ondersteun.

Die boek 1984 is in 1948 geskryf. Hierin skets Orwell 'n onmenslike diktatoriale eenpartystaat wat in alle opsigte volledig deur die Party beheer word. Die alomteenwoordige leier van die Party word Big Brother genoem. Al die inwoners van die land word voortdurend met kameras dopgehou, selfs in hul huise.

Big Brother is die almagtige, onfeilbare staatshoof van Oceania. Hy is altyd reg en neem nooit verkeerde besluite nie. Sy ware naam is onbekend. Niemand weet eens of hy wel 'n persoon is nie. Dit is moontlik dat hy oorlede is en deur iemand anders opgevolg is, maar niemand weet regtig nie.

Die boek was 'n skerp aanklag teen kommunisme en die Sowjet-Russiese leier Stalin, wat die model voorgestaan het. Daarnaas is die boek ook 'n waarskuwing vir wat in die toekoms in nie-kommunistiese lande kan gebeur as mense hul individualisme kwytraak. Die roman het veral in 1984 wye mediadekking gekry, toe die tema nog net so aktueel, en die Koue Oorlog nog sterk aan die gang was. Sedertdien speel die term ‘Big Brother is watching you’ 'n rol in die debat rondom privaatheid, veral soos owerhede toesig oor hul onderdane verskerp.

Eksterne skakels

• Wikimedia Commons het meer media in die kategorie Big Brother (George Orwell).