Madonna van die Rotse
Die Madonna van die Rotse is die titel van twee verskillende, dog byna identiese skilderye deur Leonardo da Vinci. Die een word in die Louvre in Parys gehuisves en die ander in die Nasionale Galery in Londen.
Louvre-skildery
[wysig | wysig bron]
|
| Madonna van die Rotse |
| Leonardo da Vinci, 1483-1486 |
| Olie op paneel (verplaas na doek), 199 × 122 cm |
| Louvre |
Die skildery in die Louvre is tussen ongeveer 1483-1486 of vroeër geskilder. Die meeste geleerdes stem saam dat hierdie werk grootliks deur Leonardo is en dat dit die vroegste van die twee werke is.[1] Die kwastegniek en kontras tussen lig en donker word as eie aan Leonardo se werke beskou. Dit is sowat 8 cm hoër as die Londen-weergawe. Die eerste aantekening van hierdie skildery dateer uit 1625, toe dit deel van die Franse koninklike versameling gevorm het.[1]
Londen-skildery
[wysig | wysig bron]
|
| Madonna van die Rotse |
| Leonardo da Vinci, 1495-1508 |
| Olie op paneel, 189,5 × 120 cm |
| Nasionale Galery |
Die skildery in die Londense Nasionale Galery is byna identies aan die weergawe in die Louvre en word ook aan Leonardo da Vinci toegeskryf. Die skildery is vóór 1508 geskep. Dele van die skildery is waarskynlik deur sy assistente geskilder, moontlik die De Predis-broers, wat gepaardgaande panele geskep het. Die skildery is in opdrag vir 'n kerk in Milaan geskep en is teen 1785 deur die kerk aan die Skotse kunstenaar Gavin Hamilton verkoop. Hamilton het die skildery na Engeland geneem. Daar het dit van versameling tot versameling gereis, voor dit in 1880 deur die Nasionale Galery aangekoop is.[1]
'n Infra-rooi reflektogram het in Junie 2005 gewys dat daar 'n ander skildery onder die sigbare een is. Daar word geglo dat die oorspronklike skildery 'n vrou toon wat kniel en moontlik 'n kind met een vas hou en die ander hand voor haar uitsteek. Sommige navorsers glo dat Leonardo van plan was om 'n toneel van aanbidding van die Jesus-kind te verf.[2]
Verwysings in die Da Vinci Code
[wysig | wysig bron]In sy boek The Da Vinci Code beweer die Amerikaanse romanskrywer Dan Brown dat die Louvre-weergawe versteekte simboliek bevat wat teenstrydig is met ortodokse Christelike geloof. Hy wys dat Jesus blyk Johannes te aanbid en nie anders om nie (die roman beweer dat die kind aan die linkerkant Jesus is, siende dat hy naas Maria sit). Daar word ook beweer dat Maria 'n onsigbare kop vashou en dat die engel se vinger 'n "sny sy keel af"-beweging maak.
Geskiedkundige bewyse is egter teenstrydig met hierdie bewerings. Volgens die Louvre is die teorie "verregaande" en dat "hierdie kragtige letterkundige effek 'n tragedie van kunsgeskiedenis is". [3]
Verwysings
[wysig | wysig bron]- ↑ 1,0 1,1 1,2 National Gallery Catalogues: Catalogue of the Earlier Italian Schools, Martin Davies, National Gallery Catalogues, Londen 1961, herdruk in 1986, ISBN 0901791296.
- ↑ "New Leonardo picture discovered" (in Engels). BBC News. 1 Julie 2005. Geargiveer vanaf die oorspronklike op 14 Januarie 2015.
- ↑ Amptelike webwerf [1].
Normdata  |
|
|---|