Snoeker

Snoeker word op 'n biljarttafel met vangsakkies langs die kante en 22 gekleurde balle gespeel. Punte word behaal deurdat die balle met ŉ lang houtstok en die wit bat in die sakkies geskiet word. Gewoonlik word dit net deur 2 spelers gespeel, maar pare en spanne kan ook saam deelneem. Snoeker word op 'n biljarttafel gespeel wat van 6 vangsakkies (3 weerskante van die tafel) voorsien is.

Daar is 22 balle, naamlik 15 rooies, 'n gele, 'n groene, 'n bruine, 'n bloue, 'n pienke, 'n swarte en ŉ witte. Elke speler het 'n lang houtstok met 'n viltpunt waarmee hy die wit bal in die rigting van 'n rooie stool met die doel om laasgenoemde in 'n sakkie te laat beland. Indien die hou geslaag het, moet hy 'n bal van 'n ander kleur (ŉ sogenaamde kleurbal) kies en die bal op dieselfde wyse na 'n sakkie skiet. Daarna moet 'n rooi bal weer gespeel word.

Sodra 'n skoot misluk, kry die volgende speler ŉ beurt. Elke bal het 'n puntwaarde wat aan die speler toegeken word sodra die bal in die sakkie beland het. Rooi tel 1 punt, geel 2, groen 3, bruin 4, blou 5, pienk 6 en swart 7. Wanneer die wit bal ook in die sakkie beland, word 4 punte van die speler se puntetotaal afgetrek. Wanneer na 'n rooi bal gespeel word maar 'n kleurbal word raak geskiet, word die bal se puntwaarde van die speler se totaal afgetrek.

Totdat al die rooi balle in die sakkies is, word die kleurballe telkens weer op bepaalde posisies op die tafel geplaas nadat hulle in 'n sakkie beland het. As daar geen rooi balle meer oor is nie, word die ander balle in die volgorde van hul puntewaarde gespeel. Die speler met die meeste punte wen.

Bronnelys

Wêreldspektrum, 1982, ISBN 0908409672, volume