Wältundergang

As Wältundergang bezäichnet mä en Eräignis, wo din d Menschhäit, dr Blaneet Ärde oder s ganze Universum vernichtet wird oder wenigstens die herrschende Lääbens- und Begläitumständ massiv und desaströs zum Negative verändere.

Die vier apokalyptische Ridder. Holzschnitt vom Albrecht Dürer

S Wältundergangsdänke üsseret sich vor allem in Zite vo sozialer Unsicherhäit immer wider in Brofezeijige: Dr Martin Luther zum Bischbil het dreimol (für d Joor 1533, 1538 und 1541) dr Wältundergang vorusgsäit in ere Zit, wo sich in dr öiropäische Gsellschaft religiöösi und soziali Geegesetz zuegspitzt häi.

Spekulativi Wältundergangsszenarie

Vili Religioone brofezeje dr Wältundergang. Die nordischi Ragnarök verzellt d Gschicht vom Undergang vo de Götter. In dr christlige Bible beziet sich d Offebaarig vom Johannes am mäiste uf s Ändi vo dr Wält. Dr Buddhismus und dr Hinduismus gseen im Wältundergang e Däil vo de Kalpa, de kosmische Zükle, wo d Wält din entstoot und wider vergoot.

S Internet isch en ideali Blatform, zum alli mööglige Spekulazioone verbräite. So het s Lüt gee, wo fest dra glaubt häi, dass am 21. Dezämber 2012 d Wält wurd undergoo, wil dr Kaländer vo de Maya z Änd wurd goo, und häi iiri Ideä über s Internet bekannt gmacht. Das het sich aber spöötistens am Daag druf, am 22. Dezämber as e Feelspekulazioon usegstellt.

Naturwüsseschaftlig fundierti Szenarie

Es git hingeege Szenarie, wo ganz razionaal si, wenn au iiri Woorschiinlikäit mänggisch eender chlii isch.

• D Menschhäit cha sich ganz oder zu groose Däil sälber zerstööre, öbbe im e globaale nukleare Chrieg.
• E Wulkaanusbruch mit ere VEI-Sterki vo 7 oder 8.
  Dr Yellowstone gältet as Supervulkan und bricht alli 600'000 bis 700'000 Joor us. Wäge de groosse Mänge vo Rauch und Äsche in dr Atmosfääre sinkt d Tämpratuur vo dr Ärde stark und e groosse Däil vo dr Dier- und Pflanzewält goot zgrund.
• Wenn d Ärde mit eme andere Himmelskörper zämmestoost oder dä d Baan vo dr Ärde erheeblig stöört.
• E Supernova in nöggster Nööchi.
• E Gammablitz (Gamma Ray Burst), wo bündlet diräkt uf d Ärde drifft.
  E sonigs Eräignis in dr Nööchi vom Sunnesüstem (weniger as 3000 Liechtjoor ewägg) chönnt e Masseustärbe uf dr Ärde zur Folg haa.
• D Entwicklig vo unserer Sunne zum ene Roote Riis.
  Bis jetz het mä gschetzt, dass das in öbbe vier Milliarde Joor wurd bassiere. Noch nöijere Rächnige wer s aber villicht mööglig, ass d Sunne scho in 900 Millione Joor so häiss chönnt si, ass s Lääbe uf dr Ärde wurd abstärbe.
• Wenn d Ärde in dr Aaziejigsberiich vom ene Schwarze Loch grootet, wo grooss gnueg isch.

Litratuur

• Franz Graf-Stuhlhofer: Ursachen einer Erwartung des nahen Endes. Psychologische Faktoren geschichtlicher Vorgänge. In: Geschichte der Psychologie. Nachrichtenblatt der Fachgruppe Geschichte der Psychologie in der Deutschen Gesellschaft für Psychologie 16 (1999) H. 2 (= Nr. 35), S. 15-19.
• Maarten Keulemans: Exit Mundi: Die besten Weltuntergänge. Deutscher Taschenbuch Verlag; 2010; ISBN 9783423346177
• Hugo Stamm: Im Bann des Maya-Kalenders – Endzeithysterie in Sekten und Esoterik. Gütersloher Verlagshaus, 2012, ISBN 978-3-579-06674-5
• Florian Freistetter: 2012 – Keine Panik. jmb Verlag, 2012, ISBN 978-3-940970-38-1

Weblingg

• Welche kosmischen Gefahren bedrohen uns? us de Fernseh-Sendereie alpha-Centauri (ca. 15 Minute). Serschtmol usgstrahlet am 16. Jan. 2000.
• Soziologisches Forschungsprojekt zur "2012-Bewegung" an der Universität Koblenz-Landau
• Weltuntergang. Aus Politik und Zeitgeschichte Heft 51/52, 62. Jahrgang (2012).

Dä Artikel basiert uff ere fräie Übersetzig vum Artikel „Weltuntergang“ vu de dütsche Wikipedia. E Liste vu de Autore un Versione isch do z finde.