Bundesratswahlen 2011

D Bundesrotswahle 2011 sind d Gsamternoierigswahle vom Schwiizer Bundesrot gsi, wo am 14. Däzember 2011 schtattgfunde hei. Mit Usnahm vo de Micheline Calmy-Rey, wo nöd wider aaträte-n-isch, hei alli amtiirende Bundesröt wider kandidiirt und sind au gwählt worde. Noi in de Bundesrot cho isch de Alain Berset.

Usgangslag

D SVP het scho sit em Usschluss vo de Bündner SVP im 2008 dütlich gsait, dass sie ihre durch de Parteiusschluss vo de Eveline Widmer-Schlumpf verlorene Sitz wot zruck ha. Durch d Sitzverlüscht vo de SVP und de FDP bi de eidgnössische Wahle und Ufgrund vo verschidne Interpretatione vo de Konkordanz, hei die Mitteparteie CVP, glp, BDP und EVP den Aaspruch nöd aaerkannt. Ei diskutiirti Variante isch au d Wahl vo eme SVP-Verträter uf Choschte vo de FDP gsi, wo d SVP aber nöd het welle druf iigoh.

Erscht am 1. Däzember 2011 het d SVP bekannt gäh, mit wellne Kandidate si de Sitz vo de Eveline Widmer-Schlumpf wot "aagriffe" und het de Bruno Zuppiger und de Jean-Francois Rime vorgschlage. Wäge em Wältwuche-Artikel, wo im Zuppiger vorgworfe het, er heigi es Erb versuecht z untreschlah, het er uf sini Kandidatur verzichtet und d SVP het dafür de Hansjörg Walter nominiert. De Walter het im Vorfeld betont, er wär numme bereit für de Sitz vo de Eveline Widmer-Schlumpf zur Verfüegig stoh.

Wahle

D Wahle hei, wie es üblich isch, nach em Ancienitätsprinzip schtatt gfunde. Des heisst es wird in de Reihefolg vom Amtswalter vo de amtiirende und wider aaträtende Bundesröt gwählt.

1. Wahl (Sitz vo de Doris Leuthard, CVP)

	1. Wahlgang
usteilti Wahlzettel	245
iiggangeni Wahlzettel	245
leer/ungültig	17/1
gültig Total	227
absoluts Mehr	114
Doris Leuthard	216
Verschieden	11

2. Wahl (Sitz vo de Eveline Widmer-Schlumpf, BDP)

D SVP het vor dere Wahl aakündt, dass si de Sitz vo de BDP wird aagriife und het bi de Wahl de Jean-François Rime und de Hansjörg Walter als Kandidate vorgschlage.

	1. Wahlgang
usteilti Wahlzettel	245
iiggangeni Wahlzettel	245
leer/ungültig	5/1
gültig Total	239
absoluts Mehr	120
Eveline Widmer-Schlumpf	131
Hansjörg Walter	63
Jean-François Rime	41
Verschiedeni	4

3. Wahl (Sitz vom Ueli Maurer, SVP)

	1. Wahlgang
usteilti Wahlzettel	245
igangeni Wahlzettel	245
leer/ungültig	16/3
gültig Total	226
absoluts Mehr	114
Ueli Maurer	159
Hansjörg Walter	41
Luc Recordon	13
Verschiedeni	13

4. Wahl (Sitz vom Didier Burkhalter, FDP)

	1. Wahlgang
usteilti Wahlzettel	245
iigangeni Wahlzettel	245
leer/ungültig	12/1
gültig Total	232
absoluts Mehr	117
Didier Burkhalter	194
Jean-François Rime	24
Verschiedeni	14

5. Wahl (Sitz vo de Simonetta Sommaruga, SP)

Vor dere Wahl het de Fraktionspräsident vo de SVP, de Caspar Baader, aakündt, dass de Jean-François Rime ab jetzt bi jedere Wahl dät kandidiire, wil alli andere Parteie willentlich d Konkordanz broche heige und d SVP sich us dem Grund au nümm an d Konkordanz gebunde fühli.

	1. Wahlgang
usteilti Wahlzettel	245
igangeni Wahlzettel	245
leer/ungültig	3/0
gültig Total	242
absoluts Mehr	122
Simonetta Sommaruga	179
Jean-François Rime	61
Verschiedeni	2

6. Wahl (Sitz vom Johann Schneider-Ammann, FDP)

	1. Wahlgang
usteilti Wahlzettel	245
igangeni Wahlzettel	245
leer/ungültig	9/2
gültig Total	234
absoluts Mehr	118
Johann Schneider-Ammann	159
Jean-François Rime	64
Verschiedeni	11

7. Wahl (Ersatzwahl vo de Micheline Calmy-Rey, SP)

Wil d Micheline Calmy-Rey nüm aaträte-n-isch, het di Wahl am Schluss schtattgfunde. D Calmy-Rey het scho am 7. September 2011 mitteilt gha, dass si nüm für e noii Amtsperiode wird kandidiire. D SP-Fraktion hetde im Fryburgsche wohnhafti Waadtländer Schtaatsrot Pierre-Yves Maillard und de Fryburger Ständerot Alain Berset für d Nochfolg Calmy-Rey vorgschlage und wi scho ober erwähnt, het au de Fryburger SVP-Politiker Rime kandidiirt.

	1. Wahlgang	2. Wahlgang
usteilti Wahlzettel	245	245
iigangeni Wahlzettel	243	245
leer/ungültig	0/0	0/0
gültig Total	243	245
absoluts Mehr	122	123
Alain Berset	114	126
Pierre-Yves Maillard	59	63
Jean-François Rime	59	54
Marina Carobbio	10	–
Verschiedeni	1	2