Reinhold Ohngemach

Dr Reinhold Ohngemach (* 20. Sebdember 1943 z Stuegert) ischt a deitscher Schauschbiiler.

Aus seim Leaba

Dr Reinhold Ohngemach ischt em Jôhr 1943 z Stuegert uff d Welt komma. Nôch seira Schuelausbildong hôt’r zerscht amôl a Lehr zom Landvormesser gmacht ond dô drnôch sein Wehrdinscht bei dr Bundeswehr abgleischdet. Wia der rom gwäa ischt, hôt’r sein Lebensondrhalt durch d Ausiabong vo vorschiidene Beruaf vordeant. So hôt’r zom Beischbiil a Zeitlang als Bademoischder ond als Laschtwagafahrer gschaffet. Em Alder vo 22 Jôhr schließlich hôt der Môô en seira Hoimetstadt bei-ra privada Schauschbiil-Schuel a Ausbildong ôôgfanga. Drneaba hôt’r als Bihnaarbeider beim Staatstheader gschaffet, om dui Ausbildong finanziira zo kenna.

Als ferdiger Schauschbiiler hôt dr Reinhold Ohngemach 1968 sei erschts Engagement beim Stuegerter Staatstheater kriagt. Deet ischt’r abr bloß mit kloinere Rolla betraut wôrra. De weitre Staziona en seira Theader-Laufbôh send s Theater der Altstadt z Stuegert ond s Stadttheader z Ulm gwäa, gfolgt vo Rolla bei Theader en Esslenga, Düsseldorf, Köln, Dortmund, Castrop-Rauxel ond Recklinghausa. Ab 1995 hôt dr Reinhold Ohngemach bloß noh freiberuaflich gschaffet. So ischt’r beischbiilsweis oft als Gascht bei de Stuegerter Schauschbiil-Bihna (= Altes Schauschbiilhaus ond Komödie em Marquardt) ufftredda. Emmer amôl wiider hôt’r au – uff dr Bihne ond em Film – zeiga kenna, dass’r neaba-ma perfekda Hochdeitsch au sei Muederschbrôch Schwäbisch guat beherrscht, zom Beischbiil em Stick «Hoimetaberau» am Theader Tribühne, en Fernseh-Seria vom Siddeitscha Rundfunk bzw. vom Sidweschtrundfunk ond en mehrere Stuegert-Tatort-Folga.

A Auswahl vo de Film, wo-nr dren mitgschbiilt hôt

1990: Pfarrerin Lenau, TV-Serie (13 Doil)
1994: Tatort: Der schwarze Engel
1995: Drei Tage im April
1998: Tierarzt Dr. Engel, Folge Das Gerücht
1999: Viehjud Levi
1999: Tatort: Bienzle und die blinde Wut
2001: Tierarzt Dr. Engel, Folge Was für ein Zirkus
2003: Tatort: Bienzle und der Taximord
2004: Ein Gauner Gottes
2005: Der Brand
2009: Die Frau, die im Wald verschwand
2010: Ein Praktikant fürs Leben
2011: Tiere bis unters Dach
2013–2014: Die Kirche bleibt im Dorf, TV-Serie (13 Doil)
2015: Chocolate Darwin (Animationsfilm)
2016: Der Opa wohnt jetzt im Himmel (Kurzfilm)

Weblinks (ond Quella)