Unalaska

Unalaska
	Satellitebild vo Unalaska (rächts) und Umnak (linggs) Satellitebild vo Unalaska (rächts) und Umnak (linggs)
Gwässer	Pazifik
Inselgruppe	Fox Islands
Geographische Lage	53° 54′ N, 166° 32′ WKoordinate: 53° 54′ N, 166° 32′ W
	Unalaska (Alaska) Unalaska
	Unalaska (Alaska) Unalaska
Flechi	2 721 km²
Hechschti Hebi	Mount Makushin; 2.036 m
Iiwohner	1759 (2000) ; <1 Einw./km²
Hauptort	Unalaska
	Dr Hauptort Unalaska Dr Hauptort Unalaska

Unalaska isch äini vo de Fox Islands in dr Middi vo de Aleute, südwestlig vo Alaska in de Veräinigte Staate. D Insle isch 2721 km² (1051 Quadratmäile) grooss. Im Nordoste, uf dr Site gege d Beringsee, lit d Stadt Unalaska, und e groosse Däil von ere lit uf dr Haafeninsle Amaknak.

Gschicht

1759 het s uf de Insle Unalaska und Amaknak 24 Siidlige mit mee as 1000 aleutische Iiwooner ghaa. D Alëute oder Unangan läbe sit Duusige vo Joor uf dr Insle Unalaska. Dr russisch Belzhandel isch uf Unalaska choo, wo dr Stepan Glotov mit sinere Bsatzig am 1. August 1759 dört glandet si.

Am 3. Juni 1942, wääred em Zwäite Wältchrieg häi d Japaner Unalaska aagriffe. Fast alli Iihäimische het mä bis noch em Chrieg uf Südost-Alaska gschickt.

Am 8. Dezämber 2004 isch s malaiische Frachtschiff Selendang Ayu vor Unalaska usenanderbroche und s Schwerööl, wo usgloffe isch, het en Öölpest verursacht.

Geografii

D Bucht vo Unalaska mündet in e Aktuan Pass, wo d Insle im Nordoste begränzt und wo die chliini Insle Unalga din lit. Im Süde drennt dr ängi Umnak Pass Unalaska vo dr Umnak Insle. Vor däm Bass lit d Chläistadt Chernofski am Fuess vom Mount Aspird (654 m). Si isch öbbe 80 km südwestlig vo Unalaska, au uf dr Site gege d Beringsee.

Die grössti Erheebig uf dr Insle isch dr Vulkan Makushin, wo 2036 m hooch isch.