Balcars
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
| Balcars Малкъарлыла | |||
|---|---|---|---|
 | |||
|
| |||
| |||
| Dialecto balcar d'o quarachai | |||
| Prencipalment sunnismo. | |||
| Pueblos turquicos | |||
Os balcars (en quarachai Малкъарлыла) son un grupo etnico que habita as estreitas vals d'os ríos Baksan, Cheghem y Terec d'o sud y o sudueste d'a republica rusa de Cabardino-Balcaria, en a versant norte d'o Caucas. Charran una luenga turquica pareixita a o carachai y son musulmans sunnitas seguidors d'a escuela Hanafí, con restos d'a relichión tradicional y de cristianismo. En 1989 yeran uns 89.000 individuos, d'os que 70.000 viviban en a Republica Cabardino-Balcar.
A economía tradicional se centra arredol d'a ganadería ovina, vacuna y equina y d'as artesanías domesticas. Etnograficament os balcars son pareixitos a os suyos vecins cabardos. Os suyos poblatos de montanya conservan as suyas viviendas y torres de piedra.
O pueblo balcar se divide en tres brancas: bakhsan, chegmly y malkarly, (estos zaguers dan nombre a tot o grupo etnico).
Luenga
[editar | modificar o codigo]S'ha feito un estándard común pa o balcar y o carachai, idiomas u codialectos turquicos d'a branca Quipchac estreitament emparentatos. Este estándard prenió una forma ya de pa cutio en os anyos sixanta dimpués de cuaranta anyatas de forcecheyo entre tendencias uniformadoras y tendencias separatistas. L'alfabeto latino se fació servir entre 1925 y 1938, pero dende 1938 se fa servir o cirilico, como en as atras luengas turquicas d'a ex URSS que veyeban un periglo en fer servir o mesmo alfabeto latino que en a Turquía kemalista.
Historia
[editar | modificar o codigo]Como en o caso d'os carachais, d'alcuerdo con a teoría mes admesa ye que descienden de cumans que se refuchioron en o Caucas cuan en o sieglo XIII fuoron invaditos por os mongols. En o Caucas absorberían a os nativos circasians y restos d'o pueblo alano aliau.
En 1921 os balcars chunto con os cabardos recibioron a categoría administrativa d'Oblast autonoma, que en 1936 se convertió en a Republica Socialista Autonoma Cabardino-Balcar.
En agosto de 1942 os alemans plegoron a lo mont Elbrús. Os balcars recibioron a los soldatos alemans como salvadors y un mainate local li regaló a Hitler un caballo blanco en agradeiximiento. Con l'aduya d'os tartaros panturquistas refuchiatos en Turquía se formó o Comité Nacional d'o Caucas d'o Norte, con a intención d'aplegar a los carachais y balcars en una mesma demarcación territorial (os sovieticos no la heban feita porque a presencia d'un relieve como o Elbrús no permite comunicacions dreitas). Manimenos enantes de cabo d'anyo os alemans habioron d'evacuar a zona por a derrota en Stalingrado, que no lis permitiba defender as posicions en o Caucas y a Mar Negra.
En represalia en noviembre de 1943 as autoridaz sovieticas deportoron en masa a los carachais t'Asia Central, y o 8 de marzo de 1944 a los balkars. O territorio Balcar pasó a Cheorchia y a republica inicial quedó reducita a la Republica Cabardina. Os Balcars no i tornarían dica 1957, y a diferencia d'o que se desbinió en Ingushetia u Crimea, o suyo territorio no fue ocupato por nacionalidaz vicinas. En 1957 un decreto d'o Soviet Supremo d'a URSS lis tornó a suyo territorio, que fue baptizato como "Republica Cabardino-Balcar". A fins de 1991 os balcars aproboron en referendum a proclamación d'una Republica Balcar deseparata, sin reconoiximiento por parte de Rusia y sin papel administrativo reyal.
Bibliografía
[editar | modificar o codigo]- (es) Gonen, Amiram. Diccionario de los pueblos del mundo. Editorial Anaya, 1996. ISBN 978-8479793500.
- (es) Jean Sellier y André Sellier. Atlas de los pueblos de Oriente. Acento Editorial.
Referencias
[editar | modificar o codigo]| Control d'autoridaz |
|
|---|
