Estanislau Figueras i de Moragas
Estanislau Figueras i de Moragas | |||||||||
|---|---|---|---|---|---|---|---|---|---|
 | |||||||||
12 febreru 1873 - 11 xunu 1873 ← ensin valor - Francesc Pi i Margall →
29 abril 1872 - 8 xineru 1874 Distritu: Barcelona
13 abril 1871 - 2 xineru 1872 - Mariano Rius (es)  → Distritu: circunscripción electoral de Falset (es)
16 febreru 1869 - 2 xineru 1871 - Manuel Bes i Hediger → Distritu: distrito electoral de Tortosa (es) | |||||||||
| Vida | |||||||||
| Nacimientu | Barcelona, 13 de payares de 1819[1] | ||||||||
| Nacionalidá |
 España | ||||||||
| Muerte | Madrid, 11 de payares de 1882[1] (62 años) | ||||||||
| Sepultura |
Cementerio Civil de Madrid (es) [2] | ||||||||
| Estudios | |||||||||
| Llingües falaes |
castellanu catalán | ||||||||
| Oficiu | abogáu, políticu | ||||||||
| Llugares de trabayu | Madrid | ||||||||
| Creencies | |||||||||
| Partíu políticu |
Partíu Progresista Partido Republicano Democrático Federal (es) | ||||||||
 | |||||||||
Estanislau Figueras i de Moragas (13 de payares de 1819, Barcelona – 11 de payares de 1882, Madrid) políticu, periodista y abogáu catalán, foi'l primer presidente[3] de la Primer República Española. Arriendes de la so actividá política, na que destacó como gran orador y parllamentariu, rexentó, primero en Tarragona y dempués en Madrid, un importante despachu d'abogaos.
Los años de la monarquía: oposición... y persecución
[editar | editar la fonte]Nacíu y criáu en Barcelona, llicencióse a los 21 años en derechu civil. En 1840 ingresó nel Partíu Progresista, y cuatru años más tarde coló pa Tarragona, ú entamó a trabayar como abogáu, una profesión na qu'algamaría una sonadía importante. Ellí participó destacadamente nos llevantamientos de 1848: tuvo la suerte de nun acabar na cárcel, y darréu coló pa Madrid. Nesi tiempu entamaron los sos contactos colos círculos políticos republicanos de la capital, anque siguió formando parte del Partíu Progresista. Pero sólo hasta 1849: nesi añu pasa a les files del Partíu Demócrata, que nace n'abril d'esi añu como una escisión de los progresistes.
En 1851 foi elixíu, por primer vegada, diputáu por Tarragona (diba selo, nos años vinientes, delles vegaes más, cuando por esa ciudá y cuando por Mataró), y volvió ellí pa formar parte de la so Xunta Revolucionaria: foi'l so presidente nos acontecimientos políticos que llevaron al periodu que se conoz como Bieniu Progresista (1854 - 1856). En 1855 foi elixíu diputáu a les Cortes Constituyentes que se convocaron col envís de redactar una Constitución nueva que sustituyera a la moderada de 1845, que foi anulada. Nelles foi'l cabezaleru de la minoría republicana, que nun pudo sacar alantre la opción d'instituyir un réxime republicanu. Nos discutinios parllamentarios defendió la descentralización del Estáu y les desamortizaciones, lo que lu enfrentó a les xentes más averaes a la Ilesia.
Siguió siendo diputáu nes eleiciones de los años 1862 y 1865 y, a resultes de les medides represives qu'adoptara Narváez escontra los implicaos na sulevación del cuartel de artillería de San Gil (22 de xunu de 1866), tuvo de fuxir a Portugal en 1867 pa nun acabar na cárcel. Tres el trunfu de la Revolución de 1868, que dio aniciu al periodu que se conoz como'l Sexeniu Democráticu, volvió pa España ya ingresó nel Partíu Republicanu Democráticu Federal que recién formara Pi y Margall. Nesi mesmu añu fundó'l periódicu La Igualdad, d'ideariu republicanu federal. Gracies a elli y a la so intensa actividá política y parllamentaria convirtióse nel líder más nomáu de la minoría republicana del Congresu, igual nos discutinios qu'encumaren na proclamación de la Constitución de 1869, qu'establecía la monarquía como forma de gobiernu n'España, que dempués de la xubida'l tronu del rei Amadéu I.
La I República: de la ilusión... al desánimu
[editar | editar la fonte]El reináu d'Amadéu finó de sópitu cuando, fartucu de los problemes políticos del país (guerra en Cuba, guerra carlista, intrigues de los republicanos y los monárquicos alfonsinos), abdicó el 11 de febreru de 1873. Al día siguiente les Cortes, que se constituyeran n'Asamblea Nacional, decidieron por mayoría que la forma de gobiernu diba ser, pa en delantre, la republicana. Nacía, así, la Primer República Española. Nesa mesma sesión decidióse la composición del primer gobiernu del nuevu réxime, y nella foi nombráu Figueras presidente del poder executivu. Esi, qu'incluyía les funciones de xefe del Estáu y del Gobiernu, foi'l cargu que recibió: nun foi, porque nun llegaría inxamás a promulgase la constitución qu'estableciera esa figura, presidente de la república, como suel dicise davezu.
La proclamación de la república foi una sospresa, porque la mayoría los diputaos yeren monárquicos. El gobiernu de Figueras incluyía, mayormente, a federales y progresistes que ya teníen sío ministros durante la monarquía, y nun contaba col apoyu de la población, emprobecida pola crisis económica y cabreada porque la obligaben (había serviciu militar obligatoriu) a dir lluchar a Cuba, nin tan siquier de tolos republicanos. Ansina, el propiu presidente de l'Asamblea Nacional, el radical Cristino Martos, intentó, per aciu d'un golpe d'Estáu, implantar una república unitaria. El golpe del 23 de febreru fracasó, y tolos progresistes del gobiernu foron sustituyíos por ministros republicanos federales, qu'aprobaron la suspensión del serviciu militar obligatoriu.
Figueras, mentantu, amosaba cierta debilidá como xefe de gobiernu, y sólo pol apoyu de Pi y Margall, alma verdadera d'aquel gobiernu, logró caltenese como cabezaleru del mesmu. La situación, amás, empeoraba día tres día: el 9 de marzu consiguió evitase la proclamación del Estat Català dientru la República Federal Española, hebo un segundu intentu de golpe d'Estáu n'abril... Pa remedialu Figueras disolvió'l gobiernu y convocó Cortes Constituyentes el 1 de mayu.
Les eleiciones foron el día 10, y nelles los republicanos federales sacaron, nunos comicios con una participación perprobetaya, la mayoría absoluta. El 1 de xunu abriéronse les sesiones de les Cortes que, el día 8, aprobaron qu'España se convertía nuna república federal. Al día siguiente Figueras dimite, y marcha pa Francia fartucu de too (llegó a gritar «Senyors, ja no aguanto més. Vaig a ser-los franc: estic fins als collons de tots nosaltres!» nuna reunión del conseyu de ministros). El día 11, demientres que se preparaba otru golpe d'Estáu, Pi y Margall (que dixo na so invistidura que nun tenía programa de gobiernu y que nun sabía qué diba facer) foi nombráu socesor de Figueras.
Esti, tras pasar dellos meses en Francia, volvió pa España pa intentar xuntar los distintos grupos republicanos... anque sólo llegó a tiempu de ver cómo cayía la República, el 29 d'avientu de 1874, col golpe d'Estáu del xeneral Martínez Campos. Nos años de la Restauración menguó muncho la so activídá política, anque en 1880 funda, d'acordies con Ruiz Zorrilla, exiliáu en París, el Partíu Republicanu Federal Orgánicu. Nun tuvo tiempu, por embargu, de velu espolletar, porque morrió, a los 63 años d'edá, en 1882.
Referencies
[editar | editar la fonte]- ↑ 1,0 1,1 Afirmao en: Enciclopedia Brockhaus. Identificador de Brockhaus Enzyklopädie en línea: figueras-moragas-estanislao. Apaez como: Estanislao Figueras Moragas. Data de consulta: 9 ochobre 2017. Llingua de la obra o nome: alemán.
- ↑ «Desde Madrid. El cementerio civil» (en castellanu). El Pueblo (2905): páxs. 2. 8 xunetu 1929.
- ↑ El nome oficial del so cargu nun yera esi porque inda nun s'aprobara d'aquella una Constitución republicana.
Enllaces esternos
[editar | editar la fonte]
Wikimedia Commons acueye conteníu multimedia sobre Estanislau Figueras i de Moragas.- «Estanislau Figueras i de Moragas». en Find a Grave. (n'inglés)
| Predecesor: Amadéu I (Rei d'España) Manuel Ruiz Zorrilla (Presidente'l Conseyu Ministros) |
Presidente'l Poder Executivu de la República Española 12 de febreru - 11 de xunu de 1873 |
Socesor: Francesc Pi i Margall |
| Control d'autoridaes |
|
|---|
Datos: Q553120- Multimedia: Estanislao Figueras
Cites famoses: Estanislao Figueras