Izquierda Asturiana

Izquierda Asturiana
Secretaría xeneral	Faustino Zapico
Fundación	1992
Sede	Uviéu
Estáu	España
Ideoloxía política	socialismu democráticu, Progresismu, asturianismu y Independentismu
Posición nel espectru	izquierda
Organización de mocedá	Mocedá d'Izquierda Asturiana
Páxina web	ias.as

Izquierda Asturiana (IAS) ye un partíu políticu asturianu que se define como izquierda republicana, socialista, verde y soberanista d'Asturies.

Historia

Izquierda Asturiana fundóse nel añu 1992 por ex-militantes de la Unidá Nacionalista Asturiana que nun taben d'alcuerdu cola llinia política de la formación. Nel I Alcuentru Nacional, celebráu ente payares de 1994 y xineru de 1995, diéronse los pasos necesarios pala constitución del partíu y aprobáronse les sos bases ideolóxiques. Tovía nun tuvieron representación na Xunta Xeneral del Principáu d'Asturies.

El partíu tien ente los sos oxetivos la defensa del asturianu (dende xunu de 2004 ye miembru del Conceyu Abiertu pola Oficialidá, asina como realizar una política d'izquierda asturiana, ensin influyencies de nengún partíu ayenu a la realidá política asturiana.

Dempués de delles negociaciones, n'abril de 2007, presentó xunto a Los Verdes-Grupu Verde una coalición col nome d'UNIDÁ pa les eleiciones asturianes d'esi añu.

En xunetu del 2012 faise pública la Resolución de la Direición Nacional d'IAS aprobada meses enantes onde se fai una valoración de la participación d'IAS na UNA dende la so fundación en 2008 y se fai anuncia de la recuperación de la so soberanía política, renunciando a la so participación na fundación de Compromisu por Asturies.

Nes eleiciones a conceyu de mayu del 2015 IAS robla un alcuerdu de collaboración con Izquierda Xunida (IX) nos conceyos de Mieres y Morcín, nun cuayando la so presencia dientro de les llistes d'IX nos conceyos de Llangréu, Siero, Colunga, Cabrales y Piloña ente otros porque nun se daben les condiciones nin les garantíes pa faceles viables. Frutu d'estos alcuerdos Faustino Zapico algama l'acta de conceyal nel Conceyu Mieres, onde xestiona les conceyalíes de Participación Ciudadana, d'Educación y de Política Llingüística, amás de coordinar la Estaya de Servicios Servicios a la Ciudadanía (qu'engloba les conceyalíes d'Infancia, de Mocedá, de Cultura, de Deportes, de Memoria Democrática, d'Educación, de Participación Ciudadana, y de Política Llingüística).

La MIAS ye la organización moza d'izquierda Asturiana que, en 2008, se disuelve, anque la direición nacional del IAS nun lo reconoció.

Resultaos eleutorales

Nesta seición, preséntense los resultaos d'esta formación política en solitario. Los sos resultaos en coalición puen vese en Bloque de la Izquierda Asturiana y UNIDÁ.

Eleiciones a conceyu

Añu	Candidatura	Conceyu	votos	% votos	Conceyales
2003	Izquierda Asturiana-Verdes	Mieres	344	1,36%	0

Añu	Candidatura	Conceyu	votos	% votos	Conceyales
2003 2007	Izquierda Asturiana	Piloña	296 429	5,17% 7,92%	0 1

Añu	Candidatura	votos	% votos	Conceyales
2007	Unidá por Corvera (Andecha Corvera-IAS-LV-GV)	138	1,71%	0

Congresu de los Diputaos

Les úniques eleiciones a les que se presentó en solitario pal Congresu de los Diputaos fueron les xenerales de 2004.

Añu	votos	% votos
2004	854	0,12%

Senáu d'España

Les úniques eleiciones a les que se presentó en solitario pal Senáu fueron les xenerales de 2004.

Añu	Candidatu	votos
2004	Ignacio López Fernández Penélope Miranda Fernández Xandru Sánchez Hoya	1.904 1.403 1.167

Predecesor: Unidá Nacionalista Asturiana (UNA)

Partíu políticu IAS 1992-1999 / 2002-2007 / 2012-anguaño

Socesor: Bloque de la Izquierda Asturiana (BIA) UNIDÁ

Enllaces esternos

• Páxina oficial de les redes sociales d'IAS
• Páxina web d'Izquierda Asturiana

• Datos: Q3307624